يازين فعلا يا الدواسر فعلتوه = فعلا سبقتوا فيه كل القبائل
حتى لو ان الناس بعدين سووه = انتم هله من قبل وانتم لاوائل
قلتوا كلاما للضيوف وحميتوه = وعاداتكم بالضيف فعل الجمايل
يوم المزاين بينكم ما احتكرتوه = ماعودوا ضيفانكم بالفشايل
من كان معه مشاركه مامنعتوه = ماقيل ذا واجد وذولي قلايل
بينتوا العلم الجميل ورفعتوه = للي يحسب دقها والجلايل
تستاهلون الطيب ياالي عملتوه = ويفوز بالطالات من كان طايل
ماهمكم مال العناء لو جمعتوه = ماباقي إلا الفعل والمال زايل
هذا طريقا للنشامى رسمتوه = الا الذي سلمه عن الطيب مايل
قررتوا الدرب الصحيح وفرضتوه = مثل القلايد في رقاب الأصايل