ابتدي باذكار ربي آله العالمين= خالق(ن) ماكان وحده ولله الدوام
جلّ شانه دايم الدوم لجله ساجدين= نرتجي عفوه بيوم(ن) لنا فيه ازدحام
يوم هولات البصر والخلايق موقنين= ومن يقدم بالحساني لقا فيها السلام
وانثني بالقاف للي لهم فعل(ن) حسين= يوم قافي يستوي لي على مدح الكرام
كل قول(ن) ساسه الفعل له حبل(ن) متين=يعتلي بالعز مبناه ما جاه الهدام
لابتي غيث(ن) تنشى من الغربي رزين= بارقه لمع الهنادي اليا جا الاحتدام
لااستهاج وهاج صوته برعاده دنين= يشلع الروس العنيده ويجلى للعسام
لا انهمل بالغيث سيله عقب ماهو محين=يستظيق الضلع منّه ويصفق بارتطام
لاانتحا يصفق بجاله وغادي له عكين=كل ضلع(ن) زام طوله عليه السيل طام
من مقاديم السعد جاك وعلاج الحزين =الفرج عقب الدهر فيه غادي له علام
يروي الظامي ويجلى عطش غبر السنين=وتنجلي به كل كبد(ن) مغطيها الكدام
وينفرج به كل دمع(ن) بمحجر كل عين=الفرج عقب السهر يوم حاربها المنام
وتنطلق كل كفّن حداها الوقت شين= قصرّوها مبعدين الهقاوي بالسهام
ويعتلي به كل منهو بحرّابه غبين=يعتلي بالطايله فوق رايات العدام
ويرتقي به كل منهو لجا صوبه زبين= من دخل به قام لعداه يصفق بالبهام
الدواسر مجدهم كاتبينه باليدين=حبره الدم الحمر يوم وقفات الزحام
لآدزايد مضرب العز حامين العرين= ولآد تغلب منبع الجود عآقات الخصام
يوم جول الخيل والرمح والسيف السنين=واشهب البارود عجه يثوّر له كدام
والعزاوي والهقاوي وروغات الذهين= والمناوي حدها السيف من دون الكلام
لا اعتلو من فوق صفر(ن) عليها مسرجين= واردفو من فوق جيش(ن) يبوج(ن) الظلام
واستوت وحده ولا عاد فيها خيرتين= يوم خيرات الذليل الحياه ولو يظام
نارد الموت المحتم وجينا مقبلين=نارده يوم الحرايب مثل ورد الحيام
كسبنا يوم الحرايب من الكسب الثمين= القلايع والخزايز لنا يوم اللحام
ريشه الشعلان كسب(ن) من سيوف اليمين=جابها اللي بالفعايل رقا فوق المقام
مع ربوع(ن) لا استهاجت وجاوك واردين= كل جمعن قد نطحهم يجي فيه انقسام
كم طريح(ن) بالهنادي لكبده شالعين= قام عج الخيل فالقاع يبرمه ابترام
وكم صويبن ينزف الدم واضحى كاسرين= مانفع طب المداوي ولو عشرين عام
وحن سناد اللي من الحيف ما عيّن زبين= نعتلي به ويتعلاّ الى حد الغمام
يوم جا ابن مطرّف(ن) ثم قفاه اللي ظمين= الشريف بعدته كملوها بالتمام
حولو به لابتي فاللقا متسابقين= ثم رغا من عقب ما هوب غادي له رزام
لين كد القاع وامسى على قوزه دفين=واستمت باسم الآسامي على من كان هام
وفي ثرانا يشبعّن الضواري مطعمين= وفي ثرانا كل طير(ن) على العدوان حام
يشهد جريس اليماني وحنّا المحتمين = ما نعينه من طليبه وربعي له حزام
يستظّل بظل رمح(ن) يظل الخايفين= ويتذرا في ذرا السيف قصّام العظام
وقد شهد بالفعل برك(ن) وحنا خابرين= يوم ابن بدران للحرب قاده واستقام
نثني نمنع ونارد وحنا قادمين= لين نروي حربه السيف من كبد الخصام
وكل فعل(ن) قد ذكرته على ساس(ن) متين=يشهد التاريخ دايم وهو خير احتكام
والقبايل وافيه بالوفا طول السنين= مانغط فعول منهم على العليا كرام
والصلاه ختام قولي عدد مر السنين= للرسول اللي بهديه جلى عنا الظلام

الدواسـر مجدهـم كاتبيـنـه باليـديـن = حبره الدم الحمـر يـوم وقفـات الزحـام
لآدزايد مضـرب العـز حاميـن العريـن= ولآد تغلب منبع الجـود عآقـات الخصـام