[معلومات العضو راشد المسعري]

قصيدة جميلة ومؤثرة للشاعر " ناصر القحطاني " بعدما أقام أمسية شعرية أعتقد أنها في قصر الحمراء بالأندلس " أسبانيا" ولمّا رأى المباني والآثار الإسلامية تذكر بطولات وأمجاد المسلمين في تلك البلاد تهيّض وقال القصيدة التالية:-



البيرق اللي على قمة جبل طارق
عارٍ حنى الهامه اللي طال عاتقها

جيت أسأله يوم شفته بالحزن غارق
وأقول شف حابس العبرات مطلقها

ياورثنا اللي من المسروق للسارق
يا أغلى المراقيب لو ماكنت شاهقها

ما بين مغرب رضاك وغيظك الشارق
ذكرتني حصة التاريخ ما أصدقها

ماكنّك اللي مرق من جانبك مارق
للوادي اللي فلول الذل فرقها

من طيب حظك ومن تفكيره الخارق
ساق المناوي وقال الله يحققها

ما تذكره يوم مر الماء كما الزارق
لميت جنده ولم السفن وأحرقها

ما تذكر الخطبة اللي سرت البارق
والخيل والريح والعزه و بيرقها

ما تذكر الغاده اللي غصنها وارق
من سربه الحق ترجي ثار خافقها

ما تذكر الفرقتين وشاسع الفارق
\والسبع الأيام ما تذكر دقايقها

الموت مثل الحياه أطماع ومزارق
والأندلس تنتظر ميعاد عاشقها

بوابةٍ قبل ما تنشد من الطارق
هبايب المسك ساقت ريح طارقها

لين ارجهنت وغنّا شوقها الحارق
من أول أبراجها لآخر حدايقها

ياأغلى المراقيب .. أنا رحال ومفارق
والكلمة اللي تزيد الهم أبنطقها

طارق وروح .. تصبر يا جبل طارق
لو رزت القوم في راسك بيارقها