عندما كان رشيد الزلامي في الجيش الكويتي في مصر سمع شخصاً يسب السعوديه فقال هذه الابيات
الله من قلباً به النار تشتب=شبت وهبت واستمرت شبوبه
قلباًغدى للهم مارد ومشرب=وماضاع من هم العرب راح صوبه
هماً على ربعاًوهماً على غب=باليوم والساعه همومه تلوبه
والله من عين تصب العبر صب=صب القليب الي تدالج غروبه
ياعبيدانا ماني بضب ولد ضب=يصبر لياسمع وينفخ ذروبه
انا عتيبي عريب معرب=ولي ماقفاً كل الجميع اشهدوبه
من سب داري قلت له كب ثم كب=وارخصت روحي دون داري جلوبه
لو انسجن باسبابه واتعذب=صبرت من شان الوطن للعقوبه
والسجن ماهو عيب شي مجرب=يعلم المسجون وشهي ذنوبه
يلومني خبل الى من تغرب=ينسى الوطن خسرو هله يوم جوبه
فوده مع الظفران صفر مكعب=غطيس قلب لذة النوم دوبه
وانا على كل الجنوب اتقلب=ماذقت حلو النوم يوم اهتنوبه
واقنب قنيب الذيب في راس مرقب=من حرمابه قام ينهش جنوبه
يجذبني الغربي عصير الى هب=ريح الديار الطاهره مع هبوبه
ريحة هواها مكسب واي مكسب=اخير من ريح البحر والرطوبه
عسى السحاب الي من العصر ينصب=دلت هماليه وهلت نصوبه
يسقي وطن راع العقال المقصب=نجد العزيز وغرب نجد وجنوبه
ياديرتي ما تقبل الشتم والسب=يامنع الاسلام دار العروبه
يفوز مذهبها على كل مذهب=وعلى مقلبت المذاهب عقوبه
يحكم بشرع الله والسيف الارقب=ولا شق فيها طالب الحق ثوبه