يالله المعبود ياخالقٍ كل البشر=ياالهٍ نعبده خالقٍ ليل ونهار
ياالهٍ للخطايا وللذنب ايغفر=غافرٍ ذنوب خلقه ولو انها اكبار
منجيٍ يونس من اهوال وامواج البحر=رافعٍ سبعٍ بليا عمد مجري البحار
انصر الاسلام واهله على منهو كفر =ومن يسب الدين يالله عساهم للدمار
واحفظ ابلادن بها الدين والأمن انتشر=دولةٍ فيها العدالة وحكم الشرع صار
تحت حكم القايد اللي بحكمه نفتخر=ابو متعب عزنا قادها بكل افتخار
بالشجاعة والسياسة على الاعداء انتصر=والدول من هيبته تخضع اليا اصدر قرار
آل مقرن نصرة الدين لاحل القشر=هم حماة الدين والدار لاثار الغبار
للملك نعلن ولانا على طول الدهر=الولاء وحماية الدار هي النا شعار
والله انا حاضرين ليا حل الخطر =جاهزين بالذخاير لامن الحرب ثار
استعد القاف عندي وحضرت الفكر =واتخير في البيوت الجزيلات الغزار
للمثايل في ضميري مداهيل ومقر=اقطف جزال المعاني كما قطف الثمار
قلت ابشارك نهار المزاين وافتخر=في نهارٍ العرب جات من كل الديار
مرحبا باللي حضر عد مابان القمر=وعد من لبى وكبر ومن للبيت زار
مرحبابك يابو فيصل عدد نبت الزهر=ياشجاعٍ تفعل الطيب لك في المجد كار
ابو فيصل فزعة اللي شكى هم وقهر=واشهد انه فزعة اللي عليه الوقت جار
كم فقيرٍ جاه ثم اغتنى عقب الفقر=اشهد انه للمراجل وفعل الطيب سار
شجع البل كاسب الجود بالطيب اشتهر=ليت ابوكم حي ويشوف عقبه ويش صار
طيبكم ياسيدي شاملٍ بدو وحضر=الله انه يعزكم ياطويلين الاعمار الاعمار
وابو ناصر كاسب الجود قرمٍ ينذكر=نذكره لامن حدانا الزمن والخل بار
والله انك في الشدايد نشد بك الظهر=ياكريمٍ تفعل الطيب في وقت العسار
ولا نسينا طيب حرٍ على العليا شهر=ذاك خالد يبذل اجهوده بكل اقتدار
وعاش من سوى المزاين ومن جيبه خسر=والجوايز حطها شاملة دون اختصار
انت يابن غنيم تدعم ولك منا الشكر=ياكريمٍ ماعلى طيبك وجودك اغبار
من قديم البل لها امجاد وعلوم وفخر =وخصها الرحمن بالذكر لاجل الاعتبار
من قديم اثمانها السيف والدم الحمر=كم شجاعٍ راح من دونها فوق المهار
اشهد ان اللي ملكها لقى خير وتجر=هي عطايا الله وهي الحسينات الخيار
ودي اوصف بعضها بوصفٍ مختصر=حيث للبل عندنا ياعرب قدر ووقار
في المزاين شفت سودٍ يحير بها الفكر=والله انه غايتي شوف زينات البكار
البكار اللي لها خشوم ووساع النحر=والاذاني حداد ويضا مهادلها كبار
غايتي سادا سناد ومفهوقة ظهر=لامشت كنها تعاين الجولن يوم طار
نيها من عازها مايجي طوله شبر=وركها من برجمتها يجي عشرة اشبار
وافية في الطول والعرض وتشوق النظر=والمواطي يوم تشلعبها عسمن كبار
رشحواها من لوايل وهي قبل تحضر=وجالت الأنظار معها وراع الصنف حار
ويوم فازت قام اهلها يحذفون الغتر=وكل عاقل صابه اهبال وبه الدم فار
جعل يسقي دارها من هماليل المطر=لين ترعى في فياضٍ كساها الله خضار
وزين والله شوفها وسط ريضانٍ خضر=نبتها اخزامى ونفل وارضها ارضٍ زبار