سلام الله على المقفي سلام يتبعه مكتوب=كتاب ٍ ما حوى بسمه وقصيد ٍ كشّر أنيابه
نهاية خوّتك حانت فلا صاحب ولا مصحوب=على وضح النقا بكتب قراري خذ وش أسبابه
إذا ظنك أنا هين تريّث واسمع المندوب=كلام ٍ ياصلك مني شعاع الشمس لك جابه
ظلام الليل دهور بك وصوّر لك على المقلوب=كيان ٍ ما تبيّنته خسرته وطافك ركابه
تصوّرته تحت أمرك تحسب إنه معك مصلوب=تخيّلته مثل غيره يجي لك رافع ٍ كابه
فقدك اللي وضع حملك أنا شاطب منا مشطوب=وإذا خانك ظلام الليل ضوّي حيل شبّابه
صحيح إن القوي غالب ولكنّه معي مغلوب=وأنا ما أتبع هوى المقفي ولو عزّي على أبوابه
أنا وإن زادت جروحي وصرت من الفرح منهوب=وأشوف المقفي علاجي أبد ما أنشد جوابه
أنا ماني رهين الشوق لا غاب المقفّي نوب=أبد ما أنشد عن أحواله ولا أسأل عنه بغيابه
أنا حي ٍ مع الحيين لا غابو نشدت وجوب=وإلى طلّو علي أرحب خفوقي زاد ترحابه
أحد يبطي ولا جاني وذكره بالحشا مرغوب=وأحد يقفي بلا رجعه حشا ما قول ياسفابه
ترا ما يرخص الرجال غير إنه يغدا معيوب=يطارد من رخص قدره ويتبع كيف جنّابه
رفيع الشان من صغري عن المقفين أجر الثوب=خوي ٍ ما رفع قدري عساها للردى أطنابه
رفيع الشان من صغري ولا لي بالمقفي صوب=ردي ٍ ما عرف قدري ملاك الموت أولى به
وأنا في الحاضر الماضي عن العليا حشا ماتوب=أعانق شامخات العز شفني بأول كتابه
يمين المرجله يمناي إلى صار العلا مطلوب=أشمر عن ذراعي وأوصل المعنى إلى بابه
أتل المبتغى تلّت سحاب الخير للمسحوب=وأكب المنتهي كبّت قطوف التتن وهبابه
ألا يا جاهل ٍ قدري عساك أيقنت للمرغوب=فراق ٍ يحفظ العزّه ولا وصل ٍ به طلابه
وأنا راسي بقى مرفوع راس العز مو مضروب=فراقك يا بعد حيي فلا هزّه ولا عابه
فمان الله يالمقفي فمانه بآخر المكتوب=قصيد يوثّق الفرقى وحرف ٍ صحّت أنيابه