::: مـنتدى قبيلـة الـدواسـر الـرسمي :::

هذي قصيده غزليه لشاعر الابل عيدان بن راجس الهوامله الدوسري كما اطلقو عليه اهل الخليج (وهو يستاهل)

وجودي وجود أمشرف(ن) في دهف ليلي

وحيد(ن) وجا له ديـرةٍ مابعـد جاهـا

ولا شاف شيٍ يعرفـه مـن الاماثيلـي

ولا عيّن أحد(ن) ينشده ويـن ممشاهـا

وهو بين مظهـار الكليبيـن وسهيلـي

وتاه الطريق وعزبته ناقـص(ن) ماهـا

وهبت عليه اللي تشيل الشجـر شيلـي

لواهيب قيض(ن) تحرق القشع رمضاها

تخيل شعوره ويش فيهـا مـن الويلـي

تخيل شعوري يـوم صـورت معناهـا

رعا الله من ياوي لحالـه ويـاوي لـي

ويلطف بروح(ن) لحها الوجد وأشقاهـا

تزايد غرامـي يـوم شفـت المداهيلـي

خلاًعقـب أهلهـا ماحيـاتٍ سماياهـا

منازل حبيبي جعلهـا جـارح السيلـي

أحب الديار اللي هوا البـال قـد جاهـا

أحبه وهـو يستاهـل الحـب بالحيلـي

صديـقٍ صـدوق(ن) كلمتـه ماتعداهـا

علـي يشهـد الله ياغلاهـا بتفصيلـي

كسا العمر كله وأشبع النفس وأرواهـا

محبـة وفـاً لـه ماعليهـا مداخيلـي

وزت في ضميري من سنين وحفظناهـا

شبيه المهات اللـي تـرب الغراميلـي

هنوف الجمال اليوسفـي فـي محياهـا

إلى جات تمشي كن فيهـا ونـا حيلـي

تجر القماش اللي زهـت بـه ويزهاهـا

مع الاشقر اللي يلحق الـردف ويميلـي

وإلى كدته عن مقدمـه يقصـر أرداهـا

مع المنحر اللي فيـه مثـل الفناجيلـي

مكاميـم فيهـا علـة النفـس ودواهـا

عليهـا معاليـق الضمايـر مغاليـلـي

وهو جاه شـر لا منعهـا ولا أصخاهـا

حبيبي تجمل ماحد(ن) يمـدح أبخيلـي

قضـا وقتنـا وآمالـنـا مالحقنـاهـا

ذبحنا رجـا غبـر السنيـن المقابيلـي

مغاميد غيبٍ ماحـد(ن) يفهـم أقصاهـا

طوت صفحة اللي يتعبـون المعاميلـي

وثنّت بنا وأركت علـى الكبـد شلفاهـا

ولا حيت كل أمشرف(ن) في دهف ليلي

يشوف المنازل ماحيـات(ن) سماياهـا

[/color][/color][/center][/font][/size]