السلام عليكم ورحمة الله وبركاته
رديه شعريه جميله تجمع ما بين شاعرين مبدعين
محمد جار الله السهلي ومدغم ابوشيبه
***
محمد
بعد طاح ضلع طويق ياشاعر السبعان
ماعاد يتهيالك مقام على القمه 00
لو تحالف السوفيت وتحالف الألمان
مصير الفتى يحتاج فزعة بني عمه
***
مدغم
ليا طاح ضلع طويق ضلع من الضلعان
ترى الطيحه اللي تنحسب طيحة الهمه
اهل نجد لا ضاقت تعنز على سلمان
وهل السالميه كل واحد بحضن امه
***
محمد
تصنف من الشيخان ولا من الرعيان
بعد ما وخذ من فوقك البشت والعمه
تشيل الكبر وتزم نفسك وحنا اخوان
وياليت عندك شي يستاهل الزمه
***
مدغم
تراني على حد اليمين من ورا نجران
لو القى علي صالح نشدته عن الشمه
اسولف مع الشيبان واضحك على الورعان
ولا مات خال ابوي ما مت من همه
***
محمد
لو تروح لأمريكا مردك على الصمان
تراك بدوي يجري هوى البر في دمه
تول القياده زين ياقايد الغزلان
قبل لا أتوثم فيك واجيك بمطمه
***
مدغم
مدام الفياض مربعه والمطر ودان
لا خايلت لي برق دفعت القدم يمه
انا ذيب ليل لا عوا ما رقد جيعان
ولاني بكلب رابض في ذرا عمه
***
محمد
لا تكبر هقاويقك على الزور والبهتان
وانا اللي يداري دمعتك في طرف كمه
انا بـ أنشدك يـ الطرقي الجايع الضميان
من اللي بحبله وردك راهي الجمه
***
مدغم
وش المشكله بيت ودخلته مع البيبان
مدام انها ماتلحق الوجه والذمه
لو المصلحه ماتحكم انسان عند انسان
وش يحبب النواب في مجلس الأمه
***
دمتم بخير