اسمعوا من شاعر وده يغني=هايض صدره وفي باله علومي
ما حلا شوف الجيوب الى مشني=راكبين فوقها ربع قرومي
قبل اذان الفجر الاول حركني=مالرياض وقدمهن مسير يومي
وعقبن لام الجماجم واهزعني=واستقادن حد سهل من حزومي
ودوجن شرقي جراب وروحني=صوب دار شوفها يجلا الهمومي
ديرة فيها الحباري يوجدني=كل ما هلت بها دهم الغيومي
مالدخول الى اللبيد يذكرني=هي حراويها وقد جاها وسومي
صوبها شيخ المراجل ما يوني=يعتبر مقناصها يلزم لزومي
ذاك والله هو سعد من دون مني=ماخذ بالطيب جزلات القسومي
نادر ماهوب يخلف كل ضني=لا برك للحمل بالكايد يقومي
من لجا في جانبه عاش متهني=دايم عنده مقدر ومحشومي
عند صعبات الامور اللي تعني=مسند يلقى عسى راسه يدومي