طال الفراق وطاري الماضي يروع=للحاظر اللي غـاب مصـدر أمانـه
ودم العروق اللي من القلـب مدفـوع=يحمل كيـان أسـم حرمنـي حنانـه
أسم بوسط بلازمـا الـدم مطبـوع=يعيش في دمـي ويجـري جريانـه
متوافيـن بالفصيـلـه وبالـنـوع=نفـس المكابـر والثقـل والرزانـه
رعوده أتنهـات وأمطـاره دمـوع=أرضه عروقي والسماء عظم شانـه
نباته آمـال وشفـاء وقلـة سنـوع=وفضاه صدرن ضاق فـي عنفوانـه
تنقاد لـه أجـزاي تابـع ومتبـوع=مرفوعـن بكـل الخلايـاء مكانـه
أربع حروف وعرشهن قلب وضلوع=لسيرتـي قـدوه ومرجـع ديـانـه
أول حروفه ألف مليـون مشـروع=والثاني حـراب الحليـف وطعانـه
والثالث مصارع لظى نار وجمـوع=والرابـع دمـوع الضيـاع لكيانـه
ياليت رابع .. طور .. باقي له سبوع=حتى افرح بوجهن ذبحـت أنسيانـه
كم لي وانا من فرحتي فيه مقطـوع=وشمع الفرح محروم مـن شمعدانـه
كم لي وانا عن همسته مجدب سموع=فـي لـذة حروفـن وزنهـا لسانـه
كم لي عن دروب المواصيل ممنـوع=ضحيـة ظـروف وغنيمـة خيانـه
ياغايب من واقع الوصـل منـزوع=متى يجـد راجيـك فرحـة زمانـه