::: مـنتدى قبيلـة الـدواسـر الـرسمي ::: - قصيده مهداه لرئيس مركز آل بريك

- :: قسم قصايد مدح وفخـر في الــدواسـر :: (https://alduwaser.org/vb/forumdisplay.php?f=37)

- - قصيده مهداه لرئيس مركز آل بريك (https://alduwaser.org/vb/showthread.php?t=32829)

قصيده مهداه لرئيس مركز آل بريك

بسم الله الرحمن الرحيم

هذه قصيده مهداه للشيخ الفاضل / بداح بن ناصر بن الزقروط آل بريك الدوسري

بعد صدور الامر السامي من أمارةً منطقة الرياض والقاضي بتعين الشيخ( بداح )

رئيساً بالمرتبه ( التاسعه ) لمركز آل بريك ( بوادي برك )

قبل الجواب وقبل مبدا الكلامي= أبدا بذكر اللي للأرواح خلاق
رب البشر محيي هشيم العظامي= ولا جال بيديه الكريمه ولا رزاق
وبعده صفا جوي وزاد انسجامي= واخترت من جزل التعابير ما لاق
في مدح شبلٍ له مكان ومقامي= عندي عزيز وتفتخر فيه الارفاق
بداح ابن ناصر عشير الحشامي= المستنير اللي على الطيب سبّاق
متسيّد طيب النباء بالتمامي= مسطور راسٍ للصعيبات عشاق
شهمٍ كريم وفي اللوازم احزامي= وللخير مفتاحٍ وللشر مغلاق
عينه ورى ربعه بعيد المرامي= ونفسه على كسب الجمالات تشتاق
طيبه سرى ما بين خال وعمامي= والطيب لحفاد المشاهير لحّاق
متميّزٍ من بين كل الأسامي= دينٍ وعرف وجملة أوصاف وأخلاق
سعد الرفيق اليا جفاه المنامي= واونس بصدره والمعاليق دقّاق
يلفي لبيتٍ للنشاما مرامي= نوره ينادي للمسايير شعّاق
بيتٍ على الطولات والعز قامي= ساسه حجر ما هوب توّه تلفّاق
ويزيل همك لا بديت السلامي= وعرضت موضوعك على بيض الأوراق
ابشر بمن يجلا العمس والملامي= لاناشتك دورات الأيام برهاق
هذاك أبو ناصر كبير المقامي= رجال عرف وله مع العرف ميثاق
له مع هل الطولات راس السنامي= قدرن لمن حاش الثنا جل
نزف له بشرى السعد والعلامي= روايعٍ لمعرّب الساس تنساق
سمعت علم وشد كل اهتمامي= قالو ترشح قلت من طيب الاوفاق
يستاهل المنصب ويزها الوسامي= كلمة امحبٍ ماب قوله تدراق
زاد انشراحي والكلام استقامي= ومشاعري قامت تدفق تدفّاق
للعز يا راسٍ تحب النظامي= سيرتك في حب الوطن تشرق اشراق
مخلص ولك عند الجميع احترامي= ولولا الفعايل ما برز كل تفَّاق
وخدمة هل العوجاء حماة الجهامي= مطلب هل العادات زاكين الاعراق
كلٍّ على الواجب سريع الولامي= ما يقبلون التفرقه والتصلفاق
والمملكة بين الدول ما تضامي= ما دام أبو متعب سكنها بالاعماق
اسس لها مجدٍ عظيمٍ وسامي= وخلا علمها فوق الاعلام خفاق
وسلطان ليث وفي المواقف اعصامي= سور البلاد اليا غدر كل بواق
على الخطر يمضي وصفه الأمامي= ويمناه تبذل كنها الغيث لنساق
ونايف كما الحر العديم القطامي= مضراب كفه مدميٍ روس واشناق
خصمه عليه افراح وقته حرامي= وتضيق به كل الفيافي والآفاق
وسلمان من جوده تجود الكرامي= دايم وهو لمعانق المجد توّاق
نور الرياض اللي يزيح الظلامي= بدرٍٍٍٍٍٍ سطع نوره معا وقت الاشفاق
نجدٍ واهلها تعتزي به اشمامي= ومن دونها يقصر طويلات الاعناق
ارمي بمدحي واستند في كلامي= ويجوز في مدح الرجال التعمّاق
روايعٍ فيها هواي وغرامي= ذوقي وكلٍّ له مفاهيم واذواق
وعلى النبي مني صلاة وسلامي = ما لاح فالغر المراويح برّاق

وســــــــــــــلا مــــــتــــــــكــــــــــم

الشاعر / محمد بن سعود بن عايض آل بريك الدوسري