يازين شب النار مع طلعة الشمس = في روضةٍ فيها النفل والخزامى
وريح الحطب ينعشك مع ريحة الحمس = وقت الضحى مابين صحو وغماما
وشيحٍ وحوذانٍ كما صافي الورس = وثم مرت الخلفات تمشي نظاما
وغنّة طيور البر ترسل لنا همس = وصوت النجر للضيف يرسل نغاما
وصفة ادلالٍ شوفهن يجلي العمس = مع رفقةٍ مافيهم اللي يناما
مع صحبة الاخيار نسعد ونجلس = بيض القلوب امعربين ونشاما
مافيهم الحاسد ولافيهم النجس = ولافيهم اللي ينقلون الكلاما
أميّز الطيّب وجنّب هل الهلس = مرضى القلوب امصوبين السهاما
انا اعرف اللي بين الاجواد مندس = وترى الصقر ماهوب مثل النعاما
وسلامتكم الشاعر /بدر بن سلطان التمامي