انتم حباريكم تخافق بالاقفار=وحنا حبارينا السمك يالسنافي
وبايمانكم شقر سريعات الاطيار=والكل منهن ماضي الفعل وافي
ذكرتني يامير واصبحت محتار=وجاوبت خلج البل حم الشعافي
وذكرت طيب ايامنا سر وجهار=يوم الردي في نومة العصر غافي
مذكور يا نايف ذرا الضيف ومجار=ذكراك في قلب براه الولافي
قلب عن الشدات يامير صبار=ان صد عن طيب الثنا كل هافي

يا خال روحتوا لنا ستة اسطار=فاع المعاني كملتها القوافي
مثايل يختارها كل محتار=مثل الرعاف بجيد ظبي الكشافي
حييت فيها والتحية لها كار=ما غرد القمري بروس الخوافي
ليتك خوي لي الى شبة النار=في مربخ من وقدة الرمث دافي
نبته جديد ما طلع فيه نوار=سقاه مامور من الوسم ضافي
ممطور أمس ولا مشى فيه دوار=فيه الحباري مقبلات مقافي
اشيل فرخ واسهن وقع وطيار=وعلى يسارك اشقر الريش صافي
هذا عدو الخرب للريش نثار=وهذا الى طلع على الجو شافي
ما كدر الخاطر طويلات وقصار=هروج هزيلة من رجال ضعافي
من لابة يردون صعبات الاخطار=ما والفوا نوم الصفر والعوافي
نقضي لنا وقت وندفن لنا اسرار=الصبر زين وخير الأيام تافي
عاداتنا نقصر طويلات الاشبار=وعدونا نسقيه سم زعافي
الى عطل الواجب من الناس حبار=نارد ولو ان الموارد عيافي
نارد حياض وردها حامي حار=وبيماننا مصقلات رهافي
لعيون تلع سوقهن ما بعد بار=حديثهن لمجرح القلب شافي

المشاركة الأصلية كتبت بواسطة مبارك الخييلي (المشاركة 243941) الامبراطور لاهنت لهذه الأبيات الجميلات تقبل الشكر والتقدير

المشاركة الأصلية كتبت بواسطة دوسري مطنوخ (المشاركة 243970) الامبراطــــــــــــــــور الله يعطيك العافيه ... وبيض الله وجهك ...على نقل هذه المساجله وأصبر علي ودي اهجيك بس مهب ذلحين :17: تقبل مروري يالقرم.... مطنــــــــــــوخ

المشاركة الأصلية كتبت بواسطة ابو المثنى التركي (المشاركة 244012) الله يعطيك العافيه ... وبيض الله وجهك ...على نقل هذه المساجله