بسم الذي ماله شريكٍ ثاني=الواحد اللي نطلبه غفراني
القادر اللي كلنا نسجد له=ابدا بأسمه ابدع القيفاني
حضر يافكري ولاتجيب الهزله=عوايدك ماتجلب إلا سماني
فرايدن من طيب راس ابدعها=تاتي كما اللولو مع المرجاني
هيضني اللي ماحسب تاليها=هيضني وجريتنا الالحاني
اللي يذم المجهم المحبوبه=المجهم اللي كلها احساني
ام السنام المنفهق والغارب=ام الكرم هي غبقت الضيفاني
وام السبال الضافيه والخده=وام الرقاب الجرد واللحياني
حداد الاذاني مثل حد الشلفا =كبار الجروم وهي غنا الفقراني
حدبا ظهر فجا نحر مرغوبه=سود الجهام اللي كما الغرباني
كنها تعاين فالسما والقمرا=واللي نظرها يذكر الرحماني
يازينها لاجات من مفلاها=وريحت عبسها تبري الوجعاني
واللي يقول ان المرض فالمجهم=اللي بغضها والله المرضاني
احبنا من حبها واغليها=اللي غلاها حاكمن وجداني
حبٍ زرعه الله بقلبي ثابت=متسيدت قلبي وكل اركاني
سماح الطبوع الله يبارك فيها=ابل العرب من سالف الازماني
وعند المداحم حزت الميرادي=تلقا المجاهيم اول الذيداني
اللي لها مجدن قديم وحاضر=من اول و هي ناقة البدواني
عند الدواسر ساسها وال مره=اصيلتن ومرسست سيساني
تطبيعها سهلن على راعيها=وعسره على ضعيف العزم كسلاني
لاصاح راعيها وهي بالمفلا=قامت توحا وصرت الاذاني
وجاتك وتزهاها القلاده تشعف=قلب الهواوي تشعفه من داني
وعند النهاية الابل لراعيها=طبوعها ترجع على الرعياني
وختماها مسكٍ وطيب وعنبر=وختم الجزاله قاف ابن عرداني