::: مـنتدى قبيلـة الـدواسـر الـرسمي ::: - سعد الودعاني في الأمير سلطان بن عبدالعزيز

السلام عليكم ورحمة الله وبركاته
اسعد الله اوقاتكم بالخير والمسرات
هذي قصيدة قديمة للشاعر سعد الودعاني في الأمير سلطان عبدالعزيز رحمه الله ، قالها قبل اكثر من عشر سنوات:

حييت يااللي كن بسمة محياك= غيثٍ تباشربه نضر كل مدروك
أعداد ماجمّلت فاالطيب ممشاك=وأعداد ماجوك الهواقي ولاقوك
سلطان بن عبدالعزيز شمس الأفلاك= اللي مايكفي الشعر عنّك مية بوك
كان الكرم سيد لهذا وهذاك = أنت السخا عبدٍ ن سجدلك ومملوك
على الوطن وأبن الوطن نابعٍ ماك= تروي وتنزع عن محبينك الشوك
كن الخطوط اللي على بطن يمناك=وديان جودٍ تروي اللي تناصوك
من صكته بقعا لجا يطلب حماك = ومنهو لجابك مالقا الباب مصكوك
لوقيل به مسكين حلفت ماجاك= لوجاك عوّد مغتني مالي البوك
على عطايا الجود سنيت مبداك=كم من ربيطٍ من فضايلك مفكوك
الشعب من طيبك ومرجلتك أغلاك= مواطنينه بين الأهداب شالوك
ماشفت كيف أستبشرو يوم لقياك=في جولتك لا أبها وحايل وتابوك
ذيك السنه قبل إيتغيّر مسماك=غنو لشخصك باالمحبه ووالوك
لولاك ماتغلا ماغنو ولولاك=ماتملك أسباب الغلا كان ماأغلوك
شعبك على دوم الدوام يتمناك=إلا أنت حتى شعب غيرك تمنوك
الطفل لويشكي تداعت له أعضاك=والعود مايرجع إيلا جاك متروك
الشعب لامن غبت قام إيتحراك= أن ما اذكروك آوادمه ماتناسوك
ياحزنهم تكفا لامن المرض جاك=برّق في فرحتهم إيلا جوك ولاقوك
ناسٍ مشاعرهم على الطيب تفداك=الصدق فيهم طبع والسنه سلوك
قلوبهم بيضا والأبيض نواياك=والأبيض أفعالك والأبيض وفأ ابوك ؛
رعيتهم باالفضل الله يرعاك=لوتطلب الأرواح فزو ولبوك
ملكتهم باالحب ملكك لمولاك=اللي مثل مااعطاك مامعه مشروك
يامفرج المضنوك لامنه ناداك= أضن ماخليت فاالناس مضنوك
الله يحبك والشهاده سجاياك=وأكبر دليل أن المخاليق حبوك
حوران ياكحيلان سلطان سمّاك=والناس يافرزان طولان سموك
ياامعرب الجدين منا ومناك=ساسين طيببٍ كلهن مرجع ملوك
والثالث بيمناك يوم الله أعطاك=يمناً تفرجها على كل مدكوك
ياعوف ياضرغام ياسيف هتاك=يا معدنٍ بيدين الأمجاد محكوك
ياريفنا اللي لا أجدب الوقت ننصاك=ياغيث يامروي عطش كل مهلوك
أمدحك صادق لامزور ولا أفاك=والحكم لك قبل الجماهير متروك
يا سيدي فاالناس لاذا ولاذاك=قيمتك ماهي في عقارات وبنوك
أسمك فقط جعل المنايا تعداك=يعز بلحاله بلا بنوك وصكوك
أقولها وكلي قناعات وأدراك=زمام قدرك بالأحاسيس ممسوك
وأنا يا ابوخالد لاهمت بمحاكاك=تحوّل الدنيا ريالين في بوك
لاقمت في نسج القصيد أتمعناك=تسلسل المديح مسبوك محبوك
ياسيدي اقدرك وأتمناك=تمني الماطر من عيون مهلوك
كل ما أنتهي بك في مساجيجي أبداك=أمفردك لوكل مشروك مبروك
متأكدٍن مافاالزمن شخص يسواك=وأن منهجك صعبٍ ولاهوب مسلوك
ياذا اللذي لاذا ولاذا ولاذاك= مثلك.. ولاكما خوالك ولا ابوك
عذري إذا الشعار ماأوفو مزاياك=كل الآوادم لو حكو فيك ما افوك
وأمدورين اوصافك هناك وهناك=لويرفعون عيونهم فوق شافوك
عالي وبين أيمينك وبين يسراك=غيثٍ تباشربه نضر كل مدروك