للسر صنـدوقٍ يحفـظ الأمانـه=صدور الرجال المحصنات المنيعه
الرجل تعرف قيمته مـن لسانـه=يشريه عنـد النـاس وألا يبيعـه
يامـن تعـوّد مـن رداه الأهانـه=طبيعتك ماتستـوى لـي طبيعـه
روّح بحفظ الله وستـره وأمانـه=وأعرف ترى دور الليالي سريعه
ممشى مع شرواك نقص ومهانـه=بالوصف قيل الشخص يشبه ربيعه
بينـي وبينـك ماتصيـر الميانـه=ما رافق اللي مثل هـذا صنيعـه
هرجٍ بعـورات الخلايـق جبانـه=جزاه ضمن الموبقـات المريعـه
والستر عنـد الله رفيـعٍ مكانـه=والوصل أخير من الجفا والقطيعه
عوّدت نفسي للعلا عـن طمانـه=أشوم للعليـا وأخلّـي الوضيعـه
حلفت بأسـم الله وعـزه وشانـه=لحفظك يالنفس العزيـزه رفيعـه

مابين هجعات البشر وآخر الليـل=هاجوس ينتاب الضمير ويضيمـه
أسهر وراعي الجدي لاغيّب سهيل=عزي لمن خلا الكواكـب نديمـه
يلعب بي الهاجوس وأحط واشيل=وحالي من التفكير صارت سقيمه
مثل الشجاع اللي رمته المحابيـل=الله يجيب ألنـا العواقـب سليمـه
يا ابو علي مافاد كثـر التحاليـل=الناس في علّـة فـؤادي غشيمـه
اشيل حمـلٍ زاده الصبـر تثقيـل=والوقت بعض احيان مافيه شيمـه
لوشان وقتي ثابت السلم ما ميـل=سلمي وعاداتي لها العمـر قيمـه
وإن شفت منه أيام بعض الغرابيل=أليا ظلم مانيـب راعـي ظليمـه
والشك ماله في ضميري مداخيـل=آمنت باللي حط موسـي كليمـه
الحمد للخلاق منشـي المخاييـل=الواحد اللي سـد سـري عليمـه
آمنت باللي قاسمه لي محاصيـل=منه استمديت الصبـر والعزيمـه
يـالله عضنـي فالليـال المقابيـل=علي النقا في دروبك المستقيمـه
عزاي دايم فالرجـال المشاكيـل=اللي مواقفهـم مواقـف عظيمـه
شم الخشوم الطيبيـن الحلاحيـل=خطلان الايدي والنفوس الكريمـه
الكسـب والله كسبهـم يارياجيـل=كسب النشامـا للنشامـا غنيمـه

جنبت يا بو سعود بعض المساييـر=مالي ب مساير(ن) علي غير مشهاه
وأعيف بعض أحيان بعض المشاوير=البعض مالي رغبة(ن) في مخـاواه
بعض العرب تصرفـه دون تفكيـر=مثـل البهيمـة يقضبونـه بعلـبـاه
يخدرونـه بالسوالـيـف تخـديـر=ويصبح يهابـد فالمجالـس بعميـاه
من غير لايدري قضا حاجة الغيـر=والمستفيد اللي مـن الهـرج عبـاه
الرجل يلقي له رجال(ن) مناعيـر=واللاش يلقي واحد(ن) كنـه ايـاه
مال الردي عند الرجاجيـل تقديـر=حيث الردي ماينفـع الطيـب ويـاه
وللطيب في وجيه الرجاجيل تأثيـر=أذا فعلت الطيـب فالرجـل تلقـاه