تركي وانا خالك لو أدله بيومين=ماهيب والله منسيتني حنيني
قابلت من حبيت بسوق المودين =ومن دون ما اشعر عدت لي خطوتيني
معها ولدها ما بعـد تـم عاميـن=ويـوم ألمحتنـي فكتـه تحترينـي
ثم جت تخطّى مغرقٍ دمعها العيـن=ونا اجتلد من عبرةٍ فـي كنينـي
ويوم قربّت مني وعاينتها زيـن=حارت دموع الشوق فالحاجريني
قالت هلا ياشيخ كل البدارين=وحطت يديها الناعمه في يدينـي
كن الانامـل لامست للشراييـن=ومصيبتـي كبر الجبـل مرتينـي
قلت انتي الي ..؟ قالت الهرج بعدين=بـملى النظر من شوفتك ياضنينـي
كانك تحسب فراقنا له زمانيـن=عد السنين اللي غدت من سنيني
أسهر على ذكراك والنـاس ممسيـن=والخوف مـن سّو القدر معترينـي
والجرح فأقصى ضامري صار جرحين=من بعد ما وادعتنـي بسنتينـي
ماتدري ان عقوبة العين بالعيـن=هجرتني واليوم وينـك ووينـي ؟!
ما كن في قلبـك محنّه ولا ديـن=وتعبّرت وانـا العبـار تحدينـي
مالي جدا الا اخلص الدين بالديـن=وأمسح دموع عيونها براحتيني
وخانتني اعصابي من الوجد والبين=وقمت أرتعش من خافقٍ مبتليني
والصمت خيّم بعدهـا بيننا بيـن=وفجأه وقف مخلوق بينه وبينـي
يقول يكفي قفّلـن الدكاكيـن=وقفّت توادعني بصوتٍ حزينـي
تلحظ بعينٍ كنها عيـن شاهيـن=لحظة وداع وهلّت الدمع عيني
ومن يوم غابت صارت العشر ثنتين=حارالقدم والسوق يلتف فينـي
قلت آآآآه ياجرحن له سنين وسنين=قام يتعاظم لين طلّـع خزينـي
الله واكبر شـاعـر العسر واللين=وان شفت خلي ماأجمع الكلمتيني
أقفت وانا ماقلت لو كان حرفيـن=عجزت أعبّر شوق قلبـي بحينـي
من حبها اللي مال وزنه موازيـن=وأخفـي معالـم حبهـا لا يبينـي
أدرى عليها من كلام الحسودين=أهل الهروج العـوج والنيتينـي
لكن ماللحب بـاب وكواليـن=ماباقي الا انسا رضـا والدينـي
الله ولاشوفـة وفرقا المودين=أحلى وأمر أوقـات هاللحظتينـي
والله أن يبقى سنين فالقلب ودنيـن=وحبه يلازمنـي مـلازم قرينـي
وأنا ياخالك طحت لـي بيـن ناريـن=أجحد وأنا جمر الغلا يشتويني
وأن كان للحب المخّلد عناويـن=حبه كتبـه الله عـذاب بجبينـي
والله لو جنـّي جميـع المزايـيـن=لـموت ماخلصت فالحب دينـي!!