بــــــرق من القبله يلــــوح بملـــواح=يدعي هل البل كاسبين النوايف
قام يـتـحنــحن وبارقــه بالسـمـا لاح=يكشف على ليل يضـم الـولايــف
يدعـــــي ارجــــالا تاصله وينهـو راح=ماهم من اللي يكثرون الحسايف
مثل بـن رثــوان مايهـنـا ويـرتـــــــاح=حتى يسمح جـلـها والـخـفـايـــف
والا كـمـا مشخص تفـرح بـه طـيـاح=يمشي بهواهــــا ماحذفها حذايف
ارجالا لهم في قمة المجـد مشواح=وتاريـخـهـم مـعـروف مافـيـه زايف
وانا الـتـفت وقـمـتـنـا أمــد الاشباح=واشبح لـديـــرة من له القلب رايف
قلبي صويب وصــوبه ضبي الأبراح=اللـي ضـعــونه مـقـبـلات نـكـايـف
انـا ولـيـفـي يافـهـد ويـنـهـــــو راح=عـــجــــــل وخبرني بزين الوصايف
يـذكــر مـع الـبـدوان ماهوب سراح=ودي بـشـوفــه يـافـهــد مير خايف
دونـه ارجـــالا مـحـتـمينه بالاشباح=والشك داخــلــهــم وفـيـهـم لقايف
وجدي عليها وجد من قام هم طاح=وكـزوه بـرمـحـن مـضـربـه بالندايف
والا وجودي وجد من مسك بسلاح=وسـط الـريـاض وأصـدر الحكم نايف
امـه تـون وتـزعــج الصـوت بصـياح=تـبـي الـخـلايـف مـيـر مـابـه خلايف
تـجـر الـــونين وتصفق الراح بالراح=الامـن سـجـت لافــهــا كـــــل لايف
وهــذا شوحي يوم كلن له اشواح=وجـروح قـلـبـي كـلـبـوهــا نـزايـــف