::: مـنتدى قبيلـة الـدواسـر الـرسمي ::: - مرثية الشاعر . اجمد الناصر الدوسري في ابنه محمد ((رحمه الله ))

- :: قسم الـشعر العــام :: (http://alduwaser.org/vb/forumdisplay.php?f=16)

مرثية الشاعر . اجمد الناصر الدوسري في ابنه محمد ((رحمه الله ))

السلام عليكم ورحمة الله وبركاته..

هذه القصيدة قالها الشاعر الكبير أحمد الناصر الشايع في رثاء ابنه محمد رحمه الله الذي

توفي قبل شهر أو أكثر بحادث مروري فقال هذه القصيدة الباكية :

(( رحم الله شاعرنا الكبير محمد بن احمد ))

يا بعد نوم الليل عن حجـر عينـي=صبر على ما صار من وال الأقـدار
صبرت صبر بـاح منـه الكنينـي=أضحك مع العالم وكني علـى نـار
ما غير أهوجس بين نفسي وبينـي=يعلم بها العلام فـي كـل الأسـرار
تقل اتحـرى لـي علـوم تجينـي=مع الطروش اللي يجيبون الأخبـار
فهمت رأس العلـم مـن كلمتينـي=من يوم قالوا جـا محمـد ونصـار
تكسّـرت عقبـه جرايـد يميـنـي=عز الله اني عقب ما صـار صبّـار
من عقبهـا ونيـت لـي ونتينـي=ونة غريب بالخلا ضـاع واحتـار
لـولا الله أبـرك ثـم قـوة يقينـي=لا طير مثل الطير من كـف صقـار
تخنقنـي العبـره وأفـرّك يدينـي=واحترت مثل مصالي النار والغـار
علـم يخلـي كـل قاسـي يلينـي=كنه على قلبي رصـاص أم كـرار
الـى ذكـرت عيالـه المصغرينـي=هــذا يعزيـهـم وهــذاك زوار
احد على جنبه واحـد لـه ونينـي=جتني هموم القلب من كل الأقطـار
قلت اصبروا والله مـع الصابرينـي=الله يكافيكـم صواديـف الأشـرار
عسى عوضنـا الحـي بالميتينـي=ناصر ونايف ذخـرا سـر واجهـار
وأحمد وعبـدالله ذرانـا الحصينـي=صغار سن وان بـدا الـلازم كبـار
يجبر عزاي اللي بخلقـه ضمينـي=محيي العروق الميته عقب الأمطار
مالي عن المكتوب فـوق الجبينـي=لو رحت شرق وغرب ويمين ويسار
صليت نصف الليـل لـي ركعتينـي=أطلب لـه اللـي للخطيـات غفَّـار
خفف ذنوبه يـا أرحـم الراحمينـي=في ماقفٍ ما ينفعن فيـه الأعـذار
جعله برضوانـك مـن الفايزينـي=بالماقف اللي به يضيعـن الافكـار
في ماقفٍ بـه كـل خافـي يبينـي=تمت وصلى الله على سيد الأبـرار

وتقبلوا تحياتي..