يا اهل الاحساء يا مفصلين المشالح
لا جاكم الراس الردي لا تبيعون
حنا بلشنا الشيخ مصلح و صالح
وسط المحافل كل يوم لهم لون
ليت الحكومه تامر اهل المشالح
لاهي تبيعه غير شيخ ودندون
حنا بلشنا في بشوت الجوالح
اللي عن صدوف الزمن مايذرون
تنصب مثل ما ينصب الشيخ شالح
والا نمر والا عقاب بن سعدون
البشت يبغا له رجال فوالح
من الكرم تندى الايادي ويندون
والبشت يبغا من يسد المصالح
بوفاية المديون واطلاق مسجون
حتى لو الدنيا عليهم تكالح
عن العلوم الطيبه مايغيبون
افعالهم ماهيب لجل المصالح
يزهاهم البشت الحساوي ويزهون
ناصر بن مدعث