بدينا باسم خالقنا الاله الواحد المعبود=وسيع المغفره ما يخضعون عباده الا له
و بعد ذكر الاله اقود زينات المثايل قود=قبل مبدأ الكلام اختار زينه واترك هزاله
اعّده و انقده لا يلحقه نقصٍ ولا منقود=و أصوغه و أصقله صقل الذهب بيدين صقاله
سلام الله سلام عطره العنبر و دهن العود=على كل ابلجٍ بأعلى سنام المجد منزاله
يشرفني حضوري في محل أهل الوفا و الجود=و داعين الكرم و ايضا على العيال عياله
فهودٍ من فهودٍ و الفهود يخلّفون فهود=و أنا اقوله و غيري في قديم الوقت قد قاله
هل الطالات في كل المراجل يا خذون الزود=زحول كل منهم في المراجل يوصي عياله
ثمان من السوالف هم أهلها و الخبر موكود=وكم من غيرهم يبغى يقلدها ولا جاله
و اثني بالسلام اعداد ما هبت هبوب النود=وعدد ما لاح براق السحاب و هل هماله
على عبدالعزيز اللي برز في الموقف المشهود=شجاعً قبل يولد ناشدٍ ابوه عن خاله
ولد عبدالله ابن مطلقه فعله عليه شهود=شهد له موقفه و إنا على فعله شهدنا له
على الجبهه تقدم و القذايف و أشهب البارود=من أفواه المدافع في سهول الحد وجباله
دفاعٍ عن حدود المملكة هذا هو المقصود=وطنا اللي تدارا هيبته من هيبة ابطاله
حدود المملكه يامن حماها في ذرا ال سعود=يموت اللي طمع في دارهم ما حقق اماله
يقوله شاعرٍ من لابةٍ يامن بها المضهود=مخاريمٍ تهزم القوم رجليه و خياله
ثقال في نحور اخصامهم يرسون مثل الطود=يعجز اللي يحاول فيه لا زاحه ولا شاله
و صلاة الله عدد ما حن في غر السحاب رعود=على اللي غايبٍ عنا و حنا نتبع اقواله