نشر هذا الموضوع في جريدة الرياض
يوم الاثنين 25 /2/1426هـ
العدد13433 صفحه12
(صرخة نداء) للصفح :
منذ خمسة عشر عاما والمواطن شافي بن مسفر الدوسري في سجن ينتظر القصاص بعد ان قتل صديقا له كان شافي يطلبه مالا. فحضر الشيطان بينهما في لحظة غضب وحدث ماحدث دون قصد .
ويناشد احد اقرباء القاتل ذوي القلوب الرحيمة واهل البر والاحسان باالشفاعة لدى اسرة القتيل والعمل بحديث المصطفى صلى الله عليه وسلم (اشفعوا تؤجروا)لأنقاذ حياة شافي الدوسري ليعيش ماتبقى له من عمر مع اولاده الخمسه الذين رزق بثلاثة اطفال منهم وهو خلف القضبان .
بثني على الله واذكره بالتسابيح=والحمد للي لمحلت يذكرونه
صرخةندا تزهم وتنخى من السيح=والخرج مما جاه هزت إركونه
يسوقها الرّعاد بسرع من الريح =يلقح سحابه والبرد في مزونه
من فوق ضلع طويق تقدح مقاديح =وتقول يالعربان ماتعتقونه ؟
سنجار جاوبها بربع زحازيح==ومن كان في وايل عسى يدركونه
حامت على يام العتيقة جوانيح= تنخى سنام الطيب وتنخى زبونه
ثم حدرت لقروم نجد السواميح== قالت عتيبة من عثر يرفعونه
ثم اعتلت لفهودها والمرازيح== اهل الوفاء قحطان مايذخرونه
وين الذي يرجح بها الطيب ترجيح== اهل الفخر والطيب هم يصنعونه
اصدورها للي نصوها فواسيح ==دواسر والكار هم يكسبونه
روس الجبال اللي حجرها مدابيح== لومرّها صوته يجيها ليونه
تنخى صناديد العرب والطحاطيح==وكل ابلج لابان شكله ولونه
خمسة عشر عام واهل بيته تصيح== محدنشد عنه ولاهم يجونه
القيد في رجليه ماله مراويح== وروابعه في السجن قامت تخونه
ياويح قلبه من هموم الزمن ويح==وياكثر دمع يذرفنه اعيونه
نزغه من الشيطان واليوم تصحيح==وانا اشهد انها ضربة في متونه
ماكان يقصدها ولاهي تجاريح==واليوم طايح هيضنّه اطعونه
اقدار ربي ماتبي زود توضيح==وسهم القدر محتوم لاتامنونه
في كل جمعه بين سجده وتسبيح==يسمع منادي الموت لايزهمونه
يامن عفى واصلح جزاه التساميح==من واحد يامر بكافه ونونه
في جنة الفردوس تشرب قراطيح==وماتشتهيه النفس واللي تبونه
اصفح ويصفح عنك يوم التصافيح==واجرك على اللي كلهم يرتجونه
لاد الحبيبي ربعنا يالمفاليح==تكفون يالظفران لاتذبحونه
لاد الحبيبي ربعنا يالمشاويح== له هقوة فيكم ولاهي تخونه
لاد الحبيبي برفع الصوت واصيح==ابكت صغير عادهم يرضعونه
لاد الحبيبي ياذرى كل زحزيح==رجّالكم تكفون لاتتركونه
انتم الباب الخير دايم مفاتيح== والشر من عاداتكم تغلقونه
انتم له اجبال حجرهاصلافيح== لامن ذكركم طاب كيفه ولونه
تضحك له الدنيا بزود ومصاليح== لامن ذكر ربع مطاليق دونه
للمعضله دايم فحول ونواطيح==نسمع نباكم والظفرتكسبونه
بنته من اللوعات تقوم وتطيح==تنخى هل الفزعات ماتنقذونه ؟
تنخى الذي من شبته هبّة الريح== عايض حجاها لانصته مهيونه
ابوه واخوانه عليها مصابيح== وتقول يالظفران لا لاتعدمونه
تسكب عبايرها قيام وتراويح==تطلب وتدعي ياعسى يطلقونه
عيونها بالدمع غرقا سوابيح== يااهل الحمايا ليه ماتحتمونه
يالله عساها في الفرج والتساميح=نرجي بشير الخير تمشي ضعونه
وتخزي لنا حسادها والمشافيح== تخفي معالمها تموت مغبونه
واليوم يوم الفوز كسب المرابيح==وعند الولي معروفكم تاجدونه
ونا نظمت الشعرنظم المسابيح==وجهي وجاهي ماذخرناه دونه
وصلاة ربي عد مازملق الشيح== على رسول كلهم يتبعونه
.
شعر/ عامر بن فالح ال أبو شنب الودعاني.
***************************************
وانا التغلبي ايضا اضم صوتي الى هذه الصرخة من عامر الودعاني جزاه الله خير
وكلي امل ان يتم الصفح وان يتدخلون الرجال المؤثرين محبي الخير في حل
هذه المعضلة عند المصارير..
ومن عفى وصفح فاجره عند الله كبيرومن اصلح ذات البين فاجره عظيم..
التغلبي// يوم الجمعة 20/ 3/