::: مـنتدى قبيلـة الـدواسـر الـرسمي ::: - اتمنى قراءتها لراجح العجمي

- :: قسم الـشعر العــام :: (http://alduwaser.org/vb/forumdisplay.php?f=16)

- - اتمنى قراءتها لراجح العجمي (http://alduwaser.org/vb/showthread.php?t=61089)

اتمنى قراءتها لراجح العجمي

عثى فينا جهاز الدش بث وعـرض وإستقبـال=محاقين الـردى لا بـارك الله فـي محاقنهـا
بدأ وقت الفتن يطلع عسى الله يصلح الأحـوال=ولا نقـدر نقـول إلا عسـى ربـي يزينـهـا
طلع جيل يشيّـب بالرضيـع ويذهـل العقّـال=بعض ناس ذكرها المصطفى شفنـا عواينهـا
لقينا الكاسيات العاريات الوصـف والأشكـال=عليهـا لبـس لكـن لبسهـا يبـرز مفاتنهـا
تميل عن الطريق المستقيم ومـن تبعهـا مـال=خبيثة شكل ظاهرهـا يمثـل خبـث باطنهـا
ترحّلها إبليس وإنجلى عنهـا الحيـاء وإنجـال=ولـو قامـت تلملـم مـن يصدقهـا ويآمنهـا
تستر لين تدخل رأسها فـي المشغـل الشغـال=وعلـى الشغـال بالمشغـل مذارعهـا تبيّنهـا
غدت ماعاد تجفل من عيـال الهنـد والبنغـال=تغنّـج لـه إليـن يهـزّ رأسـه ثـم يديّنهـا
على ذا الحال يمكن تفتن الصاحي مع البطّـال=مـادام إنهـا تغنّـج لـه وكلمتـهـا تلينـهـا
تجرد عن لباس المسلميـن وتلبـس البنطـال=مـع قـل الحـلا تلبـس لهـا لبـس يشينهـا
يقولون الرجال " إن الفرس في دبرة الخيـال "=ورى الخايب يخلي الخايبـة تبـرز محاسنهـا
ولا يؤدب ولا ينصح ولا ينظر لها فـي حـال=يعاملهـا بهيمـة بـس مـابـه إلا يسمّنـهـا
وبعضهم لو يبي يؤدب وينصح زوجته ما أحتال=ولا ينكر عليها شـيء وإن زعلـت يساكنهـا
خذت منه القوامة وأصبح الحرمة وهي رجـال=تخلي الثوب نصـف السـاق وثيابـه يطمّنهـا
ولا جاء الليل كل راح له سائق ولـه جـوال=إلى من جات ما تلقاه وإن جـاء مـا يعيّنهـا
تحدد نسلها تبغى الرشاقـة مـا تريـد عيـال=مع عـدوان ديـن الحـق معلنـة تضامنهـا
وظيفتها عساها البعد بين النـاس قيـل وقـال=تجيـب الهـرج وتودّيـه والفتنـة تكوّنـهـا
ولا أعمم لأن الخير في بعـض البشـر لازال=وكم مصيونـة فـي بيتهـا والـرب صاينهـا
ولا يمكن يضحّي بالشرف والدين بنت رجـال=لأن الطيبـة يحمـي شرفهـا طيـب معدنهـا
عطاها الرب عقل ودين مافيها جهـل وخبـال=تيجـة قـوة التيـار مـا تخلـف توازنـهـا
على زلة زوجها لـو يكررهـا وسيعـة بـال=تحدث في المحاسـن والعلـوم القشـر تدفنهـا
لها في مهجته منزل ولـه فـي قلبهـا منـزال=تبادلـه الغـلاء ماهيـب خاينتـه وخاينـهـا
ولا ننسى شبـاب إبتلـن بـه طيبـات الفـال=تبي العفّـة وستـر الحـال والداشـر يجننهـا
مريض وناقص عقله خفيف وتشعفـه الأزوال=ومنيحه من ردى حظه ومـن خبثـه يحينهـا
نهاره نوم وإن جاء الليل يسهر في ردى وهبال=ولا جاء الفجر جاك يسحّب رجيلـه مطيّنهـا
من آثار المخدّر كنّ في جوفه مـرض سـلال=مـن التدخيـن كـنّ شفـاه بالنيلـة يلوّنـهـا
ومنهم من تميّز بالنعمومـة والظفـور طـوال=وذيك القذلة اللي مـن دهـون أختـه يدهنهـا
تحلى بالإنوثـة مابقـى إلا يلبـس الخلخـال=يشوف إخته تجمّـل للعريـس وغايـر منهـا
إلى منه هرج في المجتمع جات الهروج هزال=يـدوّر للرخامـة والمراجـل مـا يواطنـهـا
يضايقه الآذان ويطرب الداشـر مـع المـوّال=قضى ليلة مع الشلّـة وبنـت النـاس هاينهـا
ولا أعمـم لأن المجتمـع لازال فيـه أبطـال=وترى الدنيا من أهل الطيب ماخليت مخازنهـا
رجال تلتزم نهج الرسـول وللحمـول جمـال=ولا يخرج حديهـم كلمتـه يـا كـود وازنهـا
ولا ننسى قضية من مسكها لأجل حـب المـال=لأجل المال وصلت بنتـه الخمسيـن راهنهـا
يبيع ويشتري فيها .. كما السلعة مـع الـدلال=يبي ينظر من اللي يدفع أكثـر مـن زباينهـا
ترى هذا ومثله في المجالـس عـدّه الفنجـال=جزى اللـي علشـان الطمـع بنتـه يخزّنهـا
إلى جـوه رجـال طيبيـن الديـن والأفعـال=يحوّلهـم علـى أم البنـت والخايـب ملقّنهـا
تقول أبغى المهر اللحين نقد ريال فوق ريـال=نبي فوق المية مـن غيـر حاجـات تأمنهـا
تحته لين يبقـى رأس مالـه غتـرة وعقـال=يـدوّر الدداسـن فـي المعـارض ويتدينهـا
ألا وآشيب رأسي شاخت النسـوان والأنـذال=ولا يعتـزّ جيـل شيّـخ الحرمـة ومكّنـهـا
أنا مانيب شامت .. بس أبيّن وأضرب الأمثال=لعل أهل العقـول الطيبـة .. تـردع مجننهـا
أبحـاول عـلاج عصـر الـدش والأهـوال=وناس ماتبي تسمع كلامـي مـا علـيّ منهـا
يقوله واحد يخطـي مـع التفريـط والإهمـال=ولكن في رجاء الرحمـن لا صعبـت يهوّنهـا
إلى منا هوينا فـي المقابـر والحمـول ثقـال=وبدينـا فـي حيـاة الآخـرة وأول مساكنهـا
وجاء يوم عبوس قمطريـر يشيـب الأطفـال=نهار فيـه نـاس يفرحـون ونـاس يحزنهـا
ورود النار هذا شيء ثابـت ماعليـه إشكـال=ولكن النجاة اللـي تبـي مـا أحـد بضامنهـا
تسمّع يا وسيع العرف لاتجهـل مـع الجهّـال=أبعـرض النصيحـة وإنـت ياجعلـك تثمنهـا
تخيل يـوم ينقطـع النفـس وتضيّـع الآمـال=ونفسك عن هجوم الموت ما تقـدر تحصّنهـا
ولا ينفع ولدك ولا ولد عمك ولا إبـن الخـال=مسجّـى والمكفـن عنـد جثمانـك يكفنـهـا
ألا يا الله يا اللـي بيـدك الأرزاق و الآجـال=ولا للنـاس غيـرك رب يرحمهـا ويأمنـهـا
تجاوز عن خطايانا إلى من عرضت الأعمـال=نهار فيـه نفـس العبـد مـا يجـدي تغابنهـا
عراة ما علينـا لبـس وحفـاة بـدون نعـال=نهـار فيـه يجمـع ظالـم الأمـة ومحسنهـا