::: مـنتدى قبيلـة الـدواسـر الـرسمي :::

[align=center]


	بسم الله الرحمن الرحيم الشاعر / علوش بن هزاع الغرافين الدوسري مناسبة هذه القصائد ، أن الشاعر علوش بن هزاع الدوسري ، كان في رنية أكثر من سنة فأعجبته أخلاق وأفعال أهل رنية ، فشكر أهل رنية على أفعالهم الطيبة تجاهه ، فقال هذه القصيدة ، وقد قام عدة شعراء بالرد عليها . قال الشاعر علوش :[/

align]

مني على رنية واهلها سلامي = ما لاح براق وما غرد الطير
سلام يسجع به يتيم الحمامي = سلام احلى من حليب المغاتير
وادٍ اخصه بالسلام احترامي = على وجيه الخير فعالة الخير
وقت الجهل تروي شبات الحسامي = وتاخذ على خيل المناحر مشاوير
أهل الكرم ومتيهين الجهامي = ايضا وفيهم للشدايد مسامير
ذباحة لمدرحمات السماني = وحيل تجفا ما عليها معاذير
تلبس على تاج المراجل وسامي = اشهد شهادة حق ما هوب تعبير
اوجيه خير من قديمٍ وعامي = وبني لهم بيضا بروس المسابير
الهرج ذرب والسوالف جسامي = وماتحس في المجلس من الربع تقصير
والله لو ياخذ ثلاثين عامي = مستانس عند الوجيه المسافير
يا ابو جري لا جاك مني كلامي = احفظ وصاتي يا عشير الغناعير
بلغ سلامي للوجيه الكرامي = اللي لهم يوم السوالف مذاكير
دار عساها السيل قبل الصرامي = صيف وكنه من قنوف مزابير
آمين يا رب عظيم المقامي = تسقي بلاد مدهل للمناعير

البارحة قدام وقت المنامي = التيل دق وقلت يا الله عسى خير
ساعة رفعت التيل زاد اهتمامي = سمعت صوتا له بقلبي تقارير
رحبت برسالة عزيزا المقامي = ترحيب احلى من حليب المصاغير
اهلا عدد ماحج لله وصامي = برسالة اللي مدهل للمسايير
من لابة يوم الجهل والظلامي = من فعلهم تعتاش عوج الدناقير
ذيدانهم ترتع بنبت الوسامي = دواسر وقت الملاقى مغاوير
لا جاء نهار فيه شد الحزامي = تفرح ببن غفران جل المعاشير
واليوم مابه خوف امن وسلامي = والكل خشره في الشعيب وعلى البير
عسى المطر يسي الحثم والعدامي = من باب نجران إلى دمخ والنير
ويقرب لرنية من سكن في اللدامي = من شان ما نتعب لا رحنا مشاوير

ورد

بديت في رجم طويل وزامي = عجزت تجيه مشبكين الصقاقير
رجم تعلا فوق راسه عسامي = دايم تمره موميات المعاصير
ذكر علي اللي جديد وعامي = وكم بذ قبلي من رجال فواعير
هاضت على العين مدري علامي = وجانا كلام مثل وصف الدنانير
جانا ولد هزاع شيخ الجهامي = علوش شوق اللي حدوها الحجاجير
صيف وقيض وسط واد الحمامي = وشاف الرجال اللي تهز الطوابير
شيخ كريم ومن رجال عظامي = حرابهم يصبح على كبده الكير
يثني على رنية عزيز المقامي = تذكر الفصام في خطة السير
قد زارنا ابن هتيل زين الكلامي = يطلب على رنية نصوب مزابير
علوش هو معجبكم فعل الكرامي = تستاهل البيضاء برؤوس العثامير
تستاهلونه يالرجال الحشامي = ذباحة البل في السنين المعاسير
دواسر لجاء نهار الزحامي = تثنون عند مشرهفات المعاشير
وان جاء نهار فيه حايم وحامي = عاداتهم فك الجراما المصاغير
لامن زبنهم مجرم ما يضامي = حطوه في روس الهضاب المشاهير
وصلاة ربي عد وبل الغمامي = على الرسول اللي هدانا على الخير

وصل السلام ومرحبا بالسلامي = ترحيب احلى من حليب المصاغير
ينشر لابن غرفان قدر ومقامي = ونثني له الترحيب حشمه وتقدير
رجل حشيم ومن رجال حشامي = من روس قوم ينطحون الطوابير
جتنا القصيدة مع صدوق العلامي = ويحفظك ياعلوش وال المقادير
خصيت أهل رنية بلا ذكر اسامي = وتعيش يا مادح سبيع المشاهير
والصدق من عده عداه الملامي = و عديت ما واجهت ما قلت تزوير
وفاك ورثه من جدود وعمامي = من عزوة ترهي الشحم للمسايير
دواسر يثنون لا جاء الزحامي = ولضيوفهم ما حسبوا للمخاسير
يرعون بالسرفات نبت الوسامي = ما رددوها في حلول المحادير
كم ثوروا يوم الجهل من كتامي = وجابوا من الاجناب خلف ومعاشير
وادي الدواسر له حصون وحوامي = من دون حدانه سيوف بواتير
لعل يسقنه مزون الغمامي = يبادرنه بالمطر صبح واعصير
بحسناك يا محيي هميد العظامي = يا كاسي بالنبت بيض العثامير
تسقي الوطن كله جنوب وشامي = برجع ينسينا الليالي المعاسير
ولا عاد ننشد ويش سعر الطعامي = يقل ما يكثر به نخال واشعير
ذيداننا ترعى الورق في العدامي = متخالط فيه الزهر له نواوير
هذا هوى بالي وغاية مرامي = وما فيه عسر الا تقفاه تيسير
وصلوا على خير البشر في الختامي = نبينا اللي دلنا منهج الخير