اعذروها مـا لقـت فينـي سبيـل=واتركوهـا تعمـل اللـي تعمـلـه
وسامحوها لو قست في الطبع حيـل=صدمة ٍ جتهـا مـن اللـي تفعلـه
عـادة ٍ فيهـا لقـت فيهـا بديـل=عـن طبـاع العالميـن المجملـة
من صغرها تنتظر طلـع النخيـل=ولا استوى بالفاس طعـن ٍ توغلـه
ودّها تزرع ضيـا مـن بعـد ليـل=تجتمـع حولـه نـفـوس مأمّـلـة
ثمّ تطفـي شمعتـه بألفيـن سيـل=تتـرك العالـم وراهــا معلـلـة
ضايعيـن وتايهيـن بـلا دلـيـل=عندهـا تـفـرح وهــذا أوّلــه
تلحق السالـي ولا تتعـب رحيـل=ولا تعلّـق فـي هواهـا تثمـلـه
يشرب من السود عينيـن وجديـل=وتكبـر بعيـنـه ورود الأخيـلـة
ولا رفـع إيديـه مستسلـم ذليـل=وصارت دموعـه جنـود مجندلـة
وصار فيها هايـم ٍ أو قـل هبيـل=وصارت بأدنـى ابتسامـة تهبلـه
صارت اما هي تحطـه أو تشيـل=لعبـة ٍ بايديـن مـن لـه شايلـة
وكل إحساس ٍ سكـن قلبـه نبيـل=داستـه ببـرود قلـب ومهـزلـة
تنحتـه فـي دائـرة أو مستطيـل=زي صلصـال ٍ بيـدهـا تشكـلـه
غيّرت كـل الملامـح بـه غليـل=ولـو بيدهـا حتـى دينـه تبدلـه
خلتـه لا هـو جليـد ولا فتـيـل=بيـن بـرد وبيـن نـار مشعّـلـة
انتثـر لا فـي شمـاس ولا ظليـل=شـاف نجـم سهيـل عـز القايلـة
منكسـر ولهـان محتـار وهزيـل=تأسره مـن دون مـا هـي تعقلـه
ترسـم بعينـه جفاهـا مستحـيـل=ثـم يفضّـل راحتـه فـي معقلـه
ولا لقـت باقـي بأنفاسـه قلـيـل=وان هالمسكيـن قــرّب مقتـلـه
تنشـر الآمـال فـي روح القتيـل=ولا تـفـاءل بالأمـانـي تقتـلـه
ولا هـي اللـي تتركـه إلا عليـل=ولا بعـد هـذا بحـب ٍ تشمـلـه
ولو خذتها رحمـة ٍ بـه أو جميـل=يمكـن بأضعـف جـزا تتجاهلـه
هذا طبعا لـو لقـت غيـره مثيـل=تبتـدي باحلـى هـوى تستقبـلـه
شفتهـا مـن بعـد يبعدنـا طويـل=تقتـرب منـي بخطـوة عاجـلـة
واستوى حلمي مع الواقـع عديـل=قمـت اراجـع ذكرياتـي الأوّلـة
بس كان السحر فيهـا لـي بخيـل=مـا مهلنـي لـو قليـل اتمقّـلـه
له خذاني وشفت فيـه ألفيـن ويـل=هيّـج ببالـي مـئـات الأسئـلـة
كيف تجمع هالحلا من كـل جيـل؟=وكيف توصل بي بنظـرة للولـة؟
وكيف ذقت دلالها من دون هيـل؟=وكيف دسـت ظلالهـا المتحولـة؟
ليه اشوف ان الردى منها جزيـل؟=ولو هي تظلمنـي فتبقـى عادلـة!
والثقل منـي رخصتـه دون كيـل=ولجل ترضى كل واحـد بازعلـه
وصار شعري يطارد شفاهي بصهيل=كن صوتي خيـل حـرب مهمّلـة
قلت فيها كل ما فـي الحـب قيـل=ولـولا إيمانـي باقـول مكمّـلـة
وما صحيت إلا بإحسـاس أصيـل=كان خلّـي فـي حشـاي مأصّلـة
إن قلبـي مسلـم ٍ حبـه خلـيـل=مـا أخونـه لـو رقبتـي زايلـة
قامـت تجينـي بأسلـوب الدخيـل=وإن مطلبهـا حـلـول لمشكـلـة
وإن حمـل ٍ فـوق دنياهـا ثقيـل=وإن غربتـهـا مـعـاه تثـقّـلـه
ومـا نفعـهـا مشيـهـا زلـيـل=ولا شفـع لأقدامهـا المستنعـلـة
ويوم ذاقت صحوتي قامـت تسيـل=دمع حـزن ٍ مـا قـدرت أتحمّلـه
وبازدياد الصد بي صـارت تميـل=خصرها بأنـواع حسـن ٍ تحملـه
ويوم حست أن لـي خـل ٍ جميـل=أصبحـت كالنـار هـي متآكـلـة
ويا كثر مـا حاولـت فينـا تزيـل=عشقنـا أو ع الأقــل تخلخـلـه
عندها صبر الجمل في عـزم فيـل=والطرق من كل صنـف وشاكلـة
ويا كثر ما استخدمت قـال ٍ وقيـل=بيـن أهـل وصحبـة ٍ متفائـلـة
ويا كثر ما حاولت تدخـل عميـل=يصبح طرف فـي فتنـة ٍ متناقلـة
وبعد ما شافـت رجاهـا مستحيـل=والــدروب بوجهـهـا متقفـلـة
عوّدتْنـي طبعهـا وردي جهـيـل=لانـي مستـغـرب ولا متقبّـلـه
وعوّدوهافـي البحـار السلسبـيـل=ومـا درتْ أن البـرازخ فاصلـة