يا باغي مني وصيه باوصيه=مختارها من كل معنى ٍ جزيلي
وصيةٍ فيها نصيحه وتنبيه=ميزانها عند العوارف ثقيلي
يحتاجها اللي بيّن العلم خافيه=صغير سن وتو عرفه قليلي
ولا كبير السن رايه ممشيه=تلقاه لا اصحاب المعرفه عميلي
اما مجرب والتجارب تكفيه=ولا فهم درس الحياة الطويلي
وان كان لا هاذي ولا ذي توعيه=لو تنصحه ما للنصيحه ذبيلي
هذا ويامن منهج القول ناصيه=صبرك على الايام صبر ٍ جميلي
الدين الاول لازم انك اتبديه=تراقب الله في نهار ٍ وليلي
تطيع كل امره وتترك نواهيه=وسنة نبيه دونها لا تميلي
وفي ما يخصك في حياتك وتبغيه=مقيم مير احسب حساب الرحيلي
يا كم قوي ٍ مامهلت له لياليه=ويا كم سقيم ٍ عاش لو هو عليلي
ما احدٍ بياخذ رغبة النفس بيـديه=الله هو اللي للعطايا كفيلي
اخذ الحذر من دور وقتك وما فيه=واخذ الحذر مالناس واحذر تعيلي
حنا بوقتٍ كاثراتٍ دعاويه=حطت به العالم دقيق وجليلي
لا ترافق الا طيبٍ ينوثق فيه=والنذل حذرى لا تحطه خليلي
واللي يجي به شبهةٍ لا تباريه=وان حل دار ٍ لا تجي له نزيلي
واللي وسيع ٍ مذهبه في مساعيه=تجنبه لا تمسكه بالشليلي
وان شفت عيبٍ فالعرب لا تراعيه=اعرض ولا لك في سنعهم سبيلي
راع المثل قد قال لك في معانيه=منتب على ذرية ادم وكيلي
ولسانك احذر وانتبه لا تخليه=باعراض خلق الله يحط ويشيلي
وسرك بعد حذرى تظايق وتفضيه=ويظايق اهل الهرج واهل النقيلي
لا تلحق اللي ذاع سرك مشاريه=انت السبب مالك خصيم ٍ قبيلي
وان شفت خبل ٍ ظايع ٍ لا تقاصيه=قل له تراك اللي كلامك دليلي
لا صار عقله للسنع ما يقديه=مالك ورى كثر المجادل حصيلي
ورفيقك اللي ذاخر ٍ لك حسانيه=تراه كنز ٍ مالجنسه مثيلي
اصبر على مره على شان حاليه=درع ٍ تماري به وحدٍ صقيلي
وان كان سوه كل ما مات يحييه=فلا تقول اليوم يا عزتيلي
حبل الصله لا بان لك مع مثـانيه=جذه وقل ياحبل لا تلتويلي
عف ديرة وانزح ولا تجيب طاريه=القرب يبعد والعلاقه تزيلي
كلٍ بخير وربنا اليوم مغنـيه=في نعمةٍ فيها يجود البخيلي
تم الكلام وكل غالي باوصيه=مختارها من كل معنى ٍ جزيلي

صح السانك يابو محسن
قصيده أكثر من رائعه
لأنها من رائع
وفقك الله والجميع
تقبل مروري ،،،