أعلان أسماء الفائزين بالمسابقة الشعرية الرابعه للموقع الرسمي لقبيلة الدواسر :: ألف مبروك .. ألف مبروك .. ألف مبروك :: - ::: مـنتدى قبيلـة الـدواسـر الـرسمي :::

العودة   ::: مـنتدى قبيلـة الـدواسـر الـرسمي ::: > :::. الأقســــام الـخــــاصـــــة.::: > :: قسم مناسبات وأخــبار الـدواسـر ::

إضافة رد
انشر الموضوع
 
أدوات الموضوع انواع عرض الموضوع
قديم 02-04-2015, 01:45 PM   #1
 
إحصائية العضو







الإداره غير متصل

الإداره is on a distinguished road


افتراضي أعلان أسماء الفائزين بالمسابقة الشعرية الرابعه للموقع الرسمي لقبيلة الدواسر :: ألف مبروك .. ألف مبروك .. ألف مبروك ::




الحمد لله رب العالمين والصلاة والسلام على سيد الانبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته الى يوم الدين

إخواننا أعضاء وزوّار الموقع الرسمي لقبيلة الدواسر





أختتم مساء اليوم الخميس الموافق 13-6-1436هـ المسابقة الشعرية الرابعة لمسابقة الموقع الرسمي للقبيلة بمناسبة تولي خادم الحرمين الشريفين الملك سلمان بن عبدالعزيز مقاليد الحكم بحضور كبير من مشائخ وأعيان ووجهاء وأبناء قبيلة الدواسر إكتضت بهم القاعة ، وأسدل ستار الختام على المسابقة بإعلان النتائج النهائيّة للمسابقة الشعرية .

________________________________________________


أسماء الفائزين بالمراكز العشرة الأولى :



الفائز بالبيرق المركز الأول :فهد بن حسن الخضراني



قصيدة الشاعر فهد بن حسن الخضراني المشارك بها بالمسابقة :

من مدرسة حكّام نجد و مارثة عبدالعزيز=ترسخ مقاليد الحكم على تقاليد الولا

على العهد يبقى الولاء لك يالعزيز بن العزيز=نبايعك ياخادم البيتين قدام الملا

قريحتي فاضت وجاء للمدح في صدري نزيز=عنوانها حب و ولاء .. و أهديتها قدر و غلا

ياقدوة الحكّام من بين العرب والانقليز=رمز التواضع والعدل رمز السمو رمز العُلا

غيث الكرم نبع الوفا ساس السياسه والركيز=مضرب مثل لأنه مثل ماله على الارض إمثلا

قبل الحكم شرك وهدم ولا يعاز المستعيز =الظلم سايد واكثر العربان فالدين إجهلا

لين أقبلت من شرق سمراً ما تجض من الحزيز=خيّالها له هيبةٍ منها عدوّه ماسلا

هذاك ابوك اللي حكمها يوم للظمّر لزيز=هلل وكبّر وإستعان بخالقه جلّ وعلا

الخيل تصهل من سطر .. والارض صدّعها الهزيز=والسيف من ضربه تعشّى الطير وسباع الخلا

ومن فضل رب الكون والحكمه وفي وقتٍ وجيز=النور عمّ بلادنا .. والظلم والجهل إنجلا

مثل السنام اللي شمخ من بين متن وبين عيز=بنى بنى .. لين إعتلا .. ثم إعتلا .. ثم إعتلا

يا اطهر ثرى يا اغلى بلد من دونك الجمع الحريز=دار الرساله والنبي .. دار الكتاب المنزلا

والحاقد اللي جاء وصدره فيه من حقده أزيز=يعيش فالدنيا ذليل .. وفي ذنوبه مبتلا

فكرٍ يجيز الظلم والاسلام عكسه مايجيز=تكفير مسلم وانحلال وللمعادين إعملا

ياقبلة الاسلام دونك مانجيز ونستجيز=الذّل قلنا له بدا .. والموت قلنا له هلا

دون الوطن ياهل الفتن شعبٍ من حدوده يحيز=( حياة عز وموت عز ) .. أما كذا والا فلا


__________________________________________________ _____



الفائز بالمركز الثاني : الشاعر محسن بن تركي آل بريك



قصيدة الشاعر الشاعر محسن بن تركي آل بريك المشارك بها بالمسابقة :


لا اله الا انت ياموجـدً كـل الـوجود=ياعظيم الشان يامن عليك الأعتماد

دلّـنـي للكلمة اللي ترقيني سنود=ولـدّنـي من كلمة السوء يارب العباد

شاعرً يكبر بكبره غلا داره بزود=كل يوم وحب داره بقلبه فازدياد

عطر الله قبر عودً فرق عن كل عود=جعل سبّـار السحايب على قبره يقاد

يبو متعب رحمة الله عليك بلا حدود=عقب موتك طاحت دموع واستوجع فؤاد

وماقدر ينزع من الشعب طوق الحزن كود=سيّـدي سلمان زحل المواقف يوم ساد

العريب ابن العريبين من كل الجدود=الكريم ابن الاكارم ولد راع الشداد

فيصليّـن يضعف عضود ويقوّي عضود=حاكمن قدام يحكم وهو حكمه سداد

لاهرج يخرص ولامن وقف ميقاف طود=وهيبته تخلف موازين وعقولن رشاد

نصّب الحاكم بشكلً عمى عين الحسود=دون قتل وهدر دم ونزاعات وفساد

استلم بـيـده مقاليد حكم ال السعود=وبايعوه الشعب والي وحاكم للبلاد

بيعة موالين لاعاهدوا صانو العهود=شعب واحد قلب واحد اذا نادى المناد

بيعتن جات القبايل تأديها حشود=قادهم كبر الولا للملك من يوم قاد

نعمتن تستاهل الشكر منا فالسجود=ويفتقدها من تبدل بياضه بالسواد

فبارك الله في بلادن تولوها الفهود=شجرتن من تحتها الظل يلقى والبراد

الامان يسودها في ذرا حكم الاسود=والطمئنينة غشت شعبها في كل واد

والله انا كل ابونا لعيناها جنود=دونها ناقف بالارواح ونعدّ العتاد

وقفتن من ذاق منّـا قساها مايعود=يطمع الطامع ويرجع ذليلاً م استفاد

لين حتى خاين الدار والنذل الحقود=يحسب حساب التلاحم ويقنع بالقعاد

اطمئني يابلادي ملحفْـك الورود=سيدي سلمان يعني تهني بالرقاد



__________________________________________________ _______

الفائز بالمركز الثالث : الشاعر عبدالله بن سالم المسعري



قصيدة الشاعر عبدالله بن سالم المسعري المشارك بها بالمسابقة :

يابلادي قبلة المسلمين أرقي سنود=دامنا دونك والارواح لـ ترابك فدا

نعشقك عشقٍ يشرف ومقدارك يزود=فالقلوب مثبتينك على طول المدا

فيك مانرضى بدايل ولا نسمع جحود=من طمع في ذرةٍ منك قلنا له بدا

عانقي الامجاد والعود في عين الحسود=والله أنّا لك جنودٍ على صوت الندا

والحكم بعد الله يعود عند بن سعود=كل نجم يغيب يظهر بنجمٍ يقتدا

وآبتدى نجمٍ وضوحه على القمة يرود=من تقدا في شموخ أرتفاعه ماغدا

سيدي سلمان الامداح جعله فالوجود=حاكمٍ لـ سمه مكانه وتقدير وصدا

فيصليٍ في سماء المجد لفعوله شهود=دون حد الدار والدين وقف واحتدا

بالسياسه والعداله وتعزيز الجهود=شرب فنجال الصعايب على عز وقدا

اشهد ان به عود لا قيل للوقفات عود=هيبته فيها تذرى شيوخٍ وعقدا

أطمحت له مملكتنا ولبسها الورود=وأحتماها بالطناخة وعشنا برغدا

كنّه يقول افرحي بالفعايل والصمود=دام راسي حي وانتي منارٍ للهدا

ومن مقاليد الزعامه صدر بامرٍ يجود=ابشروا باللي تمنون مايذهب سدا

وكلنا له شعب واحد على قلبٍ ودود=بالتكاتف والتلاحم على الطيب حددا

والعدا نكسر شباها بضرب فالكبود=لين تعرف قيمة الأمن وتعيش زهدا

له أنجدد في ولانا ونوفي بالوعود=بسم خطلان اليماني محاربت الردا

نصرة معزي على الحق من عصر الجدود=أنحيا بفعول ونطول وأنموت أشهدا

ماخبر به دوسري حزت الواجب يحود=ننطح كبار الاسامي وندجر ونحدا

من قديمٍ عهدنا بالوفا ماله حدود=عهدٍ يخلد له إبطال ويغيض حسدا

والدواسر قبلة المدح وافين العهود=عزوتن يصدق وعدها وسمٍ للعدا


__________________________________________________ _____


الفائز بالمركز الرابع : الشاعر علي بن خميس الحراجين.




قصيدة الشاعر علي بن خميس الحراجين المشارك بها بالمسابقة :


للقصائد وجيه وللنشامى وجيه=الرجال محسوبه والقصائد جزال

يالله اللي عباده كلها ترتجيه=نعمة الأمن دمها يا عزيز الجلال

نعمة ماتقدر بالذهب والجنيه=مايعوض بها كثره ومال وحلال

الأمن في وطنا شي نحسد عليه=لانظرنا جنوب ولانظرنا شمال

نحمد اللي جميع الخلق منه وإليه=عزنا بسنة محمد وعزم الرجال

لين صرنا الى القمه بفكر نبيه=ولجميع الدول في الامن مضرب مثال

جعل ربي يبيح معزي ووالديه=سل سيفه وزال التفرقه والضلال

بالعزم والسياسه حصل اللي يبيه =خامس العيد يشهد بد كل الليال

وعقب الحكم اخو نوره لمنه وفيه=ندرن ما تروم الا طوال الجبال

خمسة من رحل منهم حكم من يليه=كل منهم بفضل الله حكمه عدال

لين جاء واحدن بالوصف ماله شبيه=صاملن في المواقف كل ماقال طال

نكتب الشعر فيه ويفخر الشعر فيه=في سمو المراجل في حميد الخصال

إيه سلمان شيال الثقيلات إيه=جعل يبقى لنا العاهل سنين طوال

الكرم فيه فطره ماهو بيدعيه=عون من جاء يشكي فوقه الوقت مال

فاتح الباب ماصكه وكلن يجيه=ذاه مشكي عليه وذاك شكاي حال

وكل منهم يروح وماحكم مرتضيه=راعي الحق حقه مآخذه بالكمال

السعد قدم عينه والفخر مكتسيه=وارثن طيب رأسه من عمام وخوال

له نجدد ولانا والوطن نحتميه=عهد لو زالت الامه بقى لايزال

والوطن والله انا لادعا نفتديه =يقدم العود دون الدار قبل العيال

والختام اطلب اللي كلنا نرتجيه=نعمة الامن يحفظها عزيز الجلال

_________________________________________


الفائز بالمركز الخامس : الشاعر عبدالله بن صالح الصليبي الحقباني .





قصيدة الشاعر عبدالله بن صالح الصليبي الحقباني المشارك بها بالمسابقة :


إنفلّ نظم الشعر وانهلّ شلّال=عذب وزلال وفاح زاكي عبيره
ياهاجسي لمصافحك سقت فنجال=مدّه على اللي قايدٍ له مسيره
"سلمان "سلْم وللمعادين سلّال=قامت تباشر به شعوب الجزيره
ميزان عدل وللشّرابيك حلّال=ومدّات جوده بالمكارم غزيره
به من سمات "معزّي" اطبوع و خصال =وله في روابي "نجد" مجد وبذيره
"الفيصلي" نهجه وللشّرع ميّال=وان طالت الدعوى جعلها قصيره
زيزوم حرب وشمس للشعب وظلال=عن المكاره حطّهم في نظيره
لو مالت الدنيا عن الحق ما مال=الله أمَربه"للحرمين" خيره
متسلسلِ من ترثة ملوك وابطال="آل السّعود" اهل السّيوف الشّطيره
اللي حموها كلّ ما اهتزّ زلزال=لين ركدت وأضفوا عليها السّتيره
أمن "السّعوديه" غدا مضرب امثال=من فضل ربٍّ عالمٍ بالسّريره
للعلم والتعليم مستقبل اجيال=نورٍ يشعّ ويكتسي كلّ ديره
والأمر بالمعروف والنّهي لا زال=شعار ما نرضى يبدّل بغيره
هذي وصيّة من فقدناه رحّال=كل الضّماير ما شكَت من ضميره
ذاك "ابو متعب" مسّها بقيد وعقال=لين استوت وامست عيونه قريره
يالله عساه بجنّة الخلد نزّال=ويبقى لنا"سلمان"عقبه ذخيره
"ابو فهد" كفوٍ لتحقيق الآمال=ووليّ عهده في النّوايب خشيره
"مقرن" الا اصطكت من الجال للجال=السيف الاجرب ينزعه من جفيره
و"محمد النّايف" اذا استشهب الّلال=الموقف الكايد بفكره يديره
صلاة ربي عدّ ما هلّ همّال=على النّبي ما دارت المستديره


__________________________________________________ _

الفائز بالمركز السادس : الشاعر عبدالمجيد بن شجاع آل بريك



قصيدة الشاعر عبدالمجيد بن شجاع آل بريك المشارك بها بالمسابقة :


لاطغا فيض المشاعر نوردها القراح=وابتدي في مطلع القاف ياعل وعسا

هيمنة صنّاع الامجاد ماترضى المطاح= واسم عشّاق المفاخر لسلمان اكتسا

كوكب الروس الشهيرة ورواد النجاح=كلهم فوق النجوم و لسلمان أجْلسا

قادنا سلمان للعز بعزوم وكفاح=مانسا شعبك سواياك والله مانسا

مثل مايحكم بلادة على دين السماح =حاكم عرش الزعامة باحنكة وبقسا

حقق لشعبه عداله وساوى واستراح=لين الامن اضفا سدولة على رجال ونسا

العضيد لستت ملوك بالنهج المباح=المليك السابع الى على عرشة رسا

بينهم حكم البلاد يتنقل برتياح=دون قتل وهدر دم وصراعات وأسا

يوم بتنا تحت حكم وعلى نور الصباح=اعلنو حكم جديد بعد حكم المسا

ذي مقاليد الحكم تحت حكمك ماتزاح=والوطن من كاس حبك تجرع واحتسا

ونعلن البيعه جهار ونلبسها وشاح=بيعه بعناق شعبك ومن خان يخسا

بالمنابر يسطع الحق حيا ع الفلاح=قبلة الاسلام نور على العالم كسا

ماتزعزعنا الخفافيش واصوات النباح=وماشحنا من عيونة عن الحق عمسا

عولمة عصر التطور وحجه الانفتاح=ماتنسينا مبادي فخر ماتنّسا

الدول من حولنا بين ضوضاء وصياح =و كل يوم به مراسيم تنصيب ريسا


__________________________________________


الفائز بالمركز السابع :الشاعر سالم بن ودان النتيفات




قصيدة الشاعر سالم بن ودان النتيفات المشارك بها بالمسابقة :


بـاللـه البادي ’ المبدأ عـزيز الجلال=مـالك الـملك وحـده ،، نعـبد ونستعين

الحكم والولاء له / ثم وافي الخصال=حاكم الـمملكة سلمان حامي العرين

يا عوضـنا بفقـدٍ ،، يتعـب الاحتمال=رحمـة اللـه عليـه : وكـلنا راحـلين

يا عدو المحال .. ويا رسوخ الجبال=يا دليل المكارم ’ يا أثمن من الثمين

يا حميد السجايا ، يا مهيب الرجال=يا عـوين الضعيـف اللي بليـا عوين

يا كفيل اليتامى ،،، يا القـراح الزلال=يا حنان الأبوة ,,, يا سرور الحزين

بك تشوش العزاوي فـالأمور العضال=وأنت / رجوى العروبة كلها أجمعين

كيف لا , وأنت صاحب نظرة الاعتدال=كيف لا ، وأنت سيف العدل دنيا ودين

كيف لا .. وأنت شيال الحمول الثقال=كيف لا : كيف لا .. يا خـادم الحرمين

أقرب حدودك / أبعد من حدود الخيال=وأبسط فعولك / أرهب طغـمة الطامعين

مجمل الشعر : بأسمك عانق الأكتمال=من لسانٍ،، صدوق ومن شعورٍ،، رزين

الدواسـر معك في كـل ’ حال ومحال=تحت رهن الأشارة ، كلهـم حاضرين

فـدوةً لك جنـوب وفـدوةً لك شمال=سيدي سمعٍ،، وطـاعة بعسرٍ،، ولـين

يا بلد سارعـي .. وأمجادنا ما تطال=منزلك فوق هام السحب : ما تنزلين

تحت حكم الملك سلمان وافي الخصال=موطني : عشت فخر وذخر للمسلمين


________________________________________________

الفائز بالمركز الثامن : الشاعر مسلم بن فهد المصارير .




قصيدة الشاعر مسلم بن فهد المصارير المشارك بها بالمسابقة :


لا إله إلا الله الخالق الحق القدير=ما لنا من غير قوته حول ومقدره

بين تقصير العباده وتأنيب الضمير=من خطانا نطلبه عفوه ونستغفره

والشعر قدّام من يارده بحرٍ غزير=وكلٍ يصوغ القوافي على وزن بحره

وشاعر مثلي هجوسه تهيم وتستثير=كل قاف جزل لمن اتركا له يصخره

في سمو اللي سموه عن الحكام غير=اكثر الحكام بيموت مايسوى ثره

الملك سلمان والعز منقطع النظير=منهجه يقدم على الطيب ويجيب خبره

فزعته يروي بها الرمح والسيف الشطير=ومدته يغني بها اللي رحا الوقت افقره

سيدي سلمان سلمان معكاز الضرير=بعد ربي لاوقف له يعود اله نظره

فزعة المضيوم عون الضعيف المستجير=خادم البيتين ياجعل ربي ينصره

تحت حكمه مملكتنا تبشّرنا بخير=دام ليله لجل عين المواطن يسهره

بايعوه الشعب كله على حث المسير=الولا يامكبره والغلا يامكبره

مانبيع الدار مهما يصير اللي يصير=كل شيٍ في سبيل الوطن مانذخره

والعدو لامن نوانا نطوّح بالجفير=دون حد الدار يالنصر ولاّ المقبره

ديننا الاسلام نبقى على الحق المنير=لو خسرنا اروحنا ديننا مانخسره

والتلاحم بيننا من فضل ربي كبير=الصديق نفرّحه والمعادي نقهره

والامن نعمه والانعام من ربي كثير=فضل ربي واجب إنّا جميعاً نشكره


__________________________________________________ __


الفائز بالمركز التاسع : الشاعر سعد بن محسن المسعري .




قصيدة الشاعر سعد بن محسن المسعري المشارك بها بالمسابقة :


ياوجه الملام الشعر ما يحسن التعبير=عن اصدق شعورن مايصيغه فصيح لسان

شعورن على كف الولا ما يبي تفسير=من اوفى شعب لـ اعظم ملك بأشرف الاوطان

بـ عين الحزن حبر الوفاء سطره تسطير=مقامٍ بصدق الوقفة ، يغـالب الاحزان

فقـدنـا مـلك والحـزن لا شـك لـه تـأثير=والاحساس بين البيعة وفقدنا شتان

لكن ماحصل في بيعة قلوبنا تاخير=دموع الوفا بعيوننا !! بايعت سلمان

واذا بايعت سلمان بالعرف والتقدير=ولاها يبايع كٌل ، اوامرّه بالعرفان

غـلا ما عطت اقلوبنا !! الا ملوك الخير=وحنا مع املـوك العروبة نعيـش اخـوان

ايلامن خذا منهم مصير الممات امير=من احساس عدله كن ما فالحياة انسان

ويخلفّـه منهـو فـوق هقـواتنا واخـير=على منهج السنة ،، ودستوره القـرآن

على سيره معزي ملوك البلاد اتسير=وشعب الوطن يمشي على سيرة الجدان

ولآهــم له ،،معـزي،، براس البـنان ايشـير=ولاءٍ ، يتـرجم هيبـة الشعـب والسلطان

تكاتف مقامه ماخضع تحت حكم الغير=يوم ،اٌستعمرت في مامضى ! معظم البلدان

وحنا نكـمـل سيـرة المـجـد والتـعـمـير =وعن حدها يـوم الـوغـى ، ندحـر العـدوان

لو نعيش ما نملك بها ،،كن عقال بعير،،=يساوي بنظره شعبها اللول والمرجان

بلـدنا وهبها ربها حشمة وتوقـير=اذا خصها باعظم شرف مهبط الفرقان


واذا بالفخر كلٍ يشوف ان بلاده غير=بلـدنا منار الحق في عين كل انسان


_______________________________________________


الفائز بالمركز العاشر : الشاعر حجاج بن تميم الخضراني .




قصيدة الشاعر حجاج بن تميم الخضراني المشارك بها بالمسابقة :


ابتدي بسم معبودً كريمً مجيد=خير ماقد بدا فالمبتدا كل باد

الله اللي يدبرني على مايريد =جل شانه بسط سبعً وسبعً شداد

يوم جالي مجال وزان بدع القصيد=انتقيت البيوت النادرات الجداد

اختصر واوجز المعنا واقلل وازيد=علّها تسلم النقاد والانتقاد

مايفك الحديد الا قوي الحديد=ولايدسم عشاه الا طيور الهداد

كل شاعر مشارك يعتبر مستفيد=جمل الله مقامي في عيون العباد

فكرةً من حكيم شعور رايه سديد=اعتزينا لها والنار خشم الزناد

كل عامً جديد تجي بثوبً جديد=مهرجانً نبايع به ملوك البلاد

كيف مدري لكن يوم الاسى يوم عيد=غاب غالي وجا غالي وراعي شداد

ارتحل قايدً له فالسياسه رصيد=رحلة العمر قضّاها كفاح وجهاد

واستلم منصبه سيد للاسياد سيد=انتخى مارتخى واخلص وجدّ واجاد

راح ابومتعب وحبه بدم الوريد=وحلّ سلمان ابو الاحسان والخير زاد

طوّل الله بقاه وجعل عمره مديد=حاكمً هيبته يهتز منها الجماد

الكرم فطرةً له مايمد الزهيد=مثل صادق خيالً هل بارضً حشاد

الحمامه تغني فوق خضر الجريد=وداعي الخير من فوق المنابر يناد

واندحر كل شيطانً لعينً مريد=مفسد ويدّعي بانه حريب الفساد

العرب بينهم فتنه وباسً شديد=والوطن من فضل ربي يذعذع براد

النوايا سليمه والهقاوي بعيد=والقصيده ختمناها بمسك وزباد



_______________________________________



قبيل الختام ، فإننا نعدكم بإذن الله تعالى بطرح تغطية مصوّرة لجميع أحداث الحفل منذ إنطلاقته وحتى إختتامه وأيضاً بطرح تغطية تقريريّة عن الحفل خلال الأيام القادمة .


في الختام ، فإن إدارة الموقع الرسمي لتقدم خالص التهنئة لـ العشرة متسابقين الأوائل الذين تمّ إختيارهم من عدد كبير من المتسابقين الذي شاركوا بهذه المسابقة الشعرية الرابعة للموقع الرسمي للقبيلة . شاكرين بذات الوقت لجميع من شارك ولم يكن من ضمن لــ العشرة الأوائل الفائزين ومقدرين جهودهم الحثيثة التي قاموا بها من أجل المشاركة .




(صوت قبيلة الدواسر)
موقع قبيلة الدواسر الرسمي
www.alduwaser.org/vb



 

 

 

 

 

 

التوقيع


حسابنا في تويتر

@alduwaser1

    

رد مع اقتباس
قديم 03-04-2015, 01:24 PM   #2
 
إحصائية العضو







عبدالله بن شبيب ال بريك غير متصل

عبدالله بن شبيب ال بريك is on a distinguished road


افتراضي رد: أعلان أسماء الفائزين بالمسابقة الشعرية الرابعه للموقع الرسمي لقبيلة الدواسر :: ألف مبروك .. ألف مبروك .. ألف مبروك ::

الف مبروك لجميع الفائزين ويستاهلون كل خير

 

 

 

 

    

رد مع اقتباس
قديم 03-04-2015, 07:34 PM   #3
 
إحصائية العضو







عبدالله بن شبيب ال بريك غير متصل

عبدالله بن شبيب ال بريك is on a distinguished road


افتراضي رد: أعلان أسماء الفائزين بالمسابقة الشعرية الرابعه للموقع الرسمي لقبيلة الدواسر :: ألف مبروك .. ألف مبروك .. ألف مبروك ::

شكرآ خاص لكم يا إدارة موقع قبيلة الدواسر..... فانتم من تقفون دومآ وراء الإنجازات العظيمه .... وشكرا لكل من ساهم ومن دعم لنجاح المسابقه

 

 

 

 

    

رد مع اقتباس
قديم 06-04-2015, 12:25 AM   #4
 
إحصائية العضو







نآصر البدراني غير متصل

نآصر البدراني is on a distinguished road


افتراضي رد: أعلان أسماء الفائزين بالمسابقة الشعرية الرابعه للموقع الرسمي لقبيلة الدواسر :: ألف مبروك .. ألف مبروك .. ألف مبروك ::




بيض الله وجيه الشعراء المشاركين في هذه المسابقه الغاليه

والجميع فائز بمشاركة ربعه ومنافستهم ومعرفتهم

ألف مبروك لللشاعر فهد بن حسن الخضراني حصوله

على البيرق الخامس لمسابقة الموقع الشعريه يستاهل ،


بيض الله وجيه ادارتنا المحترمه على الحفل الختامي المميز للمسابقه

والله لايهيينهم على جهودهم ومجهوداتهم

 

 

 

 

 

 

التوقيع




استغفر الله لي ولوالدي وللمسلمين والمسلمات


المؤمنين والمؤمنات الأحياء منهم والأموات


    

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
التغطية المصوره لحفل المسابقة الشعرية الثانية بمناسبة تعين صاحب السمو الملكي الامير نايف بن عبدالعزيز ولياً للعهد الإداره :: قسم المسابقة الشعرية السنوية للموقع الرسمي لقبيلة الدواسر :: 15 09-03-2012 02:12 AM
التغطية المصوّرة للحفل السنوي الخامس لقبيلة الدواسر بإستضافة ورعاية الشيخ فيحان بن شجاع بن محماس بن سويلمه آل بريك حفظه الله ورعاه. الإداره :: قسم اللقــاءات والفعاليات والتغطيات الخاصة:: 39 30-04-2011 02:03 PM
مشائخ وأعيان وأدباء وشعراء قبيلة الدواسر وبعض ضيوف القبيلة (يثنون ويشكرون) على المسابقة الشعريّة الأولى للموقع الرسمي لقبيلة الدواسر الإداره :: قسم المسابقة الشعرية السنوية للموقع الرسمي لقبيلة الدواسر :: 9 12-02-2011 10:11 PM
التغطية المصورة لحفل المسابقة الشعرية الأولى لموقع قبيلة الدواسر الرسمي الإداره :: قسم المسابقة الشعرية السنوية للموقع الرسمي لقبيلة الدواسر :: 17 11-12-2010 11:09 PM
التغطية المصوّرة للحفل السنوي الثالث لقبيلة الدواسر بإستضافة ورعاية حسين بن براك آل حضيري المشاوية بدولة الكويت الإداره :: قسم اللقــاءات والفعاليات والتغطيات الخاصة:: 71 03-03-2008 02:25 PM

 


الساعة الآن 12:59 AM


Powered by vBulletin® Copyright ©2000 - 2024, Jelsoft Enterprises Ltd.
---