تكفا ترى تكفا تهزّ الرجاجيـل=لولا صروف الوقت ماقلت تكفا

اما لطمنا العيل والا الطم العيل=مادام شب النار مندوب الاطفا
من ذاق حر القايله يعشق الليل=ومن شب ضوه ليلة البرد يدفـا
امسيت في جيلٍ ولاهوب ذالجيل=واصبحت والا ديرتي شبه منفـا
واللي حما بيته بطيـرن ابابيـل=ماجيت ادور كل من صد وقفا
ولاجيت ابشحذ يانما دلّه وهيل=جيتك وجرح الظلم غاديه يشفا
جيتك بكلمه كنها صعقة الويل=ان قلت تكفا لاتهـاون بتكفـا
تكفا تراها كلمةٍ تقطم الحيـل=لابالله الا تنسف الحيـل نسفـا
تكفا ترا تكفا لها هدرة السيـل=في صدر حرٍ ينتف الطيب نتفـا
تكفا ترا تكفا لها تسّرج الخيـل=ان كان لك في مجمع الخيل عسفا
تكفا تراني من قرومٍ مشاكيـل=حماية الساقه بسيـفٍ وشلفـا
تكفا وتكفا ماتسـاق لمهابيـل=تكفا تخلّي القرم لاشٍ وهطفـا
تكفا ترى تكفا تهزّ الرجاجيـل=لولا صروف الوقت ماقلت تكفا

تكفى ترا تكفـى تهـز الرجاجيـل=ولولا ظروف الوقت ما قلت تكفـى
تكفى يا مزيد ما يبا العلم تفصيـل=المشكله كبرت على عماش تكفـى
ما قلت تكفى غير من فترة الحيـل=وانته ولد من يفعل الطيـب تكفـى
انخاك من كثـر العنـا والبهاذيـل=الفقر حطمني .. وانا ازريت تكفى
غديت مثل اللي برك ضامه الشيـل=تضحك بي ضعوف الرجاجيل تكفى
يومٍ لك وقفه .. وجاه .. ومداخيـل=ما نغتني عن مثل شـرواك تكفـى
افزع ترا وقتي غـدى كنـه الليـل=والعلم ما يخفـاك يالقـرم تكفـى
ما عاد بي شده ولا عاد بـي حيـل=ضدتني الايـام ... والقـلّ تكفـى
اروح وارجع ما حصلي محاصيـل=والرجل بادت .. يا فتى الجود تكفى
واليوم عندك يا رفيـق المشاكيـل=العذر ما ينفع وانـا قـول تكفـى
حيثك من اهل الطيب واهل المفاعيل=يا زبن من جاله ومن قـال تكفـى
الجيب فاضي .. واليالـي مقابيـل=عجزت اعيش مع الرجاجيل تكفـى
والراتب المحدود .. يروح تحويـل=من الاداره .. لاهل الديـن تكفـى
حتى عيالي ما قدرت الهـم الكيـل=والازمه لا جات .. صديـت تكفـى
ارجى الفرج والله يجيب التساهيـل=واعيش في راحه مع الناس تكفـى
والله كريم .. يبدل الحـال تبديـل=وما قلّ دلّ .. وصامل الهرج تكفـى