يابحر من للغريب اللي طوته همومه ؟!=فرّ من ضوضاء المدينة فآخر العصريّة
يابحر جالك سجين آهاته المكتومة=كلما وقّف أمامك حسّ بالحريّة
يابحر بالك مثل بعض العباد تلومه=خلّه يْفضفض عليك السيره الذاتيّة
الغريب اللي تغرّب عن ضناه وقومه=عزتي له كلما هبّت له الشرقيّة
واحدٍ من ضيقته ضاقت عليه هدومه=الدقيقة من ثقل وقته سنة هجريّة
الزمان يسوق من فوقه سواد غيومه=خايفٍ يغتال كلّ أحلامه الورديّة
والعباير حشرجت بالصوت في حلقومه=لو نطق كلمة : تفيض العبره المخفيّة
لكن بدمع الحزن شحّت عليه عزومه=وارتفع راسه وصدّ وفي ضميره كيّة
واتجه للقبلة وصلّى تحت ديمومة..=ركعتينٍ خاشعة وأجواء روحانيّة
ثم عوّد للمدينة ماشعر بهمومه=مامعه غير الشعر وأحلامه الورديّة