🌟🌟🌟بإسم آل حسن🌟🌟🌟
🌟 🌟 🌟
قصيدة موجهه إلى قبيلة آل زايد الدواسر
الشاعر / ناصر بن مدعث آل عمار
⭐⭐⭐
بإسم آل حسن منبع الشيخان والشان الكبير
اهل الغروس الداجيه واهل الجهام المهمله
من دارنا الافلاج دار العز ركبت السفير
قاف (ن) اسوقه يم ربعي لاد زايد وارسله
يالابتي يا لاد زايد ياموردة الشطير
ياكيف ياتي صفنا شق انثلام وبلبله
السيف حده لاضرب ماهوب يضرب في الجفير
يضرب على رووس العدى ويحط فيهم زلزله
من طاوع الشيطان ياشعار مالفا له بخير
وحنا فعايلنا سوى والكل منا مكمله
صهيب(ن)وسالم للعدو شر(ن) شرير مستطير
أفعالنا تبقى على مر العصور مجمله
صهيب(ن)وسالم مزبن المضهود لاصاح النذير
عاداتنا في الحرب نطح(ن) للجموع المقبله
صهيب(ن)وسالم محزم(ن)لامن بدا الموقف خطير
ياكم عقيد (ن) في نحانا طاح ماعود هله
عيال زايد مشبعين الطير من جوف المغير
دواسر(ن)من ذو القدم وامجادنا متسلسله
افعالنا من هدمت الجدران في ولد القصير
سقنا الديه في جارنا فعل لنا مانجهله
واسلومنا ناسم عصا الجيران ونعز الجوير
ويامن بنا في ديارنا في ضفنا له نهمله
واسلومنا عيب نبيع الماء القراح بجوف بير
وبيع اللحم عيب(ن) ترى وانفوسنا ماتقبله
دواسر(ن)نبقى على مر الزمن لو وش يصير
مافرقتنا كلمة(ن) والجاهل اللي ينقله
🌟🌟🌟🌟🌟🌟🌟🌟