شاش القصيد وناف في راس مشراف=كنه على راس الطويله نداوي
حر(ن) اليا جات المواقيف ينشاف=هدّه على الجزله يحول نحاوي
وانا على الغبّات ماحتاج مجداف=شاعر وفي بدع المثايل غناوي
الشعر جاله يالمناعير ميقاف=من شاعر(ن) في مدح ربعه هواوي
يامرحباً ترحيبة(ن) عد ماناف=اسم الدواسر في كبار الدعاوي
ويامرحباً ترحيبة(ن) عد ماطاف=بيت الله المصيون عبد(ن) رجاوي
الورد جاله في مجيكم تغرياف=كنّه على يمنى حداكم شفاوي
وادلالنا بالسلم والعرف تطاف=تستاهلون الطيب والعود جاوي
في محفل اللي بالفعايل له اهداف=جمع الدواسر له شفاة ومناوي
اللي على فعل المواجيب زهاف=رجل على فعل المراجل شقاوي
يامرحبا ياصلب ماضين الاسلاف=اللي لهم فعل(ن) على الطيب حاوي
المرجله بيت(ن) بسيسان وقاف=وافعالكم ساس(ن) يجمل وياوي
لجل القبيله صرتو عضود واكتاف=فيكم حمياً ماتخيّب هقاوي
في مامضى يوم الردي ماله لحاف=جداننا بالفعل سيف(ن) سطاوي
واليوم حنا والصعيبات ميلاف=نمشي على درب(ن) نزيه ونقاوي
يشهد لنا فعل قبل مدت(ن) طاف=نايف ويبرى للجروح ويداوي
يوم ان ابن عم(ن) لنا شاف ماعاف=ساقوا الدواسر له بسوق رهاوي
فعولنا يالابتي عدل وانصاف=ناقف ونفزع لاحدتنا البلاوي
حنا هل الفزعه ذرا كل من خاف=اهل الفخر واهل السطر والعزاوي
ولايجحد فعول الرياجيل عرّاف=كل القبايل صيتهم فالعلاوي
وصلاة ربي تختم الشعر والقاف=على نبي(ن) بعث بامر(ن) سماوي

وسلامتكم جميع ..