::: مـنتدى قبيلـة الـدواسـر الـرسمي ::: - أبيات مختارة أرجوا أن تنال إعجابكم.

- :: قسم الـشعر العــام :: (http://alduwaser.org/vb/forumdisplay.php?f=16)

- - أبيات مختارة أرجوا أن تنال إعجابكم. (http://alduwaser.org/vb/showthread.php?t=40477)

أبيات مختارة أرجوا أن تنال إعجابكم.

فكـرت بالدنيـا وبرّقـت بالحـال=وقلّبتهـا مابيـن عـدلٍ ومـايـل
جلسـت أفكـر وأتفكـر بالاحـوال=أجمـع وأفـرّق دقهّـا والجلايـل
في ساعةٍ مافيه مـن حولـي أزوال=إلا أنـا والنـار تشعـل شعـايـل
مركي على جال الجمر خمسة إدلال=الياقدح سناها مثـل بـرق المخايـل
وأخذت لي منهن على الكيف فنجال=يجلي همومٍ وسـط فكـري تشايـل
في صحصح ٍ مافيه حاسد وعـذّال=أهل القلـوب المبغضـات الغلايـل
في صحصح ٍ يطرد على بيـده ألال=قفرٍ خـلا مافيـه غيـر الهمايـل
أخذت أراجع ماعرفته مـن أمثـال=ماضي العلـوم موثّقـات الدلايـل
لقيت في دنيـاي مايزعـج البـال=ممّا يريب النفـس شفـت الهوايـل
سنّدت برقا نايف الرجـم والجـال=وزلت قدم رجلي برجـف وتهايـل
وطيتها شعبـان وحـزوم وجبـال=وسرّيتها مسري وصبـح وقوايـل
خاويت أنا رجال من الناس ورجال=ومال الرّخم ماكر على رأس طايـل
شفت الحصاني تعتلي روس الاقذال=والذيـب يمشـي يتقّـي بالمسايـل
والبوم له ماكر على رأس ما طـال=والحر ينزل بيـن قشـع وخمايـل
ضاعت مفاهيمٍِ عريضات وطـوال=فيها أختلف درب السنع والوسايـل
دنيا غريبة ماعرفنـا لهـا أشكـال=منها لبيب العقـل شـاف العلايـل
دنيا تقلّـب بيـن الاقفـاي وألاقبـال=ضاعت بها الحسبة بكـل المسايـل
كلّ غـدى للحـق ناقـض وفتّـال=من يوم صارت هرج قيل ٍ وقايـل
حتى الكرم شبّه مع النـاس بخبـال=والحق عند النـاس عدلـه تمايـل
منها نشف حالي غدى كنه اخـلال=هذي عظامي تحت ثوبـي نحايـل
ماكل من يلبس لـه اعقـال رجـال=ولا كل عسّافٍ يعسّـف الاصايـل
المرجلة ما هـي سواليّـف دجّـال=المرجلـة جـزمٍ وعـزم وفعايـل
والشور مايؤخذ من عقـول جهّـال=والحـق مايقبـل عليـه البـدايـل
أصد وجهي عن بعض شوف الانذال=وأقبل على راعي الوفـا والجمايـل
ماعاد لي رغبة ولا عنـدي اّمـال=ولاني من اللي للـردى هـد عايـل
لي رغبة وحده سجـود بالاصـال=أخّط لـي مسجـد وأصلـي نفايـل