ألا يا أهل العقول اللي تفتّح للعتاب أبواب=أنا في خاطري علم ٍ تراه معكّر مزاجي
يقولون البنات اليوم حبّوا واحد ٍ جذاب=وسيم وإسمه مهنّد دوا للقلب وعلاجي
ترا اللي يقهر العاقل ويقهر من وراه أشناب=بأنه واحد ٍ تركي ممثّل رهن الإنتاجي
وأنا بعلن عن أوصافي بكل الود والترحاب=ومن ترضى وتاخذني وتلبسني بعد تاجي
أنا ماني ترا مثله ولكني بعدني شاب=سعودي مبتعث وأدرس وربعي صوب الأفلاجي
وشعري أسود ولكن أفكر أصبغه لا شاب=وجسمي بس ما شاء الله طبيعي مابه احراجي
وعيني ما هي بزرقا ولا هو لونها عنّاب=بياض ٍ يعكس الطيبه وسواد ٍ يخفي أمواجي
أجي صافي على الفطره ولاني المدّعي الكذاب=سعودي عن بنات الغير قلبي شد مزلاجي
سعوديه وأنا سعودي لجل أكتب عليك كتاب=ولا قد قلت أبي هيفا وسلمى بنت قرطاجي
ترا مالك يا بنت الناس غير سعودي وما عاب=يعيب اللي تغنّج خلف هالشاشات دوّاجي
ولا يهمك يا بنت الناس ذاك التركي النصاب=يسمّونه مهنّد .. وش مهنّد لوما الإخراجي
وأنا لا من ذكرت إنه وسيم وأشقر وجذاب=يجيني الضغط ثم آقول يمه هاتي علاجي