ياهل الهوى والمحبه ضاع مني غزال=سود عيونه على العشاق يغضي بها
له بكلة فوقها تاج الذهب والهلال=وخدود حمر من المنديل محفي بها
في ملعب العيد ضاعت شرق مدري شمال=ياليت عيد السعد يلفي ويلفي بها
ياريم ياريم ياللي ضاري للدلال=سلم عليه وخذ مني تراحيبها
قلبي معك ياذريف الطول زين الخيال=عذبت نفسي البنادم قبل تعذيبها
تضحك وانا واقف بالشمس وانت بظلال=ماخفت ربك ولا تدرا عواقيبها
حكمتني حكم عنتر في نهار القتال=أو أبو زيد الهلالي في مواجيبها
ياعود موز لياهب الهوى فيه عال=مالت غصونه ومالت به مقاظيبها
نور علينا بنورك يابديع الجمال=بخدودك اللي على الجيران تضوى بها