ألا يا هل الوادي عسى دْياركم الأمطار = يسقي ثراها وابل الغيث همالي
سلام عليكم عد ما تنبت الأزهار = سلام عليكم سادة المركز العالي
سلامٍ عليكم فَرْد فرد وْثناءٍ حار = تحية محبه طعمها حلوٍ زْلالي
بلدكم بلاد المرجله يا عزَاز الجار = ورثتوا الكرم من عدة أجيال وأجيالي
ديار الدواسر ماكر الخير والأخيار = بها يأنس المضهود في أمن وظلالي
ملكتوا قلوبٍ صافيه ما تشيل أوغار = فريد المعاني يقتبس منكم أمثالي
تهلل ملامحكم لمن جالكم خطار = ربيع الموده يقطفه فال وعقالي
صدورٍ رحيبه سِعْد من مرِّكم زوار = عن دياره ومرباه يصبح بكم سالي
رجال الشدايد للعدا صارمٍ بتار = عدو الدواسر عمره قْصِير ما طالي
على النايبه عون وفي المفزعات أنصار = سند من شكى بدنياه هم وغربالي
تغنى بفضايلكم هل الراي والشعار = وقايعٍ أكيده ما بها شك وجدالي
لكم صيتٍ مْدَوِّي تباهت به الأْذكار = زهت فيكم النخوه كِبار السن وأطفالي
لكم فزعةٍ من دونها تقصر الأشبار = جِزال الجمايل ما اتِّجرتم بأموالي
رموز المروه والوفاء بالأهل أبْرار = مِأمِّل وهايبكم بذلتوا له الغالي
نفوسٍ أبيه في سما الطايلات أقمار = لكم ساحة الأمجاد مَربع ومدهالي
ثقاتٍ رواسي تنتهي بشوركم لَشْوار = طحاطيح مقدامه على الحق صمالي
تدوسون كبد الجور ما تهابون النار = كعام المعادي مرعبة كل مِتْعالي
قهرتوا الصعايب واتخذتوا الخطر مضمار = فلا عزومكم لانت ولا شدادكم مالي
جمعتوا صفات الطيب والعز والإصرار = تِشَرِّف مواقفكم على كل الأحوالي
شربتوا الشجاعه كيف والنادرات بْهار= ينابيع عزٍّ فِيضَها قروم ورجالي
علوم الشهامه سلمكم صبيةٍ وكبار = سنام الفَخَر حزتوه من أول وتالي
سجل البطوله يستقي فعلكم أخبار = بلا أفعالكم تبقى سطوره فضاً خالي
لكم دانت القمه بلا مين واستكبار= نواصي الشيم بأيديكم البيض تختالي
عسى جْدودكم ينبت على قبورهم نوار = ويجعل لهم في جنة الخلد منزالي
نظمت القوافي شاهده بالّذي قد صار = عسى القاف جملني بلا نقصِ وِاخلالي
ألا يا إله الكون يا رب يا ستار = توفق هل الوادي ذرى زابن وْجالي
************************************************** ********
ناصر بن جمعان آل عوض