هذه القصيدة للشاعر جحيش السرحاني
عندما كبر في السن وجد عقوق من أولاده الثلاثة فتركوه وذهبوا مع نسائهم فقال فيهم :
قـال الـذي يقـرا بليـا مكاتـيـب = ياللي تقـرون العمـى مـن عناكـم
يا عيالي اللـي تشرفـون المراقيـب = تريضوا لي واقصـروا مـن خطاكـم
خوذوا كلام الصدق مـا بـه تكاذيـب = مثل السنـد مضمـوم للـي وراكـم
ياعيال لا صرتوا ضيـوف ومعازيـب = ترى الكـلام الزيـن ملحـة قراكـم
وتروا السبابه مـن كبـار العذاريـب = وهرج البلايـس مـا يطـول لحاكـم
المذهب الطيب فهـو مذهـب الطيـب = والمذهـب الخايـب يبـور نسـاكـم
يا عيـال مـا سرحتكـم باللواهيـب = يا عيال مـا عمـر المعـزب ولاكـم
يا مـا توليـت القبايـل تقـل ذيـب = من خوف لا ينقص عليكـم عشاكـم
وياماشريت السمن من عرض ما جيب = يفـز قلبـي يـوم يبـكـي حـداكـم
وياما قطعت من الفيافـي العباعيـب = نـدور مـن صيـد البـراري غذاكـم
يا عيال دوكـم لحيتـي كلهـا شيـب = هـذا زمـان قعودنـا فـي ذراكــم
قمت اتوكا فـوق عـوج المصاليـب = قصرت خطانـا يـوم طالـت خطاكـم
عطونـي القرضـة عليكـم مطاليـب = عطوني القرضة جـزى مـن جزاكـم
لابـد يـوم ٍ عـاوي ٍ دونـي الذيـب = بالقبر ما افرق طيبكـم مـن رداكـم
ما ني بفاضحكـم بوسـط الاجانيـب = باعمالكـم يـدرون كـل اقربـاكـم
لو كان تـدرون الـردى والمعاييـب = صرتوا مع المخلـوق مثـل خوياكـم
خوالكـم بالطيـب تـروي المغاليـب = لـو تتبعـون الجـد محـدٍ شنـاكـم
وش علمكم يـا تاركيـن المواجيـب = حسبي عليكم هالـردى ويـن جاكـم
يالله عسى اعماركم شمسهـا تغيـب = .يعتـم قمركـم ثـم تظلـم سماكـم
يـا علكـم فـي حاميـات اللواهيـب = ياللي علـى الوالـد خبيـث ٍ لغاكـم
شفت الجفا والحيف والغلـب والريـب = بضلوعكـم لا بـيـض الله قـراكـم
اطلب عسى نساكم ما تحمل ولا تجيب = ولا احد ٍ من الوغدان يمشـي وراكـم
اخسوا خسيتـوا يـا كبـار اللغابيـب = اهبـوا هبيتـوا يقطـع الله نمـاكـم