الفارس والشاعر سعد الفصام المسعري(جلحان)

**معلومات** **العضو** · 25-02-2007, 10:27 AM

السلام عليكم ورحمة الله وبركاته

اولا احب ان اسلم على الجميع

واتشرف بالانظمام لهذا المنتدى مع ابناء عمي وقبيلتي العزيزه المنيعه
ويشرفني ان اشارك بهذا الموضوع في اول محاوله لي لاثراء هذا المنتدى الراقي

واتحدث هنا عن قامه شامخه ومشرفه من ابطال وشعراء الدواسر

وهو الفارس والشاعر سعد بن مدوس الفصام المسعري الدوسري .. الملقب ب(جلحان)

ويقال ان سبب تلقيبه بهذا اللقب انه نطق بالشعر في سن صغيره جدا .

واعتذر مقدما عن قلة المصادر اللتي لدي عن هذا الشاعر الفذ
ولكن( الجود من الموجود)

نسبه :
هو من فخذ الفصاصمه من المساعره عيال صهيب بن سالم بن زايد ال زايد الدواسر ..كما ورد في كتاب( واحة الشعر الشعبي) لعبدالله بن حمير بن سابر

هو شاعر وفارس شارك في كل فتوحات الملك عبدالعزيز في جنوب المملكه والحجاز وهو صغير السن
وله مواقف تشهد له في الشجاعه وقد ابلى البلاء الحسن في هذه المعارك اللتي ورد ذكر بعضها في قصائده .
وقد اشتهر ولعه بالقنص والصيد .. واشتهر عنه حسن الخلق والكرم والشهامه ..كباقي افراد قبيلته الطيبه .
وله مساجلات ورديات مع شعراء عصره .
توفي عام 1407 ه .. وله من العمر 80 عاما تقريبا رحمه الله وجميع موتى المسلمين.

ومن قصائده الشهيره ::

ياناشد عنا ترانا هل الخير *** هل ديرة من قل ماله نحرها

حنا الدواسر مكرمين الخطاطير*** امدارنا نعطي حلاوي ثمرها
وصحون تقدم للوجيه المسافير *** من كثر ماتعبا تنادي سفرها
حضر ليالي القيظ وان جا المخاضير***بدون نطرد بالوسامي زهرها
نهد بالكلب السلوقي وبالطير***نسجها من برها اليا بحرها
بخيل الى شدوا تباري المظاهير***من جا يبينا جظ لاشاف اثرها
بربعي هل الشول الصخاف المعاشير*** الاد مسعر مايغور ظفرها
دون العشاير مانهاب الطوابير***الروح ماندرا بها عن خطرها
ايماننا ترمي بسو المقادير***مسمومة بالموت لا الله ومرها
تهدي شلاشيل الرماح القناطير***شلف يغرق دمها من عصرها
لاقلت الاريا وعمس الاشاوير***زيزومها ابن قويد يظهر خبرها
في ترثته من يحتمل للمخاسير***المرجله ياطون كايد وعرها
وقت مضى والوقت ذا فاتحة خير***عبد العزيز اللي بحكمه عمرها

وهذه بعض الابيات اللتي قيلت في رديه بينه وبين الشيخ فيحان بن صامل من اشراف رنيه
(وهو ممن ساهم مع الملك عبدالعزيز رحمه الله في بعض حروب توحيد المملكه)
وقد قال الشيخ فيحان بن صامل هذه الابيات من ضمن قصيده في فتح تهامه والساحل وجيزان:

يقول الشيخ فيحان :

اول بادي مانقول *** صلاة على الرسول
عدد مالزم الحجول*** واطاف بالبت الحرام
الى ان يقول:
تقدم خالد في جيشه ***متغانم لابها قدام
(يقصد به الشريف خالد بن لؤي)
....
نعم والله بالاخوان ***اهل اليمن واهل الشام
ابو لعثه في قحطان*** وابن مشيط في شهران
والمتحمي مع جرمان*** والاد زايد لقدام
واهل بيشه والبقوم *** واهل المواتر عموم
قالوا جيزان ملزوم***لهم تثناة السلام
وامدح لك اهل اللنج *** كنهم مسقين في بنج
فكوا محابيس الشنج *** طقوهم طقة دهام

( اهل اللنج ..يقصد بهم الدواسر بقيادة القائد فراج بن نادر من امراء ال حنيش الوداعين ..وكان قائد غزية من الدواسر .. فقد كان اهل جيزان ساجنين فهد بن زعير واخوياه بنية قتلهم لكن الدواسر اقتحموا عليهم السجن وفكوهم)
ربع مقودهم فراج *** ماهابوا ضرب الامواج
والمدافع ماتحتاج *** الحق فيهم يالفصام
والقصيده اطول من ذلك

ويرد الشاعر جلحان الفصام معارضا قصيدة الشيخ فيحان بن صامل :

ركبنا لنج بحركات *** يقطع غزير الغبات
(يقصد باللنج : جيب الرنج )
مشينا فيه وسافرنا *** من جده ليلة الاثنين
عايض مشى مقود قومه *** نعم جمع هو زيزومه
كلن يظهر على جنده *** ترى الظفرين منجين

(عايض : هو الفارس عايض بن حميدان بن درعان)

الى ان يقول :

ركب ابن درعان بابور *** والفى مع ملفاه النور
توسعنا عقب الضيقه *** قدنا عليهم شفقين
جونا واعتصمنا بالله *** واستشهد منا عبدالله

(يقصد بعبدالله: عبدالله بن صقر بن درعان امير الولامين من الوداعين)

لعل الجنه ماواه ***يبني له فيها قصرين
في المكان سعد وسعود *** ربع في محل الجود

(سعد : هو شقيق عبدالله , وسعود : هو ابن عمهما)

كل منهم طير نادر *** عساهم نصر للدين
ابطينا وانا وياهم ***لاجونا قمنا نركاهم
ناخذ عليهم ساعات *** ذبحنا منهم تسعين
سعد يضربهم بالفرد *** وسعود يطردهم طرد
كل منهم نعم الشارب*** للحربية شوكت عين
كل منهم يزهم لاخر ***وعبدالله محزمهم لاخر
ياسعد اللي هم ربع له ***كنهم دولة سلاطين
نعم ياترثة درعان *** حرار مجنى حوران <---- كفو والله
لاقلته ماني بمكذب ***قول على الفعل زين

سعد يزهمني وابطيت *** والله وبالله ماوصيت <----- (يقصد ان سعد يناديه ليخبره باستشهاد عبدالله)

ادعوا على من تتقى *** لاجا شوف العين العين

(يقصد بهم بعض الاشخاص من بعض القبائال اللذين يتتقون من المواجهه)

علمني قمت وبكيت *** وصديت عنهم واغضيت
تمنيت اني في جنبه *** على حكم الله راضين
كل قام يتتقى فينا *** صبرنا حتى والينا
حطينا منزلنا الطارف *** صوب الحريب موالين

هذي علينا مخصوصه *** مارية كل ونقوصه

(يقصد انه هنا في هذا الموقف يبين الفعل صحيح وليس مجرد الكلام ! والمهايط !!)

ماجا ذبح الا فينا *** يومنا للضو مصالين .

وله هذه الابيات من فن العرضه يقول :

يالنشامى اسمعوا لاجات من يمي *** لي كلام مليح وانفتح بابه
ذا كلامي وانا به كنت مهتمي *** العبوا به تراه يشوق لعابه
ياسلامي عليكم كلكم لمي *** مرحبا ياحضور الفين ترحابه
ياسلامي عليكم يابني عمي *** كل قرم حضر وانا درينا به
ياسلامي على اللي موقفه تم ***الردي جنبه والطيب يشقى به
لابتي في الحرايب تنثر الدم *** ويل منهم عدو له وحرابه
من حربنا سقينا كبده الدم *** وان صلحنا كما السكر لشرابه

وله قصيده ايضا على وزن العرضه يمدح فيها ابن كليب ..
وارى ان القصيده جميله جدا في وصفها (ركز على وصف السحاب في القصيده وهو مايدل على شاعرية هذا الشاعر العملاق)
يقول فيها :

غابت الجوزا ودنى على ثرها الرقيب *** واتنبا من دياري ولاجاني قطاب
يامجيب الداعي انك لعبدك تستجيب *** استجب لي يامنشي مراديف السحاب
يالله اني طالب منك في ليل عجيب *** مدلهم مردف مثل الهضاب
يضبط الفرعه ويمطر عليها مايهيب *** من ضدا اليا مكرش الدحي يجرح في الرغاب
سيل الهدار ماقالوا ان سيله جذيب *** فيض القلبان واشبت وجا فيها شباب
للبديع انحى وهو بارقه يلعب لعيب *** الطفل منه يتعزل ويشبك في الرباب
<------(صوره رائعه في وصف السحاب)

راح لابن كليب كثر عليه من الصبيب *** حقه البيضا مع اللي يسوقون الركاب
والله اني في كلامي على حق مصيب *** سبل الما والنخل يقطعه لو هو حباب

وهنا اورد قصيده للشاعر عبيد ابن حمدان بن عجعج الدوسري يذكر فيها الفارس سعد الفصام (جلحان)
ويمدحه فيها يقول ابن عجعج :

راكب(خمسة عشر حايل) امتيهات *** توهم غفل معفات ماجن بالحوار
رعيهن لازاف عشب رعن زين النبات *** دايما ولف يحبن مطامين الزبار
لين جات احجوزهن والحصاير مايلات *** واصبحت ماهمها الجري وابعيد الديار
كن وصوف اوروكهن والوسوط مخمصات *** ضمر في غاية الركب لبعيد المزار
من حرار اعمان كم قربن بعد الفلات*** كاملات وافيات بتوصيف العمار
ماحلاهن كلهن بالصرايم والمات *** كاملات بالكلايف على شف الغمار
هيه يالركاب شيلوا عليهن بالزتات*** وافهموا هرجي وردوا علي قبل الثوار
وانحروا (جلحان) حامي عقاب الجاذيات *** عيدهن لا مااقبلن من يمين ومن يسار
لالفن (جلحان)قلط ادلال متعبات *** دايما تلقا ادلاله تباغش بالبهار
وافي خطه بكل العلوم الطيبات *** كامل هشهوش قرم وصيداته اكبار
بلغوه ازكا سلاما من اعداد السامرات *** او عدد ماهبت النود في ليل ونهار

وهناك له قصيده في مدح الوداعين اثناء معركة القوات السعوديه في حرب اليمن
اذكر منها بيت واحد (واعتقد اني اخطات في بعض مفرداته في الشطر الاول)

يقول :

يوم ثارت المعركه واشتبك بارودها *** دوموا فيها الوداعين مرخصة العمار

واخيرا اضيف ان الكثير من شعر هذا الشاعر للاسف ضاع ولم يجمع
واتمنى على اقاربه جمع شعره في ديوان خاص به لحفظه من الضياع لاني اعتقد انه مازال بالامكان ذلك حاليا لانه مازال بعض الرواة من كبار السن يحفظون بعض شعره .. قبل فوات الاوان .

(والعذر والسموحه على عدم ترتيب النصوص)

.

**معلومات** **العضو** · 25-02-2007, 11:26 AM

تسلم يمناك يالقرم

جعل ما يجيها العطب

و بيض الله وجهك على هذه النبذه الطيبة عن
علم من ابرز اعلام الدواسر

الله يرحمه

**معلومات** **العضو** · 26-02-2007, 12:24 PM

مشكور ياولد عمي الودعاني على مرورك العطر
واتمنى دائما ان اشارك باللي يبيض الوجه

**معلومات** **العضو** · 26-02-2007, 01:44 PM

لاهنت وبيض الله جهك على الموضوع

والله يرحم ابن جلحان

**معلومات** **العضو** · 26-02-2007, 08:22 PM

ونعم مليون

بيض الله وجهك يالقرم ولاكن الاترى ان هناك خطء في سلسله النسب

ذكرت صهيب بن سالم

والصحيح هو صهيب بن زايد

وصهيب اخ سالم لا ابنه

اخووووووووووووووووك

ابو زيد

**معلومات** **العضو** · 26-02-2007, 10:29 PM

مشكووووووووور اخوي ابن محمد الودعاني على مرورك العطر

**معلومات** **العضو** · 26-02-2007, 10:35 PM

صدقت اخوي ابو زيد .. وجل من لايخطئ !

ومشكوووووووووووووور لتنبيهك على الخطا .. لكن ذالحين فات وقت التعديل

وتنويهك يكفي ويوفي ياولد عمي .

**معلومات** **العضو** · 14-04-2007, 11:49 PM

الاخ العزيز

بيض الله وجهك وطول الله عمرك وجعل يمناك مايجيها العطب ياسنايدي

كفيت ووفيت جعل يفدونك الرديان

رحم الله الشاعر جلحان واسكنه فسيح جناته

لك جزيل الشكر

اخووووك

ابو زابن المسعري

**معلومات** **العضو** · 02-05-2007, 11:02 PM

الاخ حضرة جنابي .. اتحفتنا بهذا الموضوع النادر والقصص الجزله بيض الله وجهك

وياليت والله فيه اكثر لهذا الشاعر الكبير رحمه الله

**معلومات** **العضو** · 09-05-2007, 10:19 PM

بيض الله وجهك وطول الله عمرك وجعل يمناك مايجيها العطب ياسنايدي

كفيت ووفيت جعل يفدونك الرديان

رحم الله الشاعر جلحان واسكنه فسيح جناته

**معلومات** **العضو** · 07-06-2007, 02:50 AM

مشكووووووووورين لمروركم العطر ياعيال عمي ..وذا من طيبكم

وعسانا نشارك باللي يرضيكم وينول استحسانكم دائما

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الشيخ الفارس / فغران ابن منديل راعي الودايع	مجوي العمور	:: القسم الـتاريخــي الــعام ::	5	19-04-2011 08:55 PM
الفارس والشاعر سعد بن مدوس الفصام (جلحان )	حضرة جنابي	:: قسم أمـراء وفـرسان وأعـلام الـدواسـر::	3	25-01-2011 02:57 AM
مرض الفصام	domokh	:: قسم الأسـره والمـجتمـع ::	6	27-07-2010 08:47 PM

الذين يشاهدون محتوى الموضوع الآن : 2 ( الأعضاء 0 والزوار 2)

		منتديات صحيفة وادي الدواسر الالكترونية