اما لطمنا العيل والا الطم العيل=مادام شب النار مندوب الاطفا
من ذاق حر القايله يعشق الليل=ومن شب ضوه ليلة البرد يدفا
امسيت في جيلٍ ولا هوب ذالجيل=واصبحت والا ديرتي شبه منفا
واللي حما بيته بطير(ن) ابابيل=ماجيت ادور كل من صد وقفا
ولاجيت ابشحذ يانما دلّه وهيل=جيتك وجرح الظلم غاديه يشفا
جيتك بكلمه كنها صعقة الويل=ان قلت تكفا لا تهاون بتكفا
تكفا تراها كلمةٍ تقطم الحيل=لا بالله الا تنسف الحيل نسفا
تكفا ترا تكفا لها هدرة السيل=في صدر حرٍ ينتف الطيب نتفا
تكفا ترا تكفا لها تسّرج الخيل=ان كان لك في مجمع الخيل عسفا
تكفا تراني من قرومٍ مشاكيل=حماية الساقة بسيفٍ وشلفا
تكفا وتكفا ما تساق لمهابيل=تكفا تخلّي القرم لاشٍ وهطفا
تكفا ترى تكفا تهزّ الرجاجيل=لولا صروف الوقت ماقلت تكفا