أنتحت شمس العصر واقترب منها الحمار= واكتسا شرق الفضا من ظلام الليل لون
وانتهض وجه الشفق وستحى وجه النهار=لحظةٍ قبل التحول تجي حالة سكون
ساعةٍ فيها ضيا الشمس عاش الاحتضار=والفضا من كبر حجمه بعيني ويش يـكون
وقفت رجلي على الدار ورسوم الآثار=ليتني ما جيت من حيث كانوا ينزلون
آه يا ذكرى الليالي وخالية الديار=اصعب اللحظات ذكرى تفراق الضعون
انكتب لي من شقى الوقت لوعه وانكسار=وانحبس دم المعاليق من هيض الشجون
احرجتني عبرة حشرجت تحت الزرار=وارتوى كبد الثرى من ينابيع الجفون
في دروب الحب ما ينفع القلب اعتذار=تكتب الاحكام والحبر من دم الطعون
اعتراض الحكم ما يمنحه رد اعتبار=حجة القاضي يقولون مالا يفعلون
دامني مسرج خيالي على صفر المهار=باتذكر وصل لاماك يالغض الحنون
وأتخيل شوف لقياك عقب الانتظار=نظرة فيها تخاف العيون من العيون
الجمر والثلج والليل مسدول الستار=والتعاج البرق لالاح في غر المزون
واستوى وجه القمر في مداره وستدار=وانجلا نو السماورتوت خضر الغصون
كن عيوني تكتب أحروف الاسما باختصار=وانت تقرا داخل النون حرف العين نون
ارتهيت من الحلا ستر جلباب الوقار=كنك اتخاطب هل الذوق بالله وش تــــبون
مدلي كيف من البن في لونه شقار=أسعد اللحظات مدة يمين اللي يمون
لاعتبر ما بين الاضلاع له دار ومزار=وشيدت لا جله عمارات وقلاع وحصون