شموع (الثلاثين) احترق شمعدانها=وطفّتهن رْياح الكروب وزمانها
تبقّى طموحٍ يشتعل لي ورا الأفق=أحثّ القدم صوبه لو الحظ خانها
فلا أهنى براحة لين أوقّف ركايبي=على منهل مْياهه... أو أفنى لشانها
أنا أدرك مدى ضعف البشر من تجاربي=وأنا أدرك مكارم ربّنا كان أعانها
وأنا أعرف مدى قوة سلاحي وقيمته=يجنّب هزايلها ويقنص سمانها
لقد عِشتُ دهراً في لهيبِ كوارثٍ=فأُوصِلْتُ من فضلِ الكريمِ جِنانها
أحاديث الألسن ماتثبّط عزيمتي=ولو يحتشد لي (قيسها) مع (يمانها)
تهبّ العواصف هوج من كلّ ناحية=( والأهرام) ماراحت شبر من مكانها
(فلستُ أُبالي حين أُقتلُ مسلماً=على أي جنبٍ ) تخترقني سنانها
عفا الله عن قومِ تدوّر مثالبي=إذا غبت.. وألا أن جيت : تبلع لسانها
عليهم سلام الله كثر ماأعشق القمم=وكثر مايحبّون السفوح وطمانها
إذا أرضيت ربي ثم كسّابة الثنا=فتزعل علي الأقزام..مالي وشانها ؟!!
وأنا كلّ مختالٍ فخورٍ ما أواطنه=ولكن عزيز النفس يأبى هوانها
(طواويس فارس) لو تبختر وتنتفش=من أرياشها شبّ الحطب ( موبذانها)
والإنسان نطفة ثم جيفة تحت ثرى=على ويش نفسه يعجبه عنفوانها ؟!!
إذا المرء ماسخّر حياته لخالقه=وساقه من أوحال المناقيد صانها
فهو في الجهالة والحماقة (هبنّقة)=ولويملك الدنيا ويقبض عنانها
إذا الناس تاهت عن سنا مشعل الهدى=فياطيب معزاها وياطيب ضانها
أياناشدٍ عني وش أسباب غربتي!=عطيتك تفاصيل العلوم وضمانها
وإذا كان تنشد عن زماني وطعنته=فهي عانها بين المعاليق عانها !
لكن (قيس) لامنّك لقيته فخبّره=عن علوم (ليلى) والعذارى اوزانها
إذا (العامريّة) بينهن راهنت علي=فبإذن الله أن تفرح وتكسب رهانها
وإذا ماقسمه الله ولاجبتنا الذهب=(فالأهرام) ماراحت شبر من مكانها