::: مـنتدى قبيلـة الـدواسـر الـرسمي :::

ابيات وافية

تقدم الدنيا لنا درس جديد بكل يوم

والناس تسلم من غثا الدنيا بحفظ دروسها

وعلى حسب حفظ المواجيب وتعاليم السلوم

نعرف مقاسات البشر بالمرجله ونقوسها

صيت الرجال الوافيه بأفعالها ولاّ الرخوم

ينبيك عنها قل نفعتها وشين نفوسها

تطرد ورى الدنيا وتكشخ بالمواتر والهدوم

مثل الحريم أغلب دراهمها على ملبوسها

والامعه والشايب الكذاب وضعيف العزوم

ناس مع العالم بلا هيبه تدربي روسها

والبخل خلانه بهايم ولاتسام ولاتسوم

لاشفتها ترفع يدك حمد وشكر وتبوسها

على الصحن هم أول الجلاس وآخر من يقوم

يعيّفك حلو الاكل والشرب طول جلوسها

ماهيب للازم سند ولاذخر عند اللزوم

تموت ماسرك مهايطها وكثر فلوسها

وسوالف الخبلان رفعة ضغط وصداع وهموم

فلاوة تخطف علوم العرب وتحوسها

واجب عليك إليا حكت عن جملة حكاها تشوم

الهند مايراس حكومتها سوى هندوسها

وربع المصالح والمجامل خوة ماهيب دوم

اقولها والتجربه قطع وريدي موسها

وقت الرخا مثل الصقور اللي على المرقب تحوم

في يذري ساقك الرمضا وحر شموسها

واليا احتمت صكات بقعا وامست علومك علوم

اتلوي خششها وتجحد خوتك وتدوسها

من عقب ماانت الطيب وقدرك معزز ومحشوم

تصير اردى ماخلق ربي ودم ضروسها

ابعد عن الاشكال ذي بعد الثرى عن النجوم

وش حاجتك في قرب رديان العرب ونجوسها

ماهوب عيب ليا عزموك تقول يالربع معزوم

العيب لارحت لعزايمها وجيت عروسها

وخلك فطين تعلمك دنياك درس بكل يوم

والرجل يسلم من غثا الدنيا بحفظ دروسها

صح الله لسان شاعرها