هلل وكبر يابطـل والعـن الخـوف=الخوف غارن مانجـا مـن لجابـه
في صفحتن سودا بقى رسم وحروف=للعـز مكتوبـه فـي غـزه كتابـه
العـز راس ولا لقينـا لـه كتـوف=والله يستـر لا يبـيـن صـوابـه
اسس لها شيخ شهيـدن ومعـروف=يالله عسى الهملول يسقـي ترابـه
تعاهدوا بالمـوت والعالـم تشـوف=وكلن على موتـه تسوقـه صبابـه
مير البلا لا صار شيبان وضعـوف=فـي بيوتهـم ماحركـو لـو ذبابـه
واطفال ترجي لقمتن تاصل الجـوف=وصياحهـم يمـلا الأماكـن كـأبـه
حول عليهم نار واهـوال وحتـوف=شقق بها صـدر الرضيـع وثيابـه
ترى الحروب اخلاق وسلوم وعروف=هي محزم الفارس وخيـرة زهابـه
وسكاتنا ياعـرب ماهـوب مألـوف=وبعض السكات تشوف فيه الأجابـه
محدن طلب منكم طوابير وصفـوف=ومحدن طلب منكم جيوشـن تجابـه
لأننا نعرف تعاندكـم ظـروف ...!!=وظروفكـم يـا للأسـف والغرابـه
معاهـدة سلـم ومواثيـق وحلـوف=لاواسفـا بالـقـدس لا واسفـابـه
اقلهـا مـدو يـد العـون وكفـوف=واصغ المسامع فـي قنيـب الذيابـه
فكوا حصارن قد حميتـوه بسيـوف=وسيوفكـم دونـه تـذود بصلابـه
لكن ياشجعـان غـزه ألا ..سـوف=يبيـن صبحـن ماغشتـه الضبابـه
وبدر الكرامه يكتمل مابـه كسـوف=وتكسر رماح فـي ظهـور القرابـه
لكن تحزم يابطـل وادفـن الخـوف=واركز على قبـره عظيـم النصابـه