الله لا يجزاك بالخيـر.. يا بوش=ورطتنا في حرب صدام ورطة
عزمتني.. تقول بترول واقروش=بس الحقيقة روحتي معك غلطة

يا بلير ردّ العلم عن بوش بن بوش=الله خلقنا للمقاريـد سلطة
وابوي عنده للرياجيل دنبوش=كم واحدٍ .. شلنا فلوسه ونفطه

أبوك والنعمين .. مير انت مربوش=تموت بالنفط وتحبّ شفطه
صحيح عندك مال وسلاح وجيوش=مير اتوقّع لك .. تدهور وسقطة

يابلير كانك خفت بوم احتمى الهوش=حرام.. ماتاخذ من النفط نقطة
قبلك.. ترى (شيراك) قد راح مكروش=شوفه.. يصـرّح كلّ يوم بمحطّة

وراك.. ماتعطي لشيراك.. عرموش=تراه مشغلنـا.. بشيـله وحطّـه
واليا انتهى موضوعنا.. نرسل اطورش=ونجمع المبلـغ من الربع قطّه

شيراك هذا عنده الفكر.. مغشوش=فرط علي في مجلس الامن فرطه
يـدزّه اليـابـان والصيـن.. ويطوش=ومجهّـز (الفيتو).. لتحقيق الشرطه

يابوش.. انا مرهق وخايف ومدهوش=وانته تقـول الحرب خدعه وخطّه
أسرّاي واسرّاك.. امتلى منهم الحوش=عزّ الله انّه صابني منك جلطه

ما قلت لك كم فيه اذاعات ودشوش=لاتكشف المعنـى.. وانا اقول غطّه
وان قالوا انّا (علوج),واصحابنا جحوش=ماهمنا (الصحّـاف) واللي يحطه