عرض مشاركة واحدة
قديم 06-02-2010, 04:39 AM   #1
 
إحصائية العضو








محمد بن حمد الشكرة غير متصل

محمد بن حمد الشكرة is on a distinguished road


:t-t-5-: سيرة الشيخ الشاعر/حفيظ بن عجب آل حفيظ

بسم الله الرحمن الرحيم


الحمد لله رب العالمين والصلاة والسلام على أشرف الأنبياء والمرسلين محمد إبن عبدالله قائد الغر المحجلين وإمام المجاهدين وعلى آل بيته الأطهار وصحبه الأخيار وعلى من اقتفى اثره ودعا بدعوته إلى يوم الدين ...


- سيرة الشيخ :حفيظ بن عجب ال حفيظ


حفيظ بن عجب بن فيصل بن عجب بن محمد بن فرج بن حفيظ الشكرة الدوسري يكنى بأبي عبدالرحمن ولد في مدينة الخرج وسط الجزيرة العربية سنة1392 هجرية
حصل على بكالوريوس كلية الشريعة جامعة الإمام محمد الإسلامية سنة 1416هـ، تخصص الفقه وأصول الفرائض، وهو عضو رابطة الأدب الإسلامية العالمية.
حاصل على شهادات في الإخراج والإلقاء والتعبير المسرحي بتقدير ممتاز، يعمل معلماً في المرحلة الثانوية بالخرج – مدرسة أبي بن كعب لتحفيظ القرآن الكريم وحافظ لكتاب الله تعالى ومعه إجازة بذلك.

صدر عن الشيخ " الذين كتبوا عن الشيخ الفاضل ":

1- قراءة غير عادية فى تجربة حفيظ الدوسري الإبداعية >>> أ. محمود عبد الصمد زكريا
2- براءة الضد الجميل (قراءة فى ديوان أغاريد العذاب للشاعر حفيظ الدوسري) >>> أ. محمود عبد الصمد زكريا
3- إطلالة على الملامح الفكرية فى شعر حفيظ الدوسري >>> أ. إبراهيم عباس غانم
4- المناهل الأثيرة فى شعر نابغة الجزيرة >>> د. عبد الحق مبسط

صدر له العديد من الدواوين منها: شوارد البيان، لحظات ندم، الأقصى والشرف، أنا وليلى، نجوم السماء، لغتنا والقتلة، سرطان العصر، أغاريد العذاب.


-قصائده


(1)

(حياة المعنا بالقيامه وبالبابين)

أنا لا بغيت اكتب من الشعر لي بيتين=ترامى علي الهم يشكي لي اظروفه
عذابي اليا جيت اتمثل ولو حرفين=تسابق دموعي بالعنا غير مكفوفه
حياة المعنا بالقيامة و بالبابين=دخل بالولادة والمنايا على شوفه
حسافه على اللي ضيع العمر بين البين=تعنا ولا حصل مع الناس مالوفه
غريب الوطن لوعاش به فارقه في حين=يعود على داره ولو طالت اسلوفه
شربت الكدر والصافي اللي يسر العين=وخذيت التجارب من هل العرف موصوفه
لو اننها تصفى لشخص(ن) صفت لاثنين=ولو انها تبقى لاحد كان محسوفه
مضت بالكرام اللي عليها علو بالدين=وقفت بخير الخلق ما هيب مأسوفه
عسى الله يقدينا الشلا والختام الزين=ويغفر ذنوب(ن) خافيه غير مكشوفه

(2)



مر الزمان وداعي القلب لباب= والعين عيّا لا يجيها سعدها
وتذكرت عيني زمان لها غاب= من عقب ما هي تستظل بسندها
على رفيق غاب من بين الأحباب= جاه القضا وأضحى دفين بلحدها
وقامت عيوني تذرف الدمع صباب = عليه حتى بان فيها سهدها
وتقول وين اللي من العام ما جاب =حلو القصيد اللي بيوته نضدها
وين الرفيق اللي لا هب هباب =عليك قام يذود عنك نكدها
ولا من بغيته حاجة وانت هياب = يعطيك لو هي زايدة في عددها
رجل عليه المخطية مالها باب =يجمح خطاك ولا يضره رعدها
لا قال الفصل ما هو بلعاب =ولا يعجبه كثر الكلام بفندها
كم قال لي يا حفيظ ماني بعياب =لكن ترا الدنيا طويل (ن) كمدها
نعيش فيها باحثين(ن) عن أسباب = ولا خبر فيها فانيٍ(ن) قد حمدها
ما شفت كم ضاعوا بها أحباب واقراب= وتفرقوا من عقب وافي وعدها
وصاروا بديد عقب ما كانوا أصحاب= صحبة وفاء ما ضاع منهو رصدها
عليك بالتقوى تراها لك حجاب =تحميك من نار تزايد صهدها
وعليك بالتوبة ترا الرب تواب =يغفر ذنوب العبد لو هو جحدها
يالله عساه بجنة الخلد شرّاب =يشرب من انهار تزايد مددها
ولا من شرب ما للضما عقب ما طاب=له من ثمرها سعد منهو وجدها
ويالله عسانا في حياة بها اغراب = والناس فيها ما تخلي حسدها
نلقى جزانا عند علام الحساب =في جنة الفردوس زايد رغدها



(3)

هات القلم يا ولد بيحت بالخافي= بكتب بيوت(ن) جديدات(ن) معانيها
للشعر عندي مظاهير(ن) ومشرافي= مرقاب عالي عسيرات(ن) مبانيها
شعري قراح الزلال ومشربه صافي= ما أكدره بالمعاني لين أصفيها
ما نيب في كل مجلس كأني الهافي= يهفي قصيده بمدح أنذال يرجيها
أبوي من سربة(ن) ميزانهم وافي = وجدي شبوب المعارك لانثنى فيها
اسمي حفيظ وفعل جداني الشافي = فزعة هل الخيل لا جاها معاديها
كم شيخ قوم(ن) سقوه الدم رعافي= خلوه في مثبره ما عاد يثنيها
يقول جدي وهو فالبيت ما حافي = قوله تصدق به أفعاله وتحكيها
حنا شيوخ العرب لا حافهم جافي =وحنا هل الراية العليا ونبنيها
فالشدة أهل السلاح الين نستافي= وعند الرخى راينا للناس كافيها
أهل الشيم والقيم للحق عرافي =ذباحة الحيل للضيفان نصخيها
فاللي ليا قال شعره ضاع فالقافي=لاعاد يكتب بيوته لين يحصيها
ياللي تروم المشاتي هاك مصطافي= تخير اللي تبي واحذر تواليها
ما نيب ذاكرك بسمك حيثك الخافي= تبيني اذكرك لين الناس ترويها
حكيم من كلمته سربالها ضافي = تستر عيوبه يلامن بان خافيها
أنصف من النفس درب الحق الانصافي= واحذر من النفس لا تتبع هقاويها
كم ضيعت من عفيف(ن) شاف ما عافي=وكم جرعت من عنا الدنيا بلاويها
يا هيه ياللي سلك درب الهوى حافي =لا تسهج الأرض و انعالك تخليها
حسب لموتك وعش دنياك متجافي=ترى السعادة بها تقديم ما فيها
وصلاة ربي على المبعوث بالصافي= سيد هل الأرض قاصيها ودانيها

(4)

أبدأ بذكر الله وأطيعه واشتري=رضاه واكفر بالشياطين الطغاه
حمد(ن) لك اللهم والشكر الثري=للواحد الديان معطي من دعاه
أنا اشكري(ن) زايد(ن) دوسري=جداني آل حفيظ عالين الجباه
جدي محمد بن فرج ليث الشري=ولسند بن فرج أنتسب من ذا وذاه
خيال ربدا والدهم تجري جري=هذا يدربها وذا يرهب عداه
أسمي حفيظ بن عجب من مفخري=بفخر بجداني مطوعة العصاه
من نسل حر(ن) صارمي(ن) نادري=عجب ولد فيصل ملبي من نخاه
ما احد(ن) نسى ضرب المزين بالصري=جدي عجب طقه وغيره ما رماه
راعى البويضا وافتخر بأني اشكري=ربعي عذاب الخيل لا ثار الغزاه
فرحان شيخ القوم والراي المري=ما احد(ن) نسى مجده ولا احد(ن) قد عصاه
راعى أم قعصوم المسمى والجري=فكاكها لا ضاعت اعقول الدهاه
وعبدالله الشيخ الشجاع المفتري=عذاب خيل القوم لا طري نباه
ومخباط سند(ن) يوم كل(ن) به دري=ذبح ثلاث من الأصايل منتقاه
ومحمد الدحام ركاب العري=ومسفر ولد سند المفادي في صباه
حنا هل الست وهل المجد الثري=لابة فخر والفخر فينا منتهاه
آلاد شكر أهل الحمية والقري=ذباحة العايل وسمه مع عماه
كم شيخ قوم(ن) وسدوه منثري=وآخر رجع مكسور مدهو(ن) ثواه
هم لابتي واقولها وأنا جري =من له مثل ربعي يطوح بالعباه
سلام يا اهل العز والعلم الطري=يا اهل الكرم والجود في كل اتجاه
سلام يا اهل الخيل والسيف الضري=لا سل من غمده يقطع من بغاه
شكر شكر والمجد من كسب اشكري=ترفع لنا البيضا على رووس النباه


-القصائد التي قيلت فيه:

(1)


يا الله يا عدال ميل الموازين =سبحان من بامره تهب الهبوبي
يا من بعثت آدم من الارض والطين= كنا عدم واليوم حنا شعوبي
تجعل تجمعنا على نصرة الدين = وتغفر خطايانا وتمحى الذنوبي
اعداد من حجو لبيته ملبين= غرب وشمال وشرق وايضا الجنوبي
يا مرحبا ترحيب كثر الملايين= قاله حفيظ وقمتنا عنه انوبي
حياكم الله عد وبل الودادين= لا اصتك جل المزن من كل صوبي
اليوم عيد وشوفكم صار عيدين= وثاني عياد الفطر صار امحسوبي
اسس لنا ابن حفيظ طلق الحجاجين= حفل(ن) عن جميع العيوبي
أما على ظهور الركايب مغيرين= بظهورهن ما احد(ن) يمل الركوبي
والا نحفظ اكتاب رب الثقلين = واسجد لخلاق البرايا واتوبي
سلام يا منصى الزحول الميامين = وضد الخصوم اللي اتيه الدروبي
ولد عجب لا صارت العشر ثنتين= يشرب فناجيل الشجاعة شروبي
شيخ(ن) ولد شيخ(ن) ومقدم سلاطين= وله موقف(ن) عند الرجال امحسوبي
يعطي ويعطى من عطياه وافين= يعطي بنات القود هن والجيوبي
قول(ن) صحيح(ن) ما يبي له باهين= ماهيب هرجة خبل والا كذوبي
له منهج(ن) يصعب على بارد العين= عبادة الدنيا كبار الجنوبي
ناس(ن) ورى الدنيا والايام لاهين =وكل(ن) غبوقه في اناه امحلوبي
لاهمهم زين(ن) ولا همهم شين= والله عجايب يا زمان العجوبي
اخوانهم يم العراق وفلسطين = عليهم اتشب الحرايب شبوبي
افطن وفكر وانتبه يا مسيكين=واخبر ترى الدنيا نصوب(ن) لعوبي
وين الزعيم اللي حكم شط نهرين= قبلك يقول أطلق شنب ما هقوبي
دارت به الايام من حين لا حين = وعليه طرن العذارى الجيوبي
يا مستمع خلك امام المصلين= وان جاء الجهاد اربط مع الوسط ثوبي
ذروة سنام المجد وين الفطينين= كرام السبال اللي تدل الدروبي
اللي على قطع المسافات ضارين= اهل العقيدة ثابتين القلوبي
ما يرتكي للحمل كون البعارين= والا ضعيف الراي يرغي طنوبي
وحنا بعون الله وحياه قويين= لو كان فالدنيا نجاح و رسوبي
ولا هنت يابن حفيظ طلق الحجاجين= حفلك نزيه(ن) عن جميع العيوبي

الشاعر/شايع بن مسلم الخضران

(2)

لا دك بي هاجوسي أخماس واسداس=وروابعن جتني مع كل طاقه
ذكرت قطاع الفرج يابس الراس=شيخن حجب جل المراجل ارواقه
طيبه غمر الادنى والاقصى من الناس=الاجناب وشيوخ العرب والرفاقه
يستاهل البيضا مع كل نسناس=اللي عشق رووس المعالي اعشاقه
البيض لك يا حفيظ حاضر ودراس=بيضن سواة الصبح عند انفتاقه
متورثن الطيب ساسن على ساس=بينك وبين الجد الاقصى علاقه
جدك راعى البويضا على قب الافراس=سقم الحريب اللي براسه حماقه
يوم التحدي يم هاذيك الاطعاس=خيلن وخياله وبندق وناقه
عج الرمك والهجن غادن له اقواس=يوم المزين ساقه الموت ساقه
وقف عجب مثل الجمل يضرس اضراس=وطق المزين بالكريزي وعاقه
قولن بفعلن يا مناعير نوماس=وقولن بلا فعلن سراب وبراقه
قلته وانا شاعر وشعري له احساس=وعندي على مدح النشامى لباقه
أغطس ببحر الشعر مع كل غطاس=واغرق مع اللي غارقن في غراقه
واطلع من الغبه كما طلع قرناس=وارمي هزيلات البيوت الدقاقه
والبس الطاروق حلوات الالباس=حتى يجي طعم العسل في مذاقه
غرايبن تمرس مع فكري امراس=ميرادها عدن غزيرن اعماقه
عنوانها ريح الخزامى وبسباس=واشعارها حليب بكرن فواقه

الشاعر/شايع بن مسلم الخضران


(3)



عند الدواسر هل الوقفات = ودي بجيبن يوديني
من همي اللي عليه اثبات= وان جيت ابغفى يصحيني
لو هي عليه انا بالذات= ما همني كثر ما فيني
لكن همي زهور وجات= من كبد كبدي تناديني
يبون مني لهم هقوات = ابني لهم عز بيديني
وش عذري ان كثرت الحاجات=والعمر ما عاد يمديني
وشلون ابصبر على العبرات= والدين همه يقزيني
سجين ولا اقدر على السجات= ما ني سجين السجاجيني
سجين همي بصدري بات= يمسي ولا اصبح يمسيني
وليا بغيت اقطع الفرجات= عيت ديوني تخليني
والقلب لا زادت الدقات= يذكرك يا بن السلاطيني
يا حفيظ يا طيب السيرات= يا حفيظ لالا تخليني
يا بن عجب يا كريم الذات= جيتك وشوفتك تكفيني
يا حفيظ لو حطو الشيخات= في كف شيخ الموازيني
كفتك ترجح من الميزات=شيخ وكريم الكريميني
جيت اشتكي لك من الشركات= اللي تمص الدماميني
ورطت معهم مع الورطات= اللي تهد الفهيميني
والاسهم اللي على الغرات= اخذت قلوب الكثيريني
تلعب على الناس بالشاشات= وضاعت صلاة المصليني
يا حفيظ يا حافظ العادات=يحفظك ربي وينجيني
يا حفيظ يا طيب الشبات=نارك تشب وتقديني
في ليلن اظلم من الظلمات= نورك على الدرب يضويني
لك طاله ان كثرت الطالات= ما مثلها فالعريبيني
يمنى طويله ولك هبات= تقصر يدين الضعيفيني
يا حفيظ يا شامخ الهامات= شجاعتك ورث جديني
عزيت دين الله بحزات= تشيب فيها الغلاميني
نصرت محمد عن الهزوات= قوم الكفر والشياطيني
يا جعلهم هادم اللذات=تاطا عليهم حذاييني
أكرمكم الله عن الهزوات= جعل الكفر للسكاكيني
حشمت ربعك ولك وثبات= فالطيب فقت الكثيريني
ربعك حزامك عن الصكات= قوم اشكره من عريبيني
يا طيبهم حزت النكبات= مثل الصخر والبراكيني
جمعت ربعك على الكرمات= ما غيرتك الملاييني
لو اتمنا من المنيات= والامنيه من يمنيني
انك عتيبي من الهيلات=و الا من الربع الادنيني
حظ الدواسر رفيع الذات= احفيظ حظ الحظيظيني
وعند الدواسر بدعت ابيات= و احفيظ منهم يكفيني
وصلاة ربي عدد من بات=واعداد موتى وحييني

الشاعر/ منصور بن حمود بن عبدالله العتيبي

(4)



يامرحبا ترحيـب بسـم المعازيـب=أبنا عجب مثل الرواسي والاهـرام
اهرام فوق الأرض بالطول والعرض=لاجا نهـارٍ ركـزت فيـه الاعـلام
اعلام مجد وجـد بالمـزح والجـد=تكتبلهم في صفحة المجـد الأقـلام
اقـلام للتاريـخ بسـم المطانـيـخ=حفيظ واخوانه وطير السعـد حـام
حام وخفق بالريش حـظ المداغيـش=ولاقام حـظ شيوخنـا حظنـا قـام
قام الهجوس يهيظ في ماقف حفيـظ=وان هاض هاجوسي فلاهوب ينـلام
ينلام من لاشاش راسـه ولا طـاش=فالموعـد اللـي ماتغيـره الايــام
ايـام بالتحديـد فـي ثانـي العيـد=واعوامهن عامين فاتـت وذا العـام
العـام اللـي قبلـه يمـس حبـلـه=واليوم ثالث عام بحسـاب الارقـام
ارقام فالحاسوب والوقت محسـوب=وجمع الجماعه هيبتن عند الاخصـام
اخصـام لاهابـوك قفـو وخلـوكو=ان كـان ماهابـو تدالـوك بالـزام
زام يزايـمـلـك وزامٍ يـزايـمـك=دام يرتدع لا شاف في صفـك اقسـام
اقسام كـل قسـم فالـراي والاسـم=كل يجي قسمه علـى راس الابهـام
ابهام دون الخمس ما ينطـح اللمـس=وان كان ضمن الخمس للخشم لطـام
لطـام ويشجعـك كفـك واصابعـك=وابنا عجب حمايـة الموقـف الهـام
هـام يقظونـه وهــام يحمـونـه=وحنا لهـم فالمعظلـم درع وحسـام
حسـام لا شـدوه بالحـق سـلـوه=تدهش مضاريبـه داكتـرت الاروام
اروام يعنـي روم والرمـز مفهـوم=يامرحبا باللي حضر عد مـن صـام
صام الشهر صامه وصلـى وقامـ=هومباركيـن العيـد والخيـر قــدام
قـدام والفايـز جـزاه الجـوايـز=من كيـس ربـع شكلوهـن بحكـام
حكام مشهوديـن بالصـدق والديـن=والله يـذل الفكـر ويعـز الاسـلام

الشاعر/محسن بن فالح الشكرة


في الختام سائلاً المولى عز وجل أن يحوز على إعجابكم وأستحسانكم


أرق التحايا

 

 

 

 

 

 

من مواضيع: محمد بن حمد الشكرة

0 دعوة عامة من الشيخ / محمد بن زيد بن جريس الخييلات لحضور ملتقى قبيلة الخييلات
0 ياهـل الموقـع إلــي عنـدنـا غـالـي
0 مرشحي قبيلة الدواسر لإنتخابات نادي السالمية بالكويت-قائمة أبناء النادي
0 وزير التجارة يعين المهندس شويمي الكتاب المصارير عضوا بمجلس إدارة الغرفة التجارية بالخرج
0 سوف بعرض مساء اليوم الجمعة 19/11/1433هـ حفل تكريم الشاعر / نايف بن مسرع الدوسري بمناسبة مشاركته المشرفة في برنامج شاعر المليون للموسم الخامس على شاشة قناة الدانة

التوقيع




الى جنات الخلد يا بو فهد
أسأل الله ان يرحمه رحمةٍ تطمئن بها نفسه وتقر بها عينه
أسأل الله العظيم رب العرش الكريم أن يغفر له ويرحمه ويسكنه فسيح جناته


m.h.s502@vip.cn






آخر تعديل عبدالله الحافر الغييثي يوم 07-02-2010 في 06:00 AM.

    

رد مع اقتباس