الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة . - ::: مـنتدى قبيلـة الـدواسـر الـرسمي :::

العودة   ::: مـنتدى قبيلـة الـدواسـر الـرسمي ::: > :::. الأقســــام الـخــــاصـــــة.::: > :: قسم اللقــاءات والفعاليات والتغطيات الخاصة::

إضافة رد
انشر الموضوع
 
أدوات الموضوع انواع عرض الموضوع
قديم 08-04-2010, 02:29 PM   #1
 
إحصائية العضو







الإداره غير متصل

الإداره is on a distinguished road


:e-e-4-:. الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .




الحمد لله رب العالمين والصلاة والسلام على سيد الانبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته الى يوم الدين

إخواننا أعضاء وزوّار الموقع الرسمي لقبيلة الدواسر






يسرنا في هذا اليوم أن نقدم لكم هذا اللقاء الخاص والحصري للموقع الرسمي لقبيلة الدواسر مع أحد شعراء قبيلة الدواسر وأحد شعراء الموقع البارزين والمتميزين والمعاصرين للموقع منذ بدايته ومن أوائل الذين شجعوه مسيرة الموقع.


شاعر صاحب مواقف طيبه مع قبيلته ، وقد لاقى من الإشادات الكثير على جميع مشاركاته وهذا دليل أن الشاعر إستطاع أن يلامس متطلبات متذوقي الشعر الحقيقي وهذا هو الشاعر حقاً .

والي قال فيه الشاعر: ماجد المهنا



ياليت عازتنا مع أبن رشود ياصالح=ماكان نفس العزيز أتذل وأتهاني

جعله بعد خلفة الأجواد والطالح=واللي يواعد كذا مره وينساني

رجال شهمٍ سنافي كايد وفالح=ريف الخوي مكرم الضيفان والعاني

يجود ويمد القراح زيزرط المالح=كله لعينى بني عمه كحيلاني




وقال فيه الشاعر:حسن بن محمد بن بطحيه الودعاني



ياحروف الشعر بالله هلي وأقربي=ودي أكتب ماتيسر وأعبر بأختصار

في كريمٍ من كرامٍ عريب المنسبي=سيد من سادة القوم له صيتٍ وكار

منذر بن رشود لاعدت أفعال الصبي=شبلٍ يزاحم بفعله رجاجيلٍ كبار

شاعر وديوان قومٍ فصيحٍ يعربي=صفوةٍ لأجيال عصره وللصفوه شعار

للدواسر منبرٍ زايدي مع تغلبي=حكمة المنطق ومبدا التواضع والوقار




وعلى الرغم من مشاغله فقد فتح أبواب مجلسه مرحباً بالمنبر الإعلامي لقبيلة الدواسر على شبكة الإنترنت وخصّ هذا الموقع بالحديث عنه وعن تجربته الشعريّة بمختلف أنواعها وطرح الأسئلة للكثير من متابعيه بمعرفتها .


إخواني لا نطيل عليكم ، لقاءنا مع الشاعر المتميز.


منذر بن حمد بن رشود آل هشام الشكره الدوسري




الشاعر : منذر بن حمد بن رشود الشكره



أجرى اللقاء :
الأستاذ فهد بن عبدالهادي الغريري عضو مجلس إدارة الموقع .


س)في بداية اللقاء يا أبوحمد نحب نرحب بكم في الموقع الرسمي لقبيلة الدواسر ونسعد بإجراء هذا اللقاء معك .. بالواقع بودنا تذكر لنا البطاقة الشخصية ؟

ج)بدايةٍ أحب ارحب بك يابو راشد وأنا والله سعيد بشوفك وأجراء اللقاء مع منتدى الدواسر الرسمي وهذا المنتدى ماهو الا صرح يجمع بينا وعسانا نرتقي به من أفضل الى أفضل


اما البطاقه الشخصيه طال عمرك

الاسم:منذر بن حمد بن رشود آل هشام الشكره الدوسري

العمر:28سنه

العمل: في الموؤسسه العامه لتحلية المياه المالحه





س)ابوحمد هل تأثرت بشاعر معين ، وإن كنت تأثرت بأحد فنرجوا منك ذكر الأسماء وما هي أهم الإشادات التي حصلت عليها طيلة مسيرتك الشعرية ؟وهل الشعر وراثه لديك؟

ج)لاوالله أنا ماتأثرت بشاعر ولكني أستفدت من شعراء في بداياتي وكما تعلم يابو راشد فأنا من بيت شعر وكذلك جدي الشاعر المعروف عبدالرحمن بن حمد الزمامي

والاشادات أبشرك واجد ومايهمني منها الا اللي تكون من الرجال الطيبين مثلك وشرواك

واما بخصوص وراثه او موهبه ماقدر احدد الشيء هذا ولكن عند نفسي انها الاثنتين



س)الشاعر منذر بن حمد الشكرة من الشعراء المتميزين لكن بعيد عن الساحة الشعبية لماذا؟


ج)جزاك الله خير يابو راشد هذي من ضمن الاشادات احصل عليها منك طال عمرك بخصوص الساحه الشعبيه اختلط فيها الغث والسمين وانا مالي رغبه فالاعلام بتاتآ ويعلم بالشيء هذا المقربين مني

ذكرتني يابو راشد على ذا السؤال قصيده قلتها على أثر مناقشة بيني وبين الشاعر عبدالرحمن بن هذال آل دحيم الشكره كان يبيني أطلع بالاعلام وارسلت له هالبويتات




يابن دحيم تلومني وأنت ماتلام=لوم الوفا مابين وافي ووافي

تبيني أبرز في محطات الأعلام=وأنا مع الأعلام لي أختلافي

لاصار ماعندي وساطات وأرقام=صاحب لقب وألا رصيد الخرافي

مانيب شاقي في متاهات الأقزام=العين شافت منهم مايعافي

ولا به رقابه من وزارات الأعلام=تكشف لنا عن كل ساقط وهافي

صار الشعر مابين بايع وسوام=تداولوه أهل النفوس الضعافي

سود القلوب محررة صحف وأقلام=تقضي مصالحها على حساب قافي

أهم شي تحوز رونق وهندام=وتكسب أعجاب أبو الثمان الرهافي

ياصاحبي والعلم قدام قدام=لابد ماتظهر جميع الخوافي

بتشوف ماشفنا من العام للعام=وتشوف من قلبه حقودٍ وصافي

هذا هو الأعلام من طاح ماقام=للمصلحه واعي وللشعر غافي

وأنا ولله الشكر والتسلام=كافي علي أعجاب ربعي وكافي

تبقى الجزاله فالزمن بصمة أبهام=وأكبر دليل أشعار صقر النصافي





س)من هم الشخصيات اللتي تأثرت بهم في حياتك الشعريه ؟



ج) سبق وقلت انا ماتأثرت بأحد ولكن أستفدت من شعراء لهم الفضل علي بتوجيهي

وانا مع القصيد الجزل بغض النظر عن صاحبها

ولكن الشاعر القريب من نفسي هو الشاعر الكبير مبارك بن محمد بن عويد الغييثات

شاعر واخو ورفيقٍ غالي.




س)هناك من يجعل الشعر سلم يرتقي به لأغراضه الشخصية ما تعليقك على ذلك ؟



ج)بكل صراحه (جعل فيه العافيه)لاصار بيقضي لزومه

والمدح باب من أبواب الشعر لاريب فيه ولكن لاتعطي الممدوح فوق حقه عطه حقه بعض الناس يعطي الممدوح شيء من الخيال لايقبله العقل.



س)ما رأيك وبكل صراحه في كثرة البرامج الشعرية في الآونة الأخيرة
( قصيدة التحدي ، شاعر المليون ، شاعر العرب ......الخ ) وهل لها مردود جيد
على الشعر والشعراء ؟



ج(شاعر المليون خله لحاله هو الاقوى والبرامج الشعريه كثرتها ماتصلح قلة فيها قيمة الشعر وحنا عارفين هدفها00 الحين من منا يتابع شاعر المليون مثل النسخه الاولى ناس قلة جدآ

واما مردودها فهو جيد على الشعراء وأما الشعر ليس له مردود

أي شاعر يشارك بالمسابقه حتى لو مايصل المرحله النهائيه تلقى الاعلام محتفي به وهذا ضعف في أعلامنا

مايبحث عن الشعراء الجزلين ويحتفون باي شاعر دخل له مسابقه سواء كان جزل او عكسه





س) ماشفنا الشاعر منذر بن حمد مشارك في حفل قبيلة الدواسر السنوي لماذا



ج)الشعراء المشاركين فيهم الخير والبركه وماقصروا

ولكن السؤال هذا حديثه طويل وأسمح لي يابو راشد بالاطاله الحفل ينومسنا والتعارف ينومسنا مع بني عمنا ولكن فيه عدة نقاط حول الشعر والحفل :

الأولى :عدم تعاون أهل الحفل مع الجهه الراعيه للحفل

الثانيه :نفس الشعراء اللي في كل حفل يتكررون 00فيه شعراء لهم حق بالظهور والواجب انهم يطلعون التغيير مطلوب في كل المجلات

الثالثه:لابد التنظيم يتم للشعراء قبل الحفل ويكون معروفين اللي مشاركين في الحفل ماهوب خبط عشوى كل من جاء بيشارك

الرابعه: أختيار الشعراء يكون من شعراء يميزون بين الغث والسمين

ويجب أن يكون مواضيع الشعر مختلفه حنا في كل حفل نسمع فقط مدح والمدح لابد منه فالاجتماع ولكن ليس كل الشعراء على وتيره واحده فقط لابد أختلاف المواضيع وطرح قضايا تهم القبيله

الخامسه والأهم: حنا اربع سنوات نجتمع والحمدلله اجتماع خير ولكن نبي نجني الفوائد من الأجتماع غير التعارف طرح قضيه تهم الدواسر اما مريض يعالج أوغيره وغيره



ذكرتني قصيده من عرضها ااقول




أما أجتماعٍ يقد الحبل ويمده=وألا أجتماعٍ كذا وشهو على شانه

اليوم كل العرب بالخير مستده=ماهيب جوعانه ولاهيب عطشانه

يقوله اللي غلب عرفه على وده=مصخرٍ قافه وصح الله لسانه


س)ين أنت من الأمسيات الشعرية !!!! وكذلك السؤال نفسه أين شعراء الدواسر وخاصة الشباب من الأمسيات الشعرية المنقولة فضائياً


ج)الأمسيات الشعريه بعيد عنها لكثرة المشاغل والله لايشغلنا الا بطاعته و وانا لازلت في بداياتي ومالي رغبه فيها قووويه مع أني أقمت أكثر من أمسيه من دعوة غالين شرواك اما شعراء الدواسر مانرى لهم حضور مكثف والسؤال يوجه للاعلام وللشعراء الجزلين اللي المفروض انهم يمثلون القبيله,

ولكن من وجهة نظري ان الشاعر اذا ظهر بالاعلام لابد ان يعرف كيف يبدئ ظهوره ويرعاه حنا نشوف يابو راشد شعراء من الدواسر وغير الدواسر في كل منبر يطلع ويقدم قصيده وهذا الشيء يضره ماينفعه يمل منه الجمهور وبعض المناسبات ماتنفع الشاعر انه يطلع فيها ويقدم فيها قصيده لانها اقل من مستوى يقال فيها الشعر





س) مارأيك في بعض الشعراء اللي يثيرون النزعات القبليه




ج) ماأقول الا




كان الفتى يفتخر في ما فعل جده=يبني على ساس فعل أبوه سيسانه

ومن لأظهره وجهه ولا تظهره يده=مايشمله فعل خيلانه وجدانه



س) ممكن تعطينا أقرب قصيده من نفسك يابو حمد



ج)كل قصيدي قريب من نفسي ولكن فيه قصيده في الامير محمد بن مناحي آل حفيظ

تعني لي الكثير لأنها في الأمير محمد أطال الله عمره وهو مشهود له بالمواقف الطيبه.


الأمير محمد بن مناحي بن حفيظ أمير قبيلة الشكره





بأسم الله الوالي ولي التدابير=محاسب" خلقه نهار القيامه
الواحد اللي يرزق الحوت والطير=ومسجل" حسنات عبده وآثامه
من بعد ذكر الله بدعت التعابير=مثايل" فيها من الوقت شامه
قامت تداحم وسط راسي التفاكير=وأرقى عدامه وأتعدى عدامه
هاضت بي الدمعه مع حزة عصير=دمعة عجوز" فارقت الأبتسامه
تمسي ودمع العين مثل الشخاتير=وتصبح كدر والويل لأقبل ظلامه
وتون ونات الأسى والتحاسير=وتقول يادنيا الفلس والندامه
دايم وهي تدعي مع الثلث الأخير=يلم شمل" عقب ضاع ألتمامه
ترجي ولدها من بعيد المشاوير=يجي لها ويقرب الله دوامه
يآمن يبشرها بزين التباشير=ومن هو يبشرني عدته الملامه
العمر يمضي والليالي مدابير=والحظ طايح وأرجي الله مقامه
والعبد لو حاشته بعض المقادير=يصبر وربي له يحقق مرامه
ومن بعد ماشفت الدموع المحادير=أبي السلامه مير مامن سلامه
أونس بصدري مثل شب الدوافير=والقلب زايد بالضلوع أحتدامه
وأقول يايمه غدى وقتنا غير=الحر يربط والهدد للحمامه
وتقوم تنخاني ودمع المحاجير=أثر على قلب الشقي أنهشامه
ونكستها يم الوجيه المسافير=أهل العقول الراجحه والفهامه
ماينصى كود الرجال المشاهير= وألا ترى ولد الهلامه هلامه
وأنا نصيت اللي هقاوي به الخير=اللي فرض للناس هيبة مقامه
مني سلام" عد ماغرد الطير= وأعداد ماهلت صدوق الغمامه
سلام" أحلى من حليب المصاغير=وألذ من طعم العسل في تهامه
على الأمير اللي ماهوب أية أمير=اللي فرق بالمرجله والشهامه
شيخ" وتعنى له جميع المناعير= من روس قوم ومن بيوت الزعامه
محمد محمد زبون المخاسير=في كل ميدان" طبع له علامه
في مجلسه تلقى الدلال المباهير=والعود الأزرق والشحم والكرامه
والناس في بيته ورود ومصادير= يفدونه اللي لاشداد ومسامه
ياقوم ياعنتر وياسالم الزير= وياقوم أبوزيد الهلالي سلامه
لآمن وقف يآقف كماطويق والنير=ولآمن حكى ماودك ألا بكلامه
راسه ملي بالمعرفه والسعاطير=هامه ويبقى طول الأيام هامه
ماتثني عزومه ليال" مداهير =ولاينحني للذل والأنهزامه
منا عليه يقوم ويسد ويغير=وعليه منا طاعته وأحترامه
هو شوق ترفات البني الغنادير=الزاهيات من الحيا والوسامه
من لابة" يوم السنين المعاسير=للجار ريف وللمعادي كعامه
شيوخ حسن مفرقين الطوابير=لاطلوحن بيض البني باللثامه
آلاد علي مخضبين البواتير=النادرين اللي تفك الجهامه
لآمن غزت تكسب كبار الأباهير=وأذا لحقت سيل" يطم العدامه
ذود" مجاهيم" وذود" مغاتير =يجي لهن على العدود أبترامه
تآرد غصب وتورد الأبل على البير=يوم" أن ولد اللاش تبرد عظامه
وأرجع على اللي مايجي منه تقصير=محمد أبن حفيظ للطيب قامه
وأنا أدري أنه مايسوق المعاذير=يكرس جهوده وجل أهتمامه
واللي ماهوب يصير عنده يبا يصير=بأمر الكريم أنه يجي في تمامه
جالك غلام" ماله ألا أنت يأمير=عساك تدرك طلبته مع مرامه
أفزع لشخص" مالقى غيركم غير=البحر خلفه والمعادي أمامه
لامن رقى حظه تجي له تعاسير=وماله جدى ياكود عضة أبهامه
حطنه الأقدار بين المعاثير=ولاذاق زاد ولأهتنى في منامه




س)يابوحمد حنا نسمع في الفضائيات قصيدتك في فزاعه ناقة الشيخ حسن بن هذال الشكره ولك قصيده ثانيه فـ أبو هذال فيها البيت اللي تقول فيها.


حسن على الفردي الأول وقد باني=عقبال ماياخذ الأول على الميه




ياليت توردها لنا؟




ج)نعم الشيخ حسن أبن هذال من ربعي القريبين الغالين ومشاركته في مزاين أم رقيبه تنومس الدواسر جميع ومايستغرب عليه فهو حفيد هذال أبن وقيان (كريم سبلا)ومهما قلنا فيه نعتبر مقصرين في حق أبن هذال

وانا قصدت فيه عدت قصايد بذكر اللي طلبتوا



فزاعه



المجهم الدوسريه جات فراعه=على المزاين خسر من هو يماريها

تقبل على الفوز طربانه ومولاعه=تخلف هقاوي هل الذود بهقاويها

الأسم فزاعه وبالوصف فزاعه=مطنوخةٍ من طناخة راس راعيها

لاسمعت اللي يصيح أتجيك منصاعه=وتشوش مع لأد زايد في عزاويها

وأن قرب وقت الزحام ودقت الساعه=جاتك تخطى ويامزين تخطيها

على التحدي تجي ماهيب جزاعه=وأترد كل الغوالي من تحديها

في ملك حرٍ يشوق العين مطلاعه=حفيد من سيرته محدٍ جهل فيها

حسن وفعل الوفاء ساسه ومنباعه=من لابةٍ بين التاريخ ماضيها

دواسرٍ يكسبون الطيب بأنواعه=قدام ضرب النمش تعرف بأساميها

هبت هبوب القصيد وزان ذعذاعه=مشاعرٍ يم أبن هذال مهديها

مادام واف الخصايل طايلٍ باعه=حقه علي أبدع بيوتي وأغنيها


ولايفوتني أنأشكر بخيت بن ناصر الهواشله وفهيد بن محسن النتيفات على ادآئهم الرائع والله يبيض وجيههم()



واما القصيده الثانيه




ياهاجس الشعر وقف لاتعداني=لي فيك لآزم ولي رغبه ولي نيه
لاجيت أبو شايع المنعور حوراني=سلم على حضرته واللي حواليه
وقله ترى منذر أبن رشود وصاني=عليك بالذات ياريف الجلاويه
يقول بلغه ماينطق به لساني=بيوت شعر" على وزن" وقافيه
من صادق أحساسي وشوقي و وجداني=تزفها لأبن شايع حي طاريه
من نسل قوم" توطي كل قوماني=فريس حرب" وأهل وقفات وحميه
ربعي ملاذ الضعيف ومزبن الجاني=آلاد شكر" نهار الهوش والهيه
عاداتنا لاقبس بالجو دخاني=يانصر محتوم ياموته جماعيه
يشهد لنا كل قوم وكل ميداني=مخضبة حد سيف وحد جنبيه
ياويل منا نديد" له وعدواني= يصبح له بكيه ويمسي له بكيه
لامن ركبنا على ربدا وربداني=ماهمنا جمع خياله ورجليه
نبطش عدانا وكن الضد ماكاني=ولاراح من ضربنا لا ذي ولا ذيه
يستاهل العز والناموس من داني=رجل" بذل ماله ونومس عزاويه
فالمركز الأولي ماهوب فالثاني=أسمه طلع والقلوب السود مكويه
حسن على الفردي ألاول وقد باني=عقبال ماياخذ الأول على الميه
هذا وشوف الجهام السود يشعاني=من شفت ذودك على بث الفضائيه
وأنا مراهن عليك وكاسب رهاني=واللي يتحدى يدوس الجمره الحيه
أقولها وأفتخر في سر وأعلاني=أبلك من أفضل حلالن فالسعوديه





س) على طاري المزاين نبي قصيدتك فالعم ناصر بن هديبان الشكره.


ج)أبشر يابو راشد وأبن هديبان يستاهل كل علم طيب وأبو هديبان يداحم الأجناب ويكفيه فخر أن أبله كلها على ساس مافيه شريات
وحقه علينا أبو هديبان أكثر من القصيد والقصيده قلتها يوم شفته على قناة الصحراء يدوه لأبله وهيضني ابو هديبان جعل عمره طويل وقلت





حان الوعد والمزاين حان=والناس نازل ورحالي
تساوقوها هل الذيدان=كل" يبي المستوى العالي
من نقوة الذود فالأوطان=أصناف وألوان وأشكالي
والصفر لاطبت الميدان=قامت تعزل تعزالي
لآ كنها شرد الغزلان=لازرفلت فالخلا الخالي
طفح اللواحي وخرع آذان=فنسى وضافية الأسبالي
جردا رقبه ووالوجيه أزيان=وكل الوصوف أتهيالي
سنامها مثل خشم العان=ضلع" على الأرض متعالي
متفهق ونابي ومليان=أقحز على الورك طوالي
زآحى من الخف والسيقان=والنحر دروازة الوالي
عقلا وحرشا وبر وأجنان=سندا لها غارب" طالي
صفر" على ساس طيحان=ويازين حس التهوبالي
تدجر على الصوت والدندان=وأن هوبل تجيك زرفالي
لآمن مشت تلفت الأعيان=وأن درهمت وسعة بالي
مايقتنيها ياكون حصان=قرم" على راس ماطالي
مير أسمعوا ياعزاز الشان=ماكل وبال وبالي
يكفي فخر بأننا للآن=مانشتريها بالأموالي
كسب" لنا من على الجدان=ماهيب بجنيه وريالي
صفر" بها الثاقبي قد بان=وسم" لماضين الأفعالي
خزايز" من على الشيبان=وصى بها الأول التالي
من دونها نكعم العدوان=مابين رجلي وخيالي
كله لعينى بن هديبان=جريت صوتي وموالي
أشوش مع نايد العربان=وش عاد أبن عم" وغالي


س) ممكن تعطينا كذا مساجله من مساجلاتك يابو حمد



ج)المساجلات يابو راشد واجد وبختار لكم منها كذا مساجله


هذي مساجله بيني وبين الشاعر مبارك بن محمد الغييثات


قال ابو محمد



ساقني للطرق واللعب فالغر النصوب=لاطرالي ماحصل وأنا عيني للخيال
يتزبر والهوى يستغيث من الجنوب=لين يضحك بأوله وآخره بالدمع سال
جارح" يوم أندفق وأنهمر مع كل صوب=عذب صوته يوم دندن طرب والهم زال
عقب سيله شيف نبته وتخضر به قلوب=والروابع تستفيض الوله عقب المحال
بالغلا والود درهمت للصوت الطروب=كمله ربي بزينه ولله الكمال
صاحب" أغليه جدآ وألا حان الغروب=ضاق بالي وقبل أعرفه فلا قد ضاق بال
ماحسبت أن دربنا يضيق من وسع الدروب=مل صبري باح سدي بعد مالصبر طال
وصار ليلي ونستي ماعن الواقع هروب=بين هذيه وذيه على وضع أحتمال
والنتيجه مثل ماني ويدعى لي أتوب=ولا يساليني سوى ذكرها في كل حال
والهوى يلعب بنا مثل صفاق الهبوب=وبه يدين" ماتفرق حرام" من حلال
مادروا بأنه ملكني وأنا فيه مغصوب=فارضه زود الغلا وطيب عم وطيب خال
ماعلي خلاف لامن ذكرت اللي ينوب=والمثل قد قال ماللحمل غير الجمال
لاتعذر لي وفاء وأنت رجال محسوب=أيه يأبن رشود منذر حمد ياراس مال
لاتقول أن الهوى فيه غالب ومغلوب=من عشق ماطاع لاتنصحه قطع الوصال
صاحبك يرفع بصوته وذا صياحه طنوب=يتحرى وقفتك لاسمع صدق المقال


قال منذر:



شاقني برق" تكاشف علي من الجنوب=يدفعه مع رايح الغيم ذعذاع الشمال
أستقر وهل ماطره بفياض العشوب=لين زاف النبت من عقب ماطال المحال
أرتوت منه المشاعر وفرحت به شعوب=والعيون تخيل ماطرك ياصدق الخيال
أستمع مع كل قطره صدى صوت" يجوب=وأرخي أذني للصدى ويش قال وويش قال
بري حال وشيب عين/فري جيب وشق ثوب=من غلا اللي حطته بين جال وبين جال
والقلوب تذوب ياصاحبي فبعض القلوب=والليال السود غارت على بيض الليال
وأن بغيت أتوب وألا ماودك لاتتوب=العمر ملحوق ومن هو صبر لازم ينال
والمحبه بين الأثنين تبنى طوب طوب=مير لاتبني ودادك على جرف" هيال
أشهد أن الحب ذنب" من كبار الذنوب=خص لآمن صرت تسأل وخلك مايسال
صاحبك ياصاحبي سالي" وأنت معطوب=فيه من طبع الجفا وفيك من طبع الوصال
لاتضايق وأنت رجال غالي ومحبوب=لك رجال" بالمواقف يضدون الرجال
أن حصلك بالرضا وألا جبناه مغصوب=الأحمرين أثمانها دم ولا راس مال
أحتزم بي للثنادي وأنا في كل نوب=حاضر" لك والفعل يقطع سلوك الجدال
دامني وياك من ضمن متنين الجنوب=والمتون من الثقل ماتشيل ألا الثقال
لاتون ولاتحن ولاتصيح ولاتشوب=جاك مني الفال والفال يقفاه العقال


وهذي مساجله بيني وبين الشاعر محسن بن بيشان العجمي

قال محسن


ياسلام الله سلامن فيه مضمون الصداقه =والحقيقه يالشلي ماللصديق ألا صديقه
السنافي نفقده دايم ويحزننا فراقه=والعلاقه ودك انها بيننا تبقى عميقه
والردي دايم ترى مالي على شوفته طاقه=حالف ان اعزنفسي عنه واجنب طريقه
قالها اللي حب من جزل الشعر يهديك باقه=يارفيقن في الشدايد ماتخلى عن رفيقه



قال منذر:



مرحبآ ياصاحب" فيه النعاره واللباقه=مرحبآ اعداد ماهز الهوا الغصن ووريقه
يارفيق" حافظ حقوق الصداقه والرفاقه=والعلاقات الجديده والعلاقات العتيقه
لك رفيق" فالشدايد ماثنى لك عظم ساقه=أن بغيته فالجليله وأن بغيته فالدقيقه
والردي يبقى ردي وأسمه مع العراف عاقه=صد عنه وأخسره لو أن فريقك من فريقه
مايضوي له بعير ولايضوي راس ناقه=والحمل لوه خفيف" فوق متنه مايطيقه




وهذي مساجله بيني وبين الشاعر عقيل بن مديسيس الشمري وهو كان أخر يوم أداوم معهم في مركز الخفجي بعد ان تم نقلي الى محطة الوسيع

قال عقيل




ياابوحمدياعلها لك تساهيل=وياعل دربك يالزميل السلامه

يالدوسري ياابن الرجال المشاكيل=ماجيت بالتقصيروالا ملامه

انااشهدانك وافي(ن)بالمكاييل=ياعل يفداك الردي والهلامه

لك عام بالخفجي ياوجه الرجاجيل=عد(ن)يورد ماعطش من حيامه

كلمه هلا للي يجيلك مع هيل=وزود(ن)على الترحيب تفعل كرامه

ياعل عود(ن)دربك للتماهيل=تبطي سنينه ويتحقق مرامه

والعذرياللي بالوفا نافل(ن)جيل=وان كان قصرنا عليناملامه

وعسى السعدفالك بكل المقابيل=ياطيب(ن)للطيب يحمل علامه


مردي على الشاعر عقيل بن مديسيس الشمري


قال منذر:


يامرحبا يلي بعثت المراسيل=ياطيب" فارض علينا أحترامه
ترحيب وافي في عشير المشاكيل=اللي رفيع" مستواه ومقامه
أرسل عليه من جزيل التماثيل=من صادق أحساسه وصادق كلامه
والرد حاضر مايجي فيه تأجيل=رد الوفا لأهل الوفا والشهامه
أنا أشهد أنه كاسب" للتنافيل=حتى بلغ بالمجد ذروة سنامه
للطيب عد وللمراجل مداهيل=والعز شفه والمكارم غرامه
لا يالدحيلي يامجري المذاليل=ترفع لك البيضا براس العدامه
تكرم عن التقصير والنقص والميل=وأنا أشهد أن مني عدتك الملامه
ولايدرك الطولات غير الحلاحيل=وألا الردى لأهل الردى والرخامه



س) يابو حمد ممكن تعطينا من الغزل ولماذا أنت مقل في هذا الجانب



ج) أبشروا واللي تبونه حاضرين به وأنا مقل في هذا الجانب
لن شعر الغزل مايجي له طعم ألا لاصرت معايش الوضع وأنا يابو راشد مانيب فاضي لكي أتعايش معه:ولكن لي تمر علي بعض الحالات وأكتب




كثر الجفا وكثر التغلي مايفيد=خلي الجفا منك وخلي التغلي
ماينفع المشحون ياباشة الغيد=ألا المواصل يابعد كل من لي
يلي عشقتك عشق من دون تحديد=وأن جيت أوصف فيك يلي و يلي
يلي ملكتيني من الأيد للأيد=ويلي حويتيني بقلبك وأنا اللي
عشانك أطوي البعد وأصخر البيد=وأجيك من لهفه ولآمن حصلي
شوفك من أيام السنه كنه العيد=ياروعة أيامي وعمري وفلي
أضيق لا ضقتي ولا هدتي أهيد=جيتك على دلك وخالفت دلي
يعني بلاش أقول وأعيد وأزيد=خلي الجفا منك وخلي التغلي


******


ألا ياوجودي كل مامالت الفيه=أشوف العذاب عصير والليل قافيني
تخاويت أنا والهم روحه مع جيه=وهم" يصبحني وهم" يمسيني
أغني من الضيقه ومن علة" فيه=ألا ناحت الورقا مابين البساتيني
سبب جادل" فيها من الزين ماريه=وفيها الغنج والعطف واللطف والليني
عنود" من القانص تذير ومحميه=عسى الله يصبرني على البعد ويعيني
تدرى من العاذل وهرج الشميتيه=ومرات تبعدني ومرات تدنيني
ولو الهوى مسموح جيته علانيه=وأقول الزياره فرض بين العشيقيني
ولكن عذال الهوى والهواويه=تلد النظر مابين خلي ومابيني
تفارقت أنا وياه خوف ومحنيه=على شان مايعنينه لاشك يعنيني
وألا مرني طيفه وألا مر طاريه=يهيض الخفوق وسيل الدمع من عيني
فأنا شف بالي ياسعد كل عصريه=أسج القدم وأدوج بين الفريقيني
حداني الزمان الشين /والعلم تاليه:=ألا ياوجودي يافريق المحبيني









س) نبي يابو حمد تذكر لنا من قصايدك اللي كتبتها عن موقف يخصك


ج) أبشر يابو راشد وهي تعبر عن موقفها




يلي تحسب أن الفخر جمع الأموال=لآ كان قبلك كل نشمي جمعها
ترى الفخر ياصاحبي بيض الأفعال=ماهوب فالدنيا ولا في طمعها
الله هو المعطي وله كل الأحوال=ناس" عطاها الله وناس" منعها
لكن لاتضرب على كل جوال=وتبدي لك علوم" على الله سنعها
أحد" شكا لك حال ولا شكا مال=ولا بغى له فزعة" من فزعها
المرجله ماهيب بالقيل والقال=كل" يحصد بذوره اللي زرعها
واللاش لايغريك في بعض الأقوال=لو المراجل تمرة" ماقدعها
أما يضيق البال أو يآسع البال=جاتك وأخذها وأستمعها ودعها
ذا قول من ساق النصيحه ولازال=يرجي من الله تنتفع من نفعها


*******



سر ياقلم وأكتب على ماطرالي=أبداع من شاعر وصوره وتركيب
الشعر فيض وغيض واللي بدالي=غيض" ومنه تفوع عوج المحاديب
حبيت أصور مارأيت وجرالي=من واقع الدنيا وشوف التعاجيب
عسى لبيب العرف يفهم مقالي=ويفهم وش اللي تحتويه المكاتيب
جربت وقتي بين مر" وحالي=وعينت ناس أبلا وجيه ومقاضيب
لا وازع" ديني ولا طيب فالي=دايم على عروض الخلايق قصاصيب
ناس" على الغرات ماهي تبالي=أتحرث الفتنه وتلحق مشاهيب
وناس" تفرق بين غالي وغالي=دايم على الفرقا تشد المناسيب
وناس" تقدس من ملك له ريالي=وتصير له خدام وألا مناديب
هم مادروا بأن العمر للزوالي=وكل" يجازى من ولي التحاسيب
وماحد" علم في مقبلات الليالي=وشهي تخبي من ظواهر ومن غيب
فالناس مافيهم رقيب" و والي=الله هو اللي يعلم السر والغيب
لاتحسبون المجد قيل" وقالي=هرج القفا ولا بشذب العراقيب
المجد فازوبه قروم العيالي=اللي رقوا في عاليات المراقيب
ندر حرار ومحتمين التوالي=طبع الوفا عاداتهم والمواجيب
وغمر" ماهوب يحوش كود الهزالي=ماتنفعه مكاسبه لا غزى الشيب
ومن لا رقى بالطيب في راس عالي=عنه يشومن البني الرعابيب
واللاش لو أنه قريب" يوالي=ماله ورى رقبتي حقوق ومطاليب
أشوم عنه وعزتي راس مالي=ماأذل نفسي والليالي تجاريب
يوم الرخا عندي رفيق" موالي=ولاجاء القسى لاهو يودي ولايجيب
ماغير بالمجلس لسان" يلالي=يظن نفسه مثل أبو زيد وكليب
مايدري أن لاصك جال" بجالي=ماهوب يحسب من حساب المعاطيب
ولو أنها بمرهفات السلالي=وصكة حلاحيل" ووقفة أشانيب
هنا يبين الفرق بين الرجالي=أما يطيب الرجل ولا يبا يخيب
البوم ينعق وأم سالم تلالي=والفعل له هدات عكف المخاليب
واللي يبي درب القدا والمعالي=والمرجله والجود ومزارق الطيب
يتعب على كسب الفعول الجزالي=عز لبني عمه وعز الأصاحيب
ومن هو يروم الطيب بأول وتالي=مايلحقه شك" ولايلحقه ريب
يعيش رجل" بالخوي مايمالي=دايم على شانه يحث المراكيب
ماضاق من نقل الحمول الثقالي=ولاهزته بقعا وكثر الأصاويب
أن شاف من عيب يستر خمالي=ويردني من شرب كدر المشاريب
أن غبت عنه يحس بي ويعنالي=وأن جيت له يصدح بجزل التراحيب
ومن كان في نهجه ونفس المجالي=أنا رفيقه لاعوى الذيب للذيب
والكامل الله مال غيره كمالي=ولحد" خلي من الخطاء والعذاريب
ممشى الفتى تختخ" تو سالي=أخير من ممشى هل الخزي والعيب
صورت مما شفت واللي جرالي=ورتبتها من هيض فكري تراتيب
شي" يقال وشي ماهو يقالي=والله هو اللي يعلم السر والغيب





س)أبو حمد يقولون الشاعر لسان المجتمع يعبر عنه الشاعر منذر ماقد كتب عن حدث حصل قدامه او سمع عنه



ج)صحيح وانا كتبت عن أكثرمن حدث وهذي قصيده كتبتها عن حدث علمت عنه لأحد الزملاء وهي تعتبر نصيحه




الطيب مايحتاج عقد ووثيقه=ماهوب عقد" يبرمون أتفاقه
الطيب وهبه من آله الخليقه=ويحوشها راع الثناء والطلاقه
واللآش لاتغريك لمعة بريقه=عند الشدايد ينثني عظم ساقه
أصد عنه لو فريقي فريقه=مانيب محدود" على كل عاقه
أمن المراجل مابعد بل ريقه=وماله على فعل المراجل لياقه
طريقته ماهيب والله طريقه=وعلاقته ماهيب والله علاقه
اللي قطع بين الشقيق وشقيقه=أسمه مع العربان قطاع ساقه



س) أبو حمد ممكن تخبرنا عن من يعجبك من شعراء موقع الدواسر الرسمي



ج)والله الشعراء كلهم يعجبوني والصراحه موقع قبيلة الدواسر يزخر بشعراء جزلين

ولكن للشخص ميول وانا اميل بكل صراحه مع الشعراء حسن بن محمد بن بطحيه الودعاني فراج بن فهد الشكره محمد بن سالم الخضران وعبدالله بن راجس الرجباني وسلطان بن محمد ال مطلقه الودعاني وعبدالرحمن بن هذال ال دحيم الشكره ومبارك بن عويد الغييثات





وفيه والله شعراء يعجبوني ويعذروني اني ماذكرت اساميهم



س) ابو حمد من تحرص على استماع قصيده او البحث عن قصيده


ج)والله كثير منهم اللي ذكرت لك فالسؤال الماضي وفيه الشاعر الكبير شعرٍ وقدرٍ محسن بن فالح الشكره



س) ابو حمد ممكن تعطينا قصيدتك اللي منها البيت اللي يقول





ماعلموك أني من أهل البطولات=والزند يقدح والمناسب عريقه



ابشر يابو راشد




يابنت ماتمشي علي الحركات=ماللي علي مرسلك قولي الحقيقه
أمانتك ماهيب مثل الأمانات=وطريقتك ماهيب والله طريقه
تبين زفه مثل كل العروسات=وتكلميني مايقارب دقيقه
وأنا أعرف العلم ماأحتاج لأثبات=وأعرف نحاس العلم وأعرف بريقه
مانيب أنا من قوم يا ود يا هات=أضم مثلك ضم وسط العليقه
ومانيب متحسف على كل مافات=جديدة" وألا علاقه عتيقه
ماعلموك أني من أهل البطولات=والزند يقدح والمناسب عريقه
مانيب أحب أهل الدنا والخيانات=واللي يسويها ماأطيقه ماأطيقه
علم" يخصك خص بالذات بالذات=علم به اللي مايقدر رفيقه




س) أبو حمد بودنا تعطينا قصيدتك اللي منها البيت اللي يقول




ربعي كعام المعتدين الروابيص=أهل الآحمر ربعي كرام السبالي

وياليت تذكر لنا مناسبتها؟


هذي يابو راشد مناسبتها يسئلني أحد الناس من هم ربعك وهو يعرف من ربعي لكن الغيره الله يكفينا شرها لن اهل الآحمر ولله الحمد الطيب تحصله من أدنى فيهم وكلهم يجملون وراعي الآحمر في كل ديره يزكي ويظهر نباه من دون قاصر بالقبايل لكن بعض الناس يحس النقص في نفسه ويشوف فعول الرجال ولايقدرها ويغير منها على ماقال الشاعر سداح العتيبي



شيٍ طبيعي لو تغار الحرمه=مير البلاء من غيرة الرجالي


وجاه ردي بقصيده


من باعنا برخيص بعناه برخيص=حتى ولو أنه على القلب غالي
حتى ولوه من طيورٍ قوانيص=نفك سبقه فك في جو خالي
خله يروح ولا يجي من تنغيص=والله كفيل الرزق بــ أول وتالي
بعض الرفاقه ياعرب زمة غليص=لآ منــه لآ خيـــرٍ وشــره يــزالي
لآ جات من صاحبك عوجاء وتنقيص=خله مع الدنيا وغيب الليالي
لآ بد ماياتيك يشكي التفاليص=يشرب هماج الوقت عقب الزلالي
وأنا أحمد اللي خصني بالتخاصيص=طيبي رسخ مابين جدي وخالي
وربعـي كعام المعتدين الروابيص=أهل الآحمر ربعي كرام السبالي
أصغرهمللي في مواجيبه بخيص=وأكبرهم اللي يرتكي للثقالي
مافيهم أحدٍ باللقى أيذل ويحيص=آلاد شكرٍ محتمين التوالي
يقوله اللي ماخذ الطيب تخصيص=دارس علوم الطيب دقٍ جلالي




س)ماشفنا الشاعر منذر بن حمد الشكره يلعب المحاوره



ج)والله شعر المحاوره مالي عليه ميول كثير لكني العب المحاوره مع اخوي ورفيق الدرب الشاعر مبارك بن محمد الغييثات وهي طبعٍ نادر ماألعبها





س) ابو حمد حنا في ختام اللقاء وبودنا نختم بقصيده منك



ج)ابشر يابو راشد ماطلبت شي



هذي قصيده اقول فيها




كل رجل" لا ظهر صيته حكوبه=وافي" مبداه يجرح كل هافي
من شمال الدار وألا من جنوبه=ذاع صيته والوفا مع كل وافي
والرخوم أن شافوا الطيب هزوبه=يحسبونه غافي وماهوب غافي
كل لاش" ماتلد العين صوبه=مير عزي للرخوم وللضعافي
يحسب أني موجب" له من وجوبه=مادرى أن فرقاه لي ربح وعوافي
لاتظن العز نوبه دون نوبه=مايدوم مع السنافي الا السنافي



الشاعر منذر بن رشود الشكرة ( قصائد صوتيّة حصريّة للموقع )



http://www.alduwaser.org/meeting3/SoundMndher1.wma

http://www.alduwser.org/meeting3/SoundMndher2.wma

http://www.alduwaser.org/meeting3/SoundMndher3.wma

http://www.alduwaser.org/meeting3/SoundMndher4.mp3





الشاعر منذر بن رشود الشكرة يتحدث لـ الأستاذ فهد بن هادي الغريري
عضو مجلس إدارة الموقع .





في ختام هذا اللقاء الممتع لايسعنا الا نتقدم بخالص الشكر والتقدير للشاعر المتميز منذر بن حمد بن رشود آل هشام الشكره الدوسري على إتاحه هذه الفرصة لنا وعلى أريحته وعلى سعة صدرة وإجابته على جميع الأسئلة ، سائلين المولى عز وجل أن يوفقه ويسدد على طريق الحق خطاه .



(صوت قبيلة الدواسر)
موقع قبيلة الدواسر الرسمي
www.alduwaser.org/vb



[/COLOR]

 

 

 

 

    

رد مع اقتباس
قديم 08-04-2010, 02:58 PM   #2
 
إحصائية العضو








ناصر بن فهد غير متصل

وسام الخيمة الرمضانية 1430هـ الفضي لصاحب المركز: الوسام الفضي لصاحب المركز الثاني بالأفضلية - السبب: وسام الدواسر الفضي: للأعضاء المميزين والنشيطين - السبب: النشاط والتميز
: 2

ناصر بن فهد is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

بسم الله الرحمن الرحيمُ
اشكر الشاعرُ :منذر بن حمد آل هشآم الشكرهُ .. لاتاحتُ اللقاء معهً
واقوول له بيض الله وجهكً وصح لسانهُ في كل قصيده قـآلهاً ..
واستمتعتُ في اللقاء مع شاعرنا الفاضل ٌ واستمتعنا اكثرَ عندما اقرا قصايدهً
ولا ننسىُ ايضااُ الجهودُ الذيُ يبذلهاً لخدمهُ القبيلهً وهو فهد بن هادي الغريريُ
وبيض الله وجهُ على اللقاءُ مع شاعرناُ ...
واخيرآ اشكرُ الادارهُ ايضااءُ علىُ اللقاءً وبيض الله وجيهمً ...
وتقبلوً موروريُ بكلُ سرورً و ود

 

 

 

 

    

رد مع اقتباس
قديم 08-04-2010, 03:04 PM   #3
 
إحصائية العضو







حسن بن بطحيه غير متصل

وسام شاعر التميّز .: وسام يقدم لمن يستحق أن يطلق عليه
: 1

حسن بن بطحيه is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

ارحب ارحب ارحب بالشاعر والاداري وبطيت يابوراشد وجبت السمين .. حقيقه ويشهد الله ان ابوحمد شاعر كبير رغم صغر سنه استمتعت بكل حرف واعدت قرائته كم مره لجمال القصايد والحوار..

فعلا الشاعر يجبرك على متابعته اينما كان وبوحمد رجل بمعنى الكلمه واللي يعجبني شجاعته في قول رايه اذا ماعجبه اي شي بالشعار والقصايد احترم رايه.. حقيقه هذا القاء ظربة معلم تشرفت بقرائته ومصافحته اولا وهذا القاء الذي يطلق عليه لقا صح لاهنتو ومشكورين..

 

 

 

 

 

 

التوقيع


    

رد مع اقتباس
قديم 08-04-2010, 07:17 PM   #4
 
إحصائية العضو







سهل الدوسري غير متصل

سهل الدوسري is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

الله ايبيض وجيهكم على ها اللقاء المتميز ومع شاعر المتميز . شهاده إني استمتعت باللقاء, كفوو يابوحمد على القصيد الجزل وعلى الكلام الطيب

 

 

 

 

 

 

التوقيع

    

رد مع اقتباس
قديم 08-04-2010, 11:59 PM   #5
 
إحصائية العضو







جود غير متصل

جود is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

ماشاء الله تبارك الرحمن
الله يعطيكم العافيه لقاء ولا اجمل وقصائد جزله
بالفعل شاعر كبير غم صغر سنك
بالتوفيق

وشكر خاص للاخ ابو راشد للاختيار الرائع ~

 

 

 

 

 

 

التوقيع

ياجود انا آسف حصل مني قصور///وأنتي تجاوبتي بطيب وكرامه


وهذا يدل أنك حفيدة هل الشور///اللي لهم في كل عليا علامه

    

رد مع اقتباس
قديم 09-04-2010, 05:33 AM   #6
 
إحصائية العضو







أبو ريم غير متصل

أبو ريم is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

بسم الله الرحمن الرحيم
بدايتاً امسي بالخير على الجميع
و اشيد بهذا اللقاء المتميز مع احد الشعراء العزيزين على قلبي
و منذر بن حمد شاعر مافيه كلام و شعره يعجبني دائماً
و شكر لادارة الموقع على اجراء هذا اللقاء معه
و بنتظار لقاءات مع شعراء القبيله المتميزين امثال منذر
دمتم بخير

 

 

 

 

    

رد مع اقتباس
قديم 09-04-2010, 09:34 AM   #7
 
إحصائية العضو








محمد.الودعاني غير متصل

وسام الدواسر الفضي: للأعضاء المميزين والنشيطين - السبب: النشاط والتميز
: 1

محمد.الودعاني is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

بسم الله الرحمن الرحيمُ
اشكر الشاعرُ :منذر بن حمد آل هشآم الشكرهُ .. لاتاحتُ اللقاء معهً
واقوول له بيض الله وجهكً وصح لسانهُ في كل قصيده قـآلهاً ..
واستمتعتُ في اللقاء مع شاعرنا الفاضل ٌ واستمتعنا اكثرَ عندما اقرا قصايدهً
ولا ننسىُ ايضااُ الجهودُ الذيُ يبذلهاً لخدمهُ القبيلهً وهو فهد بن هادي الغريريُ
وبيض الله وجهُ على اللقاءُ مع شاعرناُ ...
واخيرآ اشكرُ الادارهُ ايضااءُ علىُ اللقاءً وبيض الله وجيهمً ...
وتقبلوً موروريُ بكلُ سرورً و ود

 

 

 

 

 

 

التوقيع

[الهلال ثابت والبقيه متحركون.! ]

    

رد مع اقتباس
قديم 09-04-2010, 02:11 PM   #8
 
إحصائية العضو








عبدالله الحافر الغييثي غير متصل

وسام الدواسر الذهبي: للأعضاء المميزين والنشيطين - السبب: لنشاطه الملحوظ ومشاركاته المميزه بالموقع
: 1

عبدالله الحافر الغييثي is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

الله يبيض وجهك يابوراشد على هذا اللقاء مع اخوي الشاعر منذر ابوحمد
وانا شهادتي فيه مجروحه ابوحمد من شعراء الدواسر البارزين ومع صغر سنه يمتلك موهبة هائله من الشعر
تمنيات له بالتوفيق لشاعر الدواسر القادم وبقوه

 

 

 

 

    

رد مع اقتباس
قديم 09-04-2010, 03:06 PM   #9
 
إحصائية العضو







محمد بن سالم الخضراني غير متصل

وسام شاعر التميّز .: وسام يقدم لمن يستحق أن يطلق عليه وسام الدواسر الذهبي: للأعضاء المميزين والنشيطين - السبب: لنشاطه الملحوظ ومشاركاته المميزه بالموقع
: 2

محمد بن سالم الخضراني is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

ارحب يابو حمد تراحيب البدو

الله يحييك وانت اخو وعزيز وشاعر مبدع وشهادتي فيك مجروحه

وتشرفت بالتعرف عليك ونعم المعرفه . جزل ولك مستقبل مشرق باذن الله

اتمنى ان تشارك معنا من جديد لانك مكسب يامنذر

ابو لاراشد بيض الله وجهك ودايم سباق بالعلم الغانم

تقديري لكم ,,

 

 

 

 

    

رد مع اقتباس
قديم 10-04-2010, 12:24 PM   #10
 
إحصائية العضو







ابومبخوت الدوسري غير متصل

وسام الدواسر الذهبي: للأعضاء المميزين والنشيطين - السبب: لنشاطه الكبير وجهوده الطيبه في خدمة الموقع
: 1

ابومبخوت الدوسري has a spectacular aura aboutابومبخوت الدوسري has a spectacular aura aboutابومبخوت الدوسري has a spectacular aura about


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

بِسْم الْلَّه الْرَّحْمَن الْرَّحِيــــــم

بِدايَتاً اشْكُر الْشَّاعِر / مُنْذِر ابْن حَمْد ابْن رَشُوْد عَلَى اتاحَة الْفُرْصَه لِمَوْقِع قَبِيْلَة الْدَّوَاسِر الْرَّسْمِي لِلْتَعَرُّف عَلَيْه عَن قُرْب فِي هَذَا الِّلقَاء الْشَّيِّق وَالْمُمْتِع وَاقُوَلُّه صَح لِسَانُك وَاعْتَلَى شَانِك شَاعِر جَزْل وَاتَمَّنَّى لَك ان شَاء الْلَّه حَيَاة سَعِيْدَه وَالْلَّه يُوَفَّقَك وَيُبَيِّض وَجْهَك وِيُن مَا وِجْهَة .
و بِخَالِص الْشُّكْر وَالْعِرْفَان اشْكُر إِدَارَة الْمَوْقِع وَالاْخ الْعَزِيْز /فَهِد الْغُرَيْرِي عَلَى هَذَا الِّلقَاء الْجَمِيْل وَالْمُمْتِع مَع الْشَّاعِر وَبَيِّض الْلَّه وجِيهُكُم عَلَى مَجْهُودِكُم الَطْيِيب وَالْمُبَارَك .

 

 

 

 

    

رد مع اقتباس
قديم 10-04-2010, 02:53 PM   #11
 
إحصائية العضو







دغش محمد الصخابرة غير متصل

وسام الدواسر الذهبي: للأعضاء المميزين والنشيطين - السبب: لنشاطه الكبير وجهوده الطيبه في خدمة الموقع
: 1

دغش محمد الصخابرة is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

الله يعطيكم العافيه لقاء ولا اجمل وقصائد جزله

لقاء طيب لشاعر منذربن حمد الشكرة

بالتوفيق

وشكر خاص للاخ ابو راشد ولاهنت على لاختيار الجميل....

 

 

 

 

    

رد مع اقتباس
قديم 10-04-2010, 03:34 PM   #12
 
إحصائية العضو







معزي غير متصل

معزي is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

بيض الله وجيهكم ... عز الله نعم ماخترتوا شاعر جزل بما تعنيه الكلمه

 

 

 

 

    

رد مع اقتباس
قديم 10-04-2010, 05:26 PM   #13
 
إحصائية العضو








محمد بن حمد الشكرة غير متصل

وسام الدواسر الذهبي: للأعضاء المميزين والنشيطين - السبب: شكر وتقدير
: 1

محمد بن حمد الشكرة is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

الله يبيض وجهك ياابو راشد على هذا اللقاء الطيب والمبارك مع أحد شعراء القبيلة الشباب /منذر بن حمد بن رشود الشكرة وانا اتشرف بمعرفة ابو حمد وعز الله ونعم الخوة والرفقة وقصايده جزلة واستمتعنا في قرائتها والاطلاع عليها وشهادتي فيه مجروحة وعسا الله يوفقه في حياته ويطول بعمره

تقديري ,,,,

 

 

 

 

 

 

من مواضيع: محمد بن حمد الشكرة

0 دعوة عامة من الشيخ / محمد بن زيد بن جريس الخييلات لحضور ملتقى قبيلة الخييلات
0 ياهـل الموقـع إلــي عنـدنـا غـالـي
0 مرشحي قبيلة الدواسر لإنتخابات نادي السالمية بالكويت-قائمة أبناء النادي
0 وزير التجارة يعين المهندس شويمي الكتاب المصارير عضوا بمجلس إدارة الغرفة التجارية بالخرج
0 سوف بعرض مساء اليوم الجمعة 19/11/1433هـ حفل تكريم الشاعر / نايف بن مسرع الدوسري بمناسبة مشاركته المشرفة في برنامج شاعر المليون للموسم الخامس على شاشة قناة الدانة

التوقيع




الى جنات الخلد يا بو فهد
أسأل الله ان يرحمه رحمةٍ تطمئن بها نفسه وتقر بها عينه
أسأل الله العظيم رب العرش الكريم أن يغفر له ويرحمه ويسكنه فسيح جناته


m.h.s502@vip.cn






    

رد مع اقتباس
قديم 10-04-2010, 07:52 PM   #14
 
إحصائية العضو







راشد المسعري غير متصل

راشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud of


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

اقتباس:
كـل رجـل" لا ظـهـر صيـتـه حكـوبـه=وافـــي" مـبــداه يــجــرح كــــل هــافــي
مـن شمـال الـدار وألا مــن جنـوبـهذاع صيـتـه= والـوفـا مــع كــل وافـــي
والرخـوم أن شافـوا الطيـب هـزوبـهيحسبـونـه= غـافـي ومـاهـوب غـافـي
كـــل لاش" مـاتـلــد الـعـيــن صــوبــه=مــيــر عــــزي لـلـرخــوم وللـضـعـافـي
صح لسانك يابو حمد وشاعر جزل ورجال كفو من رجاجيل كفو

لاهنت يابو راشد على هذا اللقاء المميز مع ابو حمد

وبإذن الله إن هذا بداية المصالحة مع الإعلام من خلال هذا المنتدى

تقبل ودي وتقديري ،،،

 

 

 

 

    

رد مع اقتباس
قديم 27-04-2010, 07:02 PM   #15
 
إحصائية العضو







ابوعبدالعزيز غير متصل

ابوعبدالعزيز is on a distinguished road


افتراضي رد: الشاعر منذر بن حمد بن رشود آل هشام الشكرة في لقاءٍ (أدبيّ) مع الموقع الرسمي لقبيلة الدواسر العريقة .

الله يصح السانك يابن رشود

ابداع في القصيد والثقه في النقس

ما شاء الله عليك ونعم فيك وبربعك الشكره


والشكر للاداري الفذ فهد الغريري على اتاحت الفرصه

لكي نتعرف على الشاعر منذر بن رشود


الله يوفقكم

 

 

 

 

 

 

التوقيع

دواسر كنيوا علـى دوسـر العـود***اهل الفعول مطوّعـة كـل فسقـان
حنا الدواسر طيبنـا ترثـة جـدود***متوارثينـه مـن مناعيـر جــدّان

    

رد مع اقتباس
إضافة رد


الذين يشاهدون محتوى الموضوع الآن : 2 ( الأعضاء 0 والزوار 2)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

 


الساعة الآن 08:18 PM


Powered by vBulletin® Copyright ©2000 - 2024, Jelsoft Enterprises Ltd.
---