يالعين صيري دايم الـدوم تبكيـن =
على مدار أربع وعشريـن ساعـه =
أرثي لعمرٍ فـات وانعيـه يالعيـن=
وابكي على ما فاتنا مـن ُطماعـه =
اليوم كمّلتي مـن العمـر خمسيـن=
تلعبّـك اوهـام الغـرور ومتاعـه =
يا ما خدعنا الوقت بالمظهر الزين=
واليوم يا عينـي عرفنـا خداعـه =
ما ندري إن الوقت لُه باطنٍ شيـن=
الاّ بعـد مـا قـام يسقـط قناعـه =
وإن ما انتهزنا تالي العمر فالديـن=
والاّ خسرنا ما لنـا مـن بضاعـه =
باقي العمر في علـم رب الثقليـن=
تماكنـي تاليـه قبـل انقشـاعـه =
مع هجعة اوباش الملا لا تهجعيـن=
حيي الدجا ذكر وتوسـل وطاعـه =
اليا بقا ثلثٍ ومضـى منـه ثلثيـن=
وقـتٍ يربّـح باذريـن الزراعـه =
لا ناموا اللـي فالملـذات لاهيـن=
تضرعـي لله باكـف الضراعـه =
ويا الاذن في قول الخنا لا توحّيـن=
والذكر والنصح انصتي لاستماعـه =
اليا استمعتي للذكـر والصحيحيـن=
يصير عندك ضـد غيـره مناعـه =
ويا الرجل لوحيتي الندا لا توانيـن=
اليا دعا داعـي صـلاة الجماعـه =
ويا النفس مع درب الهوى لا تميلين=
بيعيه مثل اللي زهـد بـه وباعـه =
الخمسـة الاركـان لازم تلبـيـن=
بتوحيد واخلاص ويقيـن وقناعـه =
عسى بتالِ العمر ثقـل الموازيـن=
كود يتعوّض ما مضى من ضياعه=
سالين كنـا دايـم الـدوم حييـن=
ولا دامت الدنيـا لـراع الشفاعـه =
والأنبيـا والأوليـا والسلاطـيـن=
واهل المروة والكـرم والشجاعـه =
العبد مهما عمّر أحقـاب وسنيـن=
له ساعـةٍ فيهـا يطـوّى شراعـه =
يرحل وخلانـه وربعـه مقيميـن=
وتصير فرقا الشمل بعد اجتماعـه =
وصلوا على المبعوث جد الحسني=
ما نبت من نبتٍ وما ازهر طلاعه =