ياغانم اشتـر مـن جديـد المواطيـر=شاصً على كيف الغريـب الخـلاوي
لونه مع الأصبـاح كنـه نحـر طيـر=ولونه مع اتلى الليـل نجـم سمـاوي
ولون الخطوط اللى على الجنب ما غير=شفت هنوف من سقـا التـوت راوي
اليا مشـى كنـه ولـد شيـخ امغيـر=مصطول صفقه صفق سيل النحـاوي
لافـز تسمعلـه مـع القـاع تصفيـر=صر السوانـي فـوق بيـر قصـاوي
ولاوقف ماله من الوصـف تصويـر=الا كمـا وصـف العديـم الـنـداوي
صوت كفراته لونست شلعـت القيـر=كنه اعوى ذيبً مـن الجـوع طـاوي
وجلد التوايـر يجلـد الحيـد ويعيـر=رعـاد مـزن والبـرد منـه هـاوي
وحس المكينه لااستوت فـرت السيـر=صهيل صفـراً فـي رسنهـا تـلاوي
لـه مقـدم كنـه يقـود الطوابـيـر=او مثـل قبـع العسكـري الفـداوي
ماخذبـه اعيـال الجحلـط مشاويـر=ولا حملـوا حوضـه بجـحً حسـاوي
مـا ساقـه الا محتميـن المعاشـيـر=اهـل العـزاوي مخلفيـن الهقـاوي
هو علـة اللـى مابراسـه صعاطيـر=وهو طب من يونس على الكبـد لاوي
هو منوت اقلوب الزحـول المناعيـر=لكـن دونـه يقـصـرن المـنـاوي
يازين فوقـه لمشينـا بـه اعصيـر=مع خايـع مـاداج فيهـا الشـواوي
وسهيل بـان وطلعتـه مقـدم الخيـر=نجم مـع الغيـث المغيـث أمتخـاوي
والوسم جاله مـع أدخولـه تباشيـر=وذكر الحياء جتله أعلـوم وحـراوي
يـا الله بهمـال بصـوب المزابـيـر=نون سنا برقه مـع الغـرب ضـاوي
يسقي الديـار الممحـلات المداهيـر=اللـي ثراهـا فوقـه الـعـود ذاوي
وبل وصوتـه لسقـا القـاع تكبيـر=شهرين والما حايـر فـي المحـاوي
حتى غـدا روس الزبيـدي مشاهيـر=فوق الثراء يعمـي العيـون ويـداوي
ماكـنـه الا مقطـعـات الازاريــر=بصدور من يزهـن لبـس الغطـاوي
قفـر تعانقبـه اغصـون النـاويـر=الريـح طيـب ولـأم سالـم غنـاوي
والـروض بطرافـه تحـن المغاتيـر=وحيرانهـن يبرلـهـن بالخـطـاوي
ووقفت فحلهـن بينهـن كنـه النيـر=ولا عـقـيـدً دون داره حـمــاوي
ذي جنـة الدنيـا والأيــام تعبـيـر=ولا زينهـا ألا مقتفيـهـا بــلاوي
لو مانسج الرجل في الخبـت ونسيـر=ماعـاد نلقـى للوناسـه عــراوي
أقـنـوص والارايحـيـن مسايـيـر=صوب الرجـال أمزبنيـن الجـلاوي
ربـع لهـم حشمـه وقيمـه وتقديـر=مجلاسهم ماهـوب مجلـس قهـاوي
العـود الأزرق والـدلال المباهـيـر=ودثر الشحم فوق الصحون أمتسـاوي
(( دواسـر يـوم الحـرايـب بواتـيـر=ويوم الرخـا حبـلً متيـن رهـاوي ))
أصغارهـم يثنـون عنـد المضاهيـر=ستر العـذارى والدبـش والعـزاوي
وكبارهم مثـل الوحـوش الهواميـر=أسيوفهـم بيـن النحـر والـكـلاوي
وباقي القبايل نعم من غيـر تقصيـر=وكـلً ًعلـى فعلـه يعـد الحـكـاوي
غير النشاما ما يبـي القلـب تدويـر=في شوفهم يسـلا العليـل الشقـاوي
أسـج معهـم والليـالـي مقـاديـر=والعمـر مـره يالخفـوق السنـاوي
وش خانـت الدنيـا وجمـع الدنانيـر=وحنـا علينـا نـازع الـروح نـاوي