اقتباس:
|
المشاركة الأصلية كتبت بواسطة ناصر بن دهيم
اخواني واخواتي اعضاء منتدى الدواسر الرسمي في البداية اعتذر عن قلة كتاباتي ومشاركتي معكم ويعلم الله اني لا ادخل النت كثيرا ومشغول دائما لكن قلبي دائما معكم ومتابع لكم ولنجاح هذا الموقع في فترة بسيطه ، وكل الشكر لخوي وابن عمي هايف بن مبارك على جهوده لانه من الناس الحريصين على وجودي بينكم وهذا مو غريب على ابو مبارك .
واحب انزل لكم اليوم مرثيتي في ابوي المرحوم محمد بن دهيم الغييثي الدوسري رحمة الله عليه وعلى اموات المسلمين في هذا الصرح الشامخ .
ياصاح قلي وش بلا القلب ياصاح=ذكر علي اللي رفيع ٍ مقامه
البارحه ياصاح ماني بمرتاح=القلب عيا يهتني في منامه
افكار عقلي بين مسرى ومسراح=سريتها من الاحمدي لا اليمامه
ذكرت شي ٍ راح لكنه ما راح=ذكرت ابوي اللي عدو الرخامه
كن الحزن صندوق والقلب مفتاح=في ذمتي انه وسط قلبي علامه
الشايب اللي صرت فيديه مسباح=اضيع من سبابته لا ابهامه
اشوف زوله في دجى الليل مصباح=والليل عقبه ينتهي مع ظلامه
الله واكبر كلمته لين ماطاح=تشهد صلاته له ويشهد صيامه
موته خساره ماتعوض بالارباح=ماعقبه الا اهل الحكي والملامه
عشرين عام ٍ تحت اياديه مرتاح=امشي على شوره واردد كلامه
روٌح وخلاني وانا احسبه مزاح=رحماك ياربي نهار القيامه
شايب ورباني على درب الاصلاح=للدين دين وللشهامه شهامه
ارحب وديوانه ونجره الي صاح=واحلا القصيد وهيبته واحترامه
مرت علي كنها سنا البرق لا لاح=راحت مثل حلم الطفل في منامه
من دون ربعك يايبه درع واسلاح=اسمك لهم يابوي عز وكرامه
ابكي على اللي للمجاريح جراح=اعالج اهمومي ولو بابتسامه
مامر حزن الا تباريه الافراح=وماطال قصر الا يعود هدامه
ياجعل حظي يرتفع مثل وضٌاح=حر ٍ يداعبه السحاب وغمامه
ترى الولد مثل ازرق العود فواح=طيبه على خاله وابوه وعمامه
مير آتحرى الطيب ماهو تمداح=اراقب العليا على كل هامه
ابوي راح وذكره اليوم ماراح=جعله مع الابرار يوم القيامه
وسلامـــــــــتكم / ناصر بن محمد بن دهيم الدوسري |
الشاعرالكبير/ناصر بن محمد بن دهيم الدوسري
صح الله لسانك ورحم الله موتاكم وموتى المسلمين
واسكن والدك في جنات النعيم يارب العالمين ..
الجزاله غير غريبةٍ عليك ياذيبان
تحياتي القلبية لك
أخوك ومحبك : دغش بن بطي