[معلومات العضو تركي ال فنيس]

كان مجموعة من فرسان آل زويمل من آل حنيش الوداعين الدواسر ، في احدى الغزوات ويقدر عددهم بخمسة اشخاص وحصل لهم كسب وفي طريق عودتهم ومعهم كسبهم اصطدموا فجأتاً بعدد من فرسان قبيلة يام ويقدر عددهم بستين مردوفة ، وكان عقيدهم الفارس الشجاع مجهار ،وقاموا فرسان يام بالاغاره على الوداعين ، فتصدى لهم ابناء آل زويمل مع العلم ان المعتدين يفوقونهم في العدد، وقامت المعركة ودب دوي الرصاص واثناء الرمي لكت ((توقفت)) بندق الفارس عبدالله بن رجب الودعاني ، فلتفت لربعه وهو يقول : العذر من الله ومنكم يا آل زويمل ،
فردوا عليه جماعته : مالك عذر اليوم، حيث انهم في ضائقة كبيره
فلما سمع قولهم ابن رجب استل شلفاه ((رمحه)) وصار يقاتل بها،و جرت بينهم معركة طاحنة وشرسة إستبسلوا فيها الوداعين استبسال الأبطال، وقام محمد بن هادي (ابوحامد ) الودعاني وعقر ذلول عقيد القوم المغيرين ((مجهار)) ، واستطاعوا آل زويمل ان يردوا القوم ويحموا كسبهم منهم في ذلك اليوم العصيب
ومن قصيدة طويله يقول الشاعر فهيد بن فنيس ال حنيش الودعاني الدوسري

ياليت منهو حاضر معهم اشمـام=حاضر معهم علي العسر والليـن
يـا نفـدا الي دبرو ا برجـال يـام=((خمسة)) لامن جاء الملاقا صامليـن
ضربهم في الراس مايخطي العظام=من علي العاضدين ضرب الراكدين
يوم جاء (( مجهار)) شق في الكمـام=ردهـم الله والله يـرد الخاينيـن
ترك الـي نايـر عنـد الجهـام=تفهـق يمينـه ماتقلـط للسميـن

القصيده اطول منذ ذلك لكن لم يحفظ منها سوى هذه الابيات،وياليت اللي يعرف منها بقية يكملها لنا
وهناك كثير من القصائد للاسف ماتت مع اهلها،،،،،،،،،،
وهنا قصيده اخري للشاعر دخيل بن سعد الودعاني ::

بذكر الله عزيز الشان سبحانه = ربنا الي خلق الأمه ومفنيها
منصفن بين الامه عدل ميزانه = رافعن السماء وارضه مساويها
قال منهو يعدل زين قيفانه = في لزومه تهاوى صوب داعيها
ماتذم القبايل ذلقت لسانه = وجه ابيض من الزلات حاميها
جدنا الي عزيزن عالين شانه = زايد الي حما داره وبانيها
لابتي هم هل الناموس واركانه = في الحرايب ويشهد وقت ماضيها
كم حفيفن خذينا منه ذيدانه = عند الابيات ولا في مضاميها
من لحق عندها ماشاف خلانه = فاختتهم وفاخت شوف راعيها
ومن غزانا كسرنا راس شيطانه = لين يرجع من الهدات ناسيها
يوم (( مجهار)) جانا هو وقيمانه = صوب ربعي بقيمانه يقديها
((عينو خمسة))(ن) والرب ماعانه = من ذلوله طمر ماعاد يبغيها
من دبشنا حزين ويبغي زيانه = حن جنبها وترتع في مفاليها
من كثير الكلام يكفي سمانه = عقب الي هروجه كاذبن فيها

وقول شاعر ال حنيش الوداعين الدواسر

وقف ((ابو حامد)) تفاق مزويه = تقفى يابو حامد مضرابهم زاني
اول ندب طيرت راعي العمانيه = غتما مضاريبها في القوم قد باني
يعيش ابو حامد ريف الخلاويه = واللي حضر كلهم من لاد ودعاني
اولا طعنهم كلوهم ذا اليمانيه = ما بيننا وبينهم سد وحداني
كله لعيناك يالبنت السنافيه = اللي شعث ذودها تزهم الحمداني
قد ((غار مجهار في تسعين منقيه))) = على ابلها يومنا في الظل نعساني
ضربت خمس وانا في الظل وقافي = والخمس ما اخطتهم بتدبير رحماني
كله لعينا فحلهم شامخ نيه = والعيون نوره مع حلوات للباني
يعرفون غتماي ماتثور مرميه = لازم يطيح الهدف من حيث ما كاني
قد كد منها عقيد القوم بالحيه = شيخ يبي ذودنا من ديرته عاني
ياما حضرنا بها صبح وعصريه = وفي كل وقت اثيب اللي بينخاني
لونٍ ((مجهار)) يدري بالدبش ليه = والله يجنب مفاليها ولا جاني
ما توخذ الابل وانا عيني بعد حيه = وان اخذت الابل ترى الفنجال يعداني
ولا يقدم لي الفنجال مثنيه = زودٍ على اللي نها ر الهوش ما باني
لي بندق من خضاب الصيد مطليه = احب عندي من القاصين والداني
ما يامن البل واهلها كون حربيه = لاقيل هذا فريق فلان وفلاني
كل يخلي الدبش يرعى مفاليه = ترعى ولو ما قفاها كون رعياني
وبيوتنا من لحوم الصيد ممليه = وان جا ضيوفٍ جعلنا معه خرفاني
اقول واطول من ربعٍ عواجيه = الاد زايد و انا من لاد ودعاني

اسمــاء الخمسه::
1-محمد بن هادي( بو حامد)بن فهيد ال زويمل ال حنيش
2دخيل بن هادي بن فهيد ال زويمل ال حنيش
3راشد بن هادي بن فهيد ال زويمل ال حنيش
4 خالد بن شليغم ال زويمل ال حنيش
5 عبدالله بن سعد بن رجب ال حنيش






كاتبه : تركي ال فنيس