::: مـنتدى قبيلـة الـدواسـر الـرسمي :::

رجواي بالله فزعتي ساعة الضيق = الواحد المعبود جلاب الارزاق
واشكي هموم كالجبال الشواهيق = ومن كبرها بالفكر والصدر صفاق
وهذا ابتهالي عند رب المخاليق = من غيبة للشمس لطلوع الاشراق
ويارب نايف عايشن بالمعاليق = واطلبك ياربي تعجل بالاطلاق
وقبلي لقيم الحوت ينجى من الضيق = بتسبيح يارحمن يوم الصدر ضاق
وأنا بوجه اللي بيديه المواثيق = وعلى العهد يارب وبكل ميثاق
ويارب سخر لي وجيه المطاليق = اللي على الشدات يرقون الافاق
وفرحان هذا الشعر لا جالك وسيق = اقره على الترتيب من بيض الاوراق
ورد الجواب اللي به العلم توثيق = ومثلك يرد العلم بالقول وإلحاق
ماشفت همي صار اكبر من طويق = وماشفت هم الجوف بالكبد حراق
ولو يرجع اللي راح بالفعل تصديق = إلا تجيك أعمار والموت ينساق
وكتابنا ماجابه القول تفريق = ومثلك مع الرحمن بالعفو صداق
واطلب كرم بالعفو وارجوك ماتعيق = والله مع العافين وبكل الاشفاق
وناديت يامحمد باسمك بما يليق = ومثلك لوعد الرب عجلن ومشتاق
ادفع بها عن نفس تحتاج تشويق = واكسب لك اجر قبل ما الدم يراق
تخلي لوجه الله وما مثلك يعيق = وترجي عطى الرحمن في يوم تنساق
ومنهو ترك لله يلقى الملاحيق = براهيم باسماعيل اعتق ولا طاق
وازهم دهس لاستحفلت ساعة الضيق = وعندك شيم من صفوة الخلق باخلاق
وأقرأ الكتاب اللي نزل دون تفريق = وربك عفى عن روح عبده والازهاق
وبدل بها اضعاف خيرن مسابيق = وبالأخره جنات خضرن بما لاق
وصلاة ربي عد ماقيل تطبيق = على شفيع لأمته يوم الاغراق

ام السجين/ نايف عساف